Mehdi Mehdiyev (dövlət xadimi)

Mehdi Mehdiyev
Mehdi Adıgözəl oğlu Mehdiyev
Azərbaycan KP-nın Naxçıvan Vilayət Komitəsinin birinci katibi 1934 — dekabr 1936
Sələfi	Əliqara Məmmədov
Xələfi	Həsən Rəhmanov
Azərbaycan KP-nın Ağdaş Rayon Komitəsinin birinci katibi 1932 — 1934
Azərbaycan KP-nın Ağcabədi Rayon Komitəsinin birinci katibi 1930 — 1932
Partiya	1) Sovet İttifaqı Kommunist Partiyası (1918)
Doğum tarixi	20 oktyabr 1895(1895-10-20)
Doğum yeri	Qarakollu, Cəbrayıl qəzası, Yelizavetpol quberniyası, Rusiya İmperiyası
Vəfat tarixi	14 oktyabr 1937 (41 yaşında)
Vəfat yeri	Bakı, Azərbaycan SSR
Vəfat səbəbi	Repressiya
Döyüşlər	Rusiya vətəndaş müharibəsi

Mehdi Adıgözəl oğlu Mehdiyev (1895 – 1937) — ictimai xadim.

Həyatı

Mehdi Adıgözəl oğlu 1895-ci ildə Cəbrayıl qəzasının Qarakollu kəndində doğulmuşdu. 1908-ci ildə Şuşa seminariyasına daxil olub. 1911-ci ildə seminariyanı bitirmiş, sonra Hərbi Gürcüstan dəmiryolunun çəkilişində fəhləlik etmişdi. 1914-cü ildə Donbasda bir sıra görkəmli inqilab mübarizləri ilə tanış olmuşdur. O, dəmir yolunda yükdaşıyan işlədiyi vaxt Birinci Dünya müharibəsinin başlanması xəbərini də elə orada eşitmişdi. M.Mehdiyev 1915-ci ildən 1918-ci ilə qədər Orta Asiyada-Türküstan vilayətinin Buxara dəmir yolunda fəhlə işləmişdi. Bu müddətdə Mehdi inqilab işinə sədaqətli bir mübariz kimi yetişmişdi.

Siyasi fəaliyyəti

Tale Mehdinin 1918-ci ildə Çapayevin komandanlıq etdiyi 25-ci divizyaya gətirib çıxarır. Divizyanın tərkibində yeganə azərbaycanlı kimi o, ağqvardiyaçılara və xarici müdaxiləçilər qarşı əzmkarlıqla mübarizə aparır. Görkəmli inqilabçı M. V.Frunzenin Türküstan cəbhəsinə komandanlığı dövründə M. Mehdiyev də həmin cəbhənin sıvari döyüşçüsü kimi cəsarətlə vuruşur, inqilabçı-sərkərdə ilə basmaçılara qarşı yorulmadan mübarizə aparır.

1920-ci ilin əvvələrində Həştərxanda S.M. Kirov ilə tanış olan M.Mehdiyev aprelin 27-də XI Qızıl Ordunun tərkibində Bakıya gəlir. Bakıda bir çox görkəmli bolşeviklərlə yaxından tanış olur.Burada o,inqilaba qarşı mübarizənin güclənməsində fəal iştirak edir.

Azərbaycanda sovet hakimiyyəti qurulandan sonra Mehdi Mehdiyev bir sıra məsul vəzifələrdə çalışır. 1921-ci ildə partiya onu Qaryagin qəzasının Partiya Komitəsində təşkilat şöbəsinin müdiri kimi məsuliyyətli işə göndərir. O, partiya komitəsində şöbə müdiri kimi yerlərdə partiya özəklərinin yaranması və təşkilində, Banditizmə qarşı mübarizədə böyük fəallıq göstərmişdir.

1922-ci ildə Qaryagin qəzasının torpaq şöbəsinə rəhbərlik etdiyi dövrdə Mehdi özünü bacarıqlı və nümunəvi rəhbər işci kimi tanıtmışdır.

1923-ci ildən sonra gənc partiya işcisi bir müddət Lənkəranda işləmişdir. O, əvvəlcə Lənkəran qəza komitəsinin şöbə müdiri, sonra isə qəza partiya komitəsinin katibi olmuşdur. 1927-ci ildə o, Şamaxı qəza Firqə komitəsinin katibi seçilmişdir. 1928-ci ildən 1931-ci ilə qədər M.Mehdiyev əvvəlcə Azərbaycan KP MK-da təlimatçı kimi məsul vəzifədə çalışmışdır. 1931-1932-ci illərdə o, Moskva Qırmızı Professorlar (Ali Partiya) Məktəbinin dinləyicisi olmuşdur.

1932-1934-cü illərdə M.Mehdiyev Ağcabədi və Ağdaş rayonlarının partiya komitələrində katib vəzifəsində işləmişdir. 1934-cü ildə o, Azərbaycan KP MK Naxçıvan vilayət komitəsinin birinci katibi vəzifəsinə irəli çəkilir. M.Mehdiyev 1937-ci ilədək bu vəzifədə işləmiş, böyük təşkilatçılıq qabiliyyəti və bacarığına görə MK-nın mükafatları ilə təltif olunmuşdur.

Ailəsi

Mehdi Sitarə Hüseyn qızı ilə ailə qurmuşdu. Fikrət adlı oğlu, Rima adlı qızı vardı.

Mənbə

• Ənvər Çingizoğlu. Füzuli rayonunun ünlüləri. Bakı: Mütərcim, 2017, 642 s.