Mübariz İmanzadə

Vikipediya, azad ensiklopediya
Jump to navigation Jump to search
Mübariz İmanzadə
Doğum tarixi (79 yaş)
Doğum yeri Şəki
Vətəndaşlığı Azərbaycan Azərbaycan
Milliyyəti Azərbaycanlı
Təhsili ali
Fəaliyyəti diplomat, tərcüməçi

Mübariz Şakir oğlu İmanzadə — Azərbaycanlı peşəkar diplomat və tərcüməçi.


Həyatı[redaktə | mənbəni redaktə et]

Mübariz İmanzadə 21 avqust 1943-cü ildə Şəki şəhərində anadan olmuşur. Atası Şakir İmanzadə orta məktəb müəllimi kimi fəaliyyət göstərmişdir. Anası Səidə İmanzadə görkəmli pedaqoq və tarixçi olmuş, Azərbaycanda qadın azadlığı hərakatında çox önəmli rol oynamışdır.[1] Bacısı Taleə İmanzadə isə BDU və Bakı Slavyan Universitetində müəllim qismində çalışmışdır.[mənbə göstərin]

Təhsili və Sovet dövründəki fəaliyyəti[redaktə | mənbəni redaktə et]

Mübariz 1950–60-ci illərdə Bakı şəhəri 6 nömrəli orta məktəbdə oxumuşdur. Orta məktəbi bitirib, BDU-nun şərqşünasluq fakültəsinin hərbi tərcüməci kursuna qəbul edildi. Yaxşı oxuduğuna görə 3-cü kursdan onu xaricə, bilavasitə hərbi tərcüməçi qismində ezam etdilər. Moskvadan Bakıya gələn xüsusi komissiya 50 nəfərin içindən 3 nəfəri, o cümlədən, Mübarizi seçmişdi. Onları Moskvaya aparıb Xarici Dillər üzrə Hərbi İnstitutda 6 ay hərbi tərcüməçilərin xüsusi kursunda oxutdurduqdan sonra onu Suriyaya hərbi tərcüməçi göndərdilər. O vaxt Suriya ordusunda Sovetlərin hərbi müşavirləri fəaliyyət göstərirdi. Mübariz onlarla ərəblər arasında tərcümə işi ilə məşğul olurdu. Müsəlman olduğuna görə ərəblər azərbaycanlılara xüsusi rəğbət bəsləyirdilər, ona görə onları ən məsuliyyətli yerlərə göndərirdilər. Hələ tələbə ikən 2 il Suriyada hərbi xidmət edib SSRİ Müdafiə Nazirliyinin tərifnamələrini alan Mübariz 1969-cu ildə Suriyadan qayıdıb, Azərbaycan radiosunun ərəb şöbəsində redaktor kimi çalışmağa başladı. İl yarım sonra 1970-ci ildə onu yenidən müddətli hərbi xidmətə cağırdılar. 1972-ci ildə xidməti başa vurub BDU-nun fəlsəfə kafedrasının aspiranturasına qəbul olunan Mübarizin elmi rəhbəri akademik, şair, ziyalı, anası Səidə xanım İmanzadənin tələbəsi olmuş Aslan Aslanov oldu. Aspiranturanı bitirən kimi, A.Aslanov onu rektor olduğu İncəsənət İnstitutuna tədris hissə müdiri vəzifəsinə təyin etdi. Aslanov onun həyatına, dünyagörüşünə güclü təsir etmiş ziyalılardan idi. İki il institutda işlədikdən sonra Mübarizi yenə xaricə, bu dəfə Yəmənə, Sovet səfirliyində baş tərcüməçi işinə göndərdilər. Dörd il orada işlədikdən sonra yenidən instituta qayıtdı, lakin az sonra Moskvanın tələbilə yenidən Yəməndəki Sovet səfirliyində dörd il baş tərcüməçi işlədi. Artıq 10 il xaricdə işləmiş Mübarizi, ordan qayıtdıqdan sonra Dövlət Plan Komitəsində İnformasiya şöbəsinin müdiri təyin etdilər. İki il sonra, onu yenidən Suriyadakı Sovet səfirliyinə baş tərcüməçi göndərdilər.[2]

