Cavad İsmayılov

Cavad İsmayılov
İsmayılov Cavad Yunis oğlu
Doğum tarixi	9 may 1962(1962-05-09)
Doğum yeri	Bakı, Azərbaycan SSR
Vəfat tarixi	22 yanvar 1990 (27 yaşında)
Vəfat yeri	Bakı, Azərbaycan SSR
Milliyyəti	Azərbaycanlı
Fəaliyyəti	Qara Yanvar şəhidi.

Cavad İsmayılov (azərb. İsmayılov Cavad Yunis oğlu‎) - 20 yanvar şəhidi. Azərbaycan Respublikasının Prezidentinin 31 mart 1998-ci il tarixdə fərmanı ilə ölümündən sonra 20 Yanvar Şəhidi fəxri adı verilmişdir.

Həyatı

Cavad İsmayılov 1962-ci ilin 9 may tarixində Bakı şəhərində anadan olub. Bakı şüşə zavodunda fəhlə işləyib. Hadisədən sonra iki qız övladı yadigar qalıb. Cavad İsmayılov Azərbaycanın tanınmış şairi Mikayıl Müşfiqin qohumudur.

Anası Əzizə İsmayılovanın dediklərindən:

Yanvarın 19-da Cavad 3-cü növbə işə getdi, səhərə yaxın bizə zəng edib dedilər ki, o xəstəxanadadır. Biz onu Semaşko xəstəxanasında 13-cü mərtəbə, 4-cü palatada tapdıq. Mən onun üstündən adyalı götürəndə gördüm ki, yaraları sağ tərəfdə sinəsindən və sol tərəfdə kürəyindəndir. Mən bunu görəndə huşumu itirdim. Özümə gələndə Cavad dedi: — Gəlin, (o mənə babasının dili ilə gəlin deyirdi) adam kişi olar. — Dedim, yaxşı, daha ağlamaram. O dedi ki, həmin gün işə getdim, gördüm ki, iş yoxdur. Geri qayıtdım. XI Qızıl Ordu meydanından çıxanda gördüm ki, bir qadın yıxılıb zarıyır. Əyildim ki, onu qaldıram. Bir bu yadımdadır. Bir də məni maşına qoyanda ayıldım. Yolda, avtovağzalın yanında maşını atəşə tutdular. Maşın aşdı, mən burada möhkəm əzildim. Sonra başqa maşın bizi Semaşkoya gətirdi. Tibb institutunun qızları yaralılara qan verirdi. Bu vaxt əllərində avtomat olan əsgərlər içəri girərək tələb etdilər ki, heç kəs yaralılara qan verməsin. Sonra onlar işıqları söndürdülər. Yanvarın 22-də gecə Cavadın üzərində yenidən cərrahiyyə əməliyyatı aparılmış, lakin o, səhər saat 8-də keçinmişdir.

Cavad İsmayılov Şəhidlər xiyabanında dəfn edilmişdir.

Ünvan

Bakı, Tbilisi prospekti, ev 56, mənzil 9.

Həmçinin bax

• "20 Yanvar Şəhidi" fəxri adı alanların siyahısı
• Azərbaycan Respublikasının Azadlıq uğrunda mübarizlərinin siyahısı
• Şəhidlər Xiyabanında dəfn olunanlar

İstinadlar

• Qulu Kəngərli (1992). 20 Yanvar şəhidləri. Bakı: Gənclik, 312 səh. ISBN 4702060204. 2015-07-17 tarixində arxivləşdirilib. 2017-01-18 tarixində istifadə olunub.