Əhməd Yaşat

Vikipediya, azad ensiklopediya
Jump to navigation Jump to search
Əhməd Yaşat
Şirinzadə Əhməd Həsən oğlu
Əhməd Yaşat.jpg
Doğum tarixi
Doğum yeri Şəki
Vəfat tarixi
Vəfat yeri Ankara Türkiyə Türkiyə
Vətəndaşlığı Rusiya İmperiyası Rusiya İmperiyası
Azərbaycan AXC
SSRİ SSRİ
Türkiyə Türkiyə

Əhməd Yaşat — mühacir, Azərbaycan Kültür Dərnəyi tərəfindən Ankarada nəşr edilən "Azərbaycan" jurnalının məsul müdiri olub.[1][2][3]

Haqqında[redaktə | əsas redaktə]

Əhməd Şirinzadə 1917-ci ildə Şəkidə Həsən Şirinzadə və Zəhra xanımın ailəsində anadan olub. Qardaşının adı Ənvər, bacılarının adı Zərifə və Əzizə olub. İbtidai və orta təhsilini Şəkidə aldıqdan sonra o Bakıya gedərək tibb üzrə təhsil alıb. II Dünya Müharibəsi dövründə Əhməd Şirinzadə fin cəbhəsinə həkim kimi göndərilir. Bununla bağlı mühacir dostlarına bu xatirəsini danışıb[2]:

" Gənc bir həkim ikən Fin cəbhəsinə göndərildim. Rus orduları bir-iki ay içində Finlandiyanı məğlub edəcəyini zənn edirdi. Fəqət qocaman birliklər bir ovuc Fin ordusu qarşısında bir addım da irəli gedə bilmirdi. Böyük meşələrlə örtülü olan Finlandiyada qara bürünən hər ağac bir fin əsgərinin qərargahı idi. İldırım sürətiylə gələn bir neçə fin əsgəri rus bölmələrini güllələyib gedirdi. Buna alışıq olmayan rus orduları pərişan halda idilər. Bu dəfə xizək sürən kişilərdən ibarət birliklər cəbhəyə göndərildi, onlar da mübarizə apara bilmədilər. Beləcə, kiçik Finlandiya qarşısında qocaman Sovet Rusiyası dünya qarşısında rüsvay oldu. "

Almanlar SSRİ üzərinə hücum etdikdən sonra Əhməd bəy alman cəbhəsinə göndərilib. Əsir düşməsi haqqında bunları deyib[2]:

" Almanların hücumunu gözləyirdik. Mən bir tank tuqayında həkim idim. Hücumdan bir gün əvvəlki gecə ruslar birliklərə ziyafət verdilər. Yeyib-içdilər. Sabahın erkən saatlarında almanların hücumu başladı. Rus tankları hərəkətə keçənə qədər bir mərmi də atmayan bizim tuqay kimi digər rus birlikləri də almanlar tərəfindən mühasirəyə alınaraq əsir götürüldü. İlk əsarət həyatı belə başladı. "

Əsirlikdən qurtulduqdan sonra Yaşat arxa cəbhədə həkim kimi çalışıb. Müharibədən sonra Yaşat bir müddət Hannoverdə həkimlik edib. Eyni zamanda Rəsulzadənin göstərişləri əsasında milli istiqlal mübarizəsinə qatılıb. Almaniyanın tərəfində vuruşan legionerlər ruslara təslim edildiyi ərəfədə Yaşat özünü xilas edə bilib, 1948-ci ildə Türkiyəyə gəlib. Burada da ixtisası üzrə çalışan Yaşat quru yolları 4-cü bölgədə ölənə qədər həkimlik fəaliyyəti ilə məşğul olub.[3]

Ankarada Azərbaycan Kültür Dərnəyi qurulduğu zaman idarə heyətində təmsil olunub, iki dəfə sədr seçilib. İlk sədrliyi 2 dekabr 1962-ci ildən 20 dekabr 1965-ci ilədək, ikinci sədrliyi isə 2 sentyabr 1969-cu ildən 26 dekabr 1970-ci ilədək davam edib.[2]

Əhməd Yaşat 26 yanvar 1985-ci ildə vəfat edib və Ankarada dəfn olunub.[3]

Həmçinin bax[redaktə | əsas redaktə]

İstinadlar[redaktə | əsas redaktə]

  1. Nəsiman Yaqublu (2013). Məhəmməd Əmin Rəsulzadə ensiklopediyası (PDF). Bakı. səh. 168.
  2. 1 2 3 4 Dilqəm Əhməd (2018). Bir ildən Yüz ilə. Bakı: TEAS Press Nəşriyyat evi. səh. 115-116. ISBN 9789952310474.
  3. 1 2 3 Dilqəm Əhməd (25 mart 2018). ""Rəsulzadə məni diqqətlə süzdü və…" – Bir legionerin həyatı". teleqraf.com. 28 mart 2018 tarixində arxivləşdirilib. İstifadə tarixi: 9 sentyabr 2020.