Müstəqillik dövründəki fəaliyyəti[redaktə | mənbəni redaktə et]

SSRİ dağıldığına görə 1991-ci ildən səfirlik artıq Rusiya səfirliyinə çevrildi, ona görə Mübariz 1992-ci ildə Bakıya qayıtdı. 1992–2001-ci illərdə vaxtilə anasının 40 illik ömrünü həsr etdiyi BDU-da, özəl ali məktəblərdə (Xəzər Universitetində, Ali İctimai-Siyasi Kollecdə və s.) hərbi və ərəb dili kafedralarında müəllim işlədi. 2001-ci ildə Azərbaycan Respublikası Xarici İşlər Nazirliyinə 1-ci katib vəzifəsinə dəvət etdilər. Bir ildən sonra Səudiyyə Ərəbistanındakı Azərbaycan səfirliyinə müşavir göndərdilər. Səfir başqa yerə gedəndə müşavir onu əvəz edirdi. Səfir eyni vaxtda Oman, Qətər, Bəhreyndə də səfirlik edirdi, tez-tez o ölkələrə gedirdi və Mübariz onu əvəz edirdi. Mübariz İmanzadə 2002-ci ilin sentyabrından 2006-cı ilin 15 dekabr tarixinədək Azərbaycan Respublikasının Səudiyyə Ərəbistanı Krallığındakı səfirliyinin I katibi, müşaviri və müvəqqəti işlər vəkili, 2009-cu ilin aprelindən 2013-cü ilin 30 aprel tarixinədək Azərbaycan Respublikasının Tunisdəki müvəqqəti işlər vəkili vəzifələrində çalışmışdır. Xarici İşlər Nazirliyi xətti ilə xarici dövlətlərdə işlədiyi müddət ərzində o, Azərbaycan-Səudiyyə Ərəbistanı və Azərbaycan-Tunis əlaqələrinin inkişafı ilə bağlı səmərəli fəaliyyət göstərmiş, işlədiyi ölkələrin siyasi və iqtisadi həyatına dair siyasi-analitik materiallar və müxtəlif həcmli məlumatlar hazırlayaraq mərkəzə təqdim etmiş, Azərbaycan Respublikasının nailiyyətlərini, Azərbaycan Ermənistan Dağlıq Qarabağ münaqişəsinin həqiqətlərini müxtəlif xarici təşkilatların nümayəndələri ilə görüşlərdə və yerli mətbuat vasitələrində təbliğ etmişdir. M.İmanzadə xarici ezamiyyətlərindən sonra Xarici İşlər Nazirliyinin II Ərazi İdarəsinin Yaxın Şərq və Afrika şöbəsinin müşaviri işləmiş, sonradan isə Yaxın Şərq və Afrika İdarəsinin müşaviri vəzifəsinə təyin edilmişdir. Azərbaycan Respublikasının Xarici İşlər Nazirliyində səmərəli fəaliyyətinə görə, Nazirliyin 8.07.2011-ci il tarixli 1064–3 əmri ilə o, Azərbaycan Respublikasının Diplomatik Xidmət orqanlarının 90 illiyi Yubiley medalı ilə təltif olunmuşdur. M.İmanzadəyə 2014-ci il yanvar ayında I dərəcəli müşavir dərəcəsi verilmişdir.

Evlidir. Bir övladı var.

Rus, Türk, Ərəb və İngilis dillərini mükəmməl bilir.

İstinadlar[redaktə | mənbəni redaktə et]

  1. "BDU-da yubileylə bağlı kitab təqdimatı olub" (az.). m.modern.az. 2013-01-11. 2021-08-30 tarixində arxivləşdirilib. İstifadə tarixi: 2021-08-30.
  2. Nura boyanmış ömür. Xeyrulla Ağayev. Bakı: 2012, səh. 84