Orxan Əhmədov

Orxan Əhmədov
azərb. Əhmədov Orxan Məmmədağa oğlu‎
Şəxsi məlumatlar
Ləqəbi	Kira Naqasaki
Doğum tarixi	27 iyun 1994
Doğum yeri	Sumqayıt, Azərbaycan
Vəfat tarixi	12 iyul 2021 (27 yaşında)
Vəfat yeri	Beyləqan, Azərbaycan
Vətəndaşlığı	Azərbaycan
Təhsili	Təfəkkür Universiteti Azərbaycan Silahlı Qüvvələrinin Təlim Tədris Mərkəzi
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	2017 – 2021
Rütbəsi	Baş leytenant
Döyüşlər	Aprel döyüşləri Vətən müharibəsi  • Cəbrayılın azad edilməsi  • Füzulinin azad edilməsi  • Qubadlının azad edilməsi  • Zəngilanın azad edilməsi  • Hadrutun azad edilməsi
Təltifləri

Orxan Əhmədov (tam adı: Əhmədov Orxan Məmmədağa oğlu; 27 iyun 1994, Sumqayıt – 12 iyul 2021, Beyləqan rayonu) — Azərbaycan Silahlı Qüvvələrinin baş leytenantı, musiqiçi.

Aprel döyüşləri, Vətən müharibəsinin iştirakçısı. Hərbçi kimi 2020-ci ilin 27 sentyabrından başlamış 17 oktyabr tarixinə kimi davam edən Füzulinin azad edilməsi əməliyyatında fəal iştirak etmiş və döyüşlərdəki xidmətlərinə görə "Füzulinin azad olunmasına görə" medalı ilə təltif olunmuşdur.

Orxan Əhmədov hərbi xidmətə başlamazdan əvvəl musiqi ilə məşğul olmuş və bu sahəyə olan marağını hərbi xidmətdə olan zaman da davam etdirmişdir. 2013-cü ildə Sumqayıt şəhərində yaradılmış və həmin şəhəri təmsil edən Sumgzeit depressiv blek metal və post-rok qrupunda Kira Naqasaki təxəllüs altında zərb alətlərində çıxış edirdi.

Orxan Əhmədov ona təhkim olunmuş PM markalı tabel silahından istifadə etməklə 2021-ci ilin iyulun 12-də intihar edib. Azərbaycan Respublikası Müdafiə Nazirliyi bildirib ki, hadisə qeyri-döyüş şəraitində baş verib və ilkin ehtimala görə hərbi xidmətlə əlaqəsi yoxdur.

Həyatı

Orxan Əhmədov 1994-cu ilin 27 iyunda Sumqayıt şəhərində anadan olub. İlk təhsilini Sumqayıt şəhər Təfəkkür liseyində almışdır. 2011-ci ildə Sumqayıt şəhər Vaqif İbrahim adına tam orta məktəbdən məzun olmuşdur. Ali təhsilini Elm və Təhsil Mərkəzi Təfəkkür Universitetində Filologiya (ingilis dili və ədəbiyyatı) ixtisası üzrə tamamlayıb.

2015-ci ilin iyul ayından 2017-ci ilin yanvar ayına qədər Azərbaycan Silahlı Qüvvələrinin sıralarında həqiqi hərbi xidmət keçib. 2016-cı il aprelin 1-dən 2-nə keçən gecədən başlayaraq Azərbaycan Silahlı Qüvvələri və Ermənistan Silahlı Qüvvələrinin hərbi birləşmələri arasında baş vermiş Aprel döyüşlərində Artilleriya bölməsidə iştirak etmişdir.

2017-ci ilin iyul ayından oktyabr ayına qədər Azərbaycan Silahlı Qüvvələrinin Təlim Tədris Mərkəzində zabitlik kursu oxumuş və şəxsi heyət üzrə müavin ixtisasında leytenant rütbəsinə yiyələnmişdir.

Daha sonra zabit kimi Beyləqan rayonu N saylı hərbi hissəsində hərbi xidmətə başlamışdır. 2020-ci ilin 27 sentyabr tarixində Azərbaycan Silahlı Qüvvələri və Ermənistan Silahlı Qüvvələri arasında Dağlıq Qarabağda başlamış II Qarabağ müharibəsini ilk günlərindən etibarən leytenant Orxan Əhmədov döyüşlərdə fəal iştirak edib.

Müharibə müddətində göstərdiyi şücaətlərə görə baş leytenant rütbəsinə layiq görülmüş və müharibə bitəndən sonra olduğu hərbi hissədə Şəxsi Heyət üzrə idarə rəisinin köməkçisi vəzifəsinə təyin olunmuşdur. Baş leytenant Əhmədov Cəbrayılın azad edilməsi, Füzulinin azad edilməsi, Qubadlının azad edilməsi, Zəngilanın azad edilməsi və Hadrutun azad edilməsi əməliyyatlarında fəal iştirak etmişdir.

Baş leytenant Əhmədov ona təhkim olunmuş PM markalı tabel silahından istifadə etməklə 2021-ci ilin 12 iyul tarixində Beyləqan rayonunda yerləşən N saylı hərbi hissədə intihar edib. Azərbaycan Respublikası Müdafiə Nazirliyi bildirib ki, hadisə qeyri-döyüş şəraitində baş verib və ilkin ehtimala görə hərbi xidmətlə əlaqəsi yoxdur.

Musiqi və yaradıcılıq fəaliyyəti

Orxan Əhmədov uşaq yaşlarından etibarən musiqinin rok janrına maraq göstərmişdir. 2013-cü ilin oktyabr ayında Sumqayıt şəhərində yaradılan və Azərbaycanın ilk depressiv blek metal və post-rok qruplarından biri olan Sumgzeitin qurucularından olmuşdur. Orxan, qrupda Kira Naqasaki təxəllüsü altında, zərb alətlərində ifa edirdi.

2014-cü ilin fevral ayında qrupun Eternal adlı ilk debüt albomu buraxılır və albom 1 intro və 3 trekdən ibarət olur. Qrupun Sumqayıt və Bakı şəhərlərində konsertləri baş tutmuşdur. 2019-cu ildə (ing. The Death of You) adlı sayca ikinci albom Youtube platformasında yayımlanmışdır. Sumgzeit sayca üçüncü albomunun üzərində işləyirdi və albomun 2020-ci ilin sonlarına qədər təqdim edilməsi planlaşdırılmışdı.

Vətən müharibəsinin başlaması planları yarımçıq qoyur və qrupun bəstəkarı Cavid Şərif və zərb alətləri ifaçısı Orxan Əhmədov müharibəyə yollanırlar. Müharibədən sonra da fəaliyyətinə davam edən qrup, albom fəaliyyətlərinə davam edir. Üçüncü alboma Kira Naqasaki tərəfindən ing. Post Modern Happiness adı verilmişdi və albomun konsepti və ideyaları tamamilə Orxana məxsus idi.

Təltifləri

• (25.12.2020) — "Füzulinin azad olunmasına görə" medalı — Azərbaycan Respublikasının Prezidentinin 25 dekabr 2020-ci il tarixli Sərəncamı ilə Orxan Məmmədağa oğlu Əhmədov "Füzulinin azad olunmasına görə" medalı ilə təltif olunmuşdur.