Azərbaycan Universiteti

Vikipediya, açıq ensiklopediya
Keçid et: naviqasiya, axtar

Azərbaycan Universiteti

Azərbaycan Universiteti.jpg
Şüar Uğurlu karyera üçün gələcəyini bu gün seç
Yaranma tarixi 1991
Tip özəl
Rektor Eldar Qəhrəmanov
Tələbə sayı 1468
Şəhər Bakı
Ölkə Flag of Azerbaijan.svg Azərbaycan
Koordinat Koordinatlar: 40°23′43″ şm. e. 49°52′56″ ş. u. (G)40°23′43″ şm. e. 49°52′56″ ş. u. (G)
Ünvan Yasamal rayonu, General Akim Abbasov küçəsi 84
Vebsayt www.au.edu.az

Azərbaycan UniversitetiAzərbaycanda fəaliyyət göstərən özəl universitet[1]. Rektoru Eldar Qəhrəmanovdur[2][3].

1991-ci ildən fəaliyyət göstərən Azərbaycan Universitetində 20 ixtisasda 1468 nəfər tələbə təhsil alır. Bunlardan 110 nəfəri magistrantdır.

Azərbaycan Universitetində 270 müəllim çalışır. Universitet fəaliyyət göstərdiyi müddətdə müəllimlərdən 2 nəfəri AMEA-nın müxbir üzvü seçilmiş, 4 nəfəri elmlər doktoru, 18 nəfəri isə elmlər namizədi alimlik dərəcəsinə layiq görülmüşdür.

Azərbaycan Universitetinin 1995-2014-cü illər ərzində 2950 bakalavr, 1999-2014-cü illər ərzində 338 magistratura məzunu olmuşdur. Universitet doktorantura səviyyəsində də kadr hazırlığı həyata keçirir.

Azərbaycan Universitetində iki beynəlxalq proqram fəaliyyət göstərir. ABŞ-ın Corciya Dövlət Universiteti (CDU) ilə birgə həyata keçirilən Biznes İnzibatçılığı üzrə Bakalavr (BBA) və Magistratura (MBA) proqramları [4], Sosial iş ixtisası üzrə İsveçin Lund Universiteti ilə əməkdaşlıq davam edir[5]. Digər ixtisaslar üzrə də beynəlxalq əməkdaşlığı genişləndirən Azərbaycan Universiteti 2013/2014-cü tədris ilindən Türkiyə Respublikası tərəfindən maliyyələşdirilən “Mövlanə Mübadilə Proqramı”na da qoşulmuşdur[6].

Yaranma tarixi və akkreditasiya[redaktə]

Azərbaycan Universiteti "Özəl Azərbaycan Universiteti-çoxpilləli təhsil kompleksi" kimi Azərbaycan Respublikası Nazirlər Kabinetinin 1 fevral 1993-cü il tarixli 60 saylı, Dövlət Ali Ekspert Komissiyasının 3 mart 1993-cü il tarixli, Xalq Təhsili Nazirliyinin Kollegiyasının 8 aprel 1993-cü il 5/2 saylı qərarlarına uyğun olaraq dövlət qeydiyyatına alınmış, Azərbaycan Respublikası Tədris Müəssisələri Tədris-Tərbiyə Təşkilatlarının Dövlət reyestrinə daxil edilmişdir. Universitet Azərbaycan Respublikası Nazirlər Kabinetinin 4 mart 1995-ci il tarixli qərarı ilə Nazirlər Kabineti yanında Dövlət Ali Ekspert Komissiyasının rəyinə əsasən tərkibində orta ixtisas kolleci olmaqla qeyri-dövlət Universiteti kimi Dövlət qeydiyyatına alınmışdır.

Təhsil Nazirliyinin 17 iyun 1997-ci il tarixli 412 №-li əmri ilə Azərbaycan Universitetində magistratura səviyyəsində kadr hazırlığına icazə verilmişdir.

2003-cü ildə Universitet Təhsil Nazirliyi tərəfindən lisenziyalaşdırılmış və onun fəaliyyətinə 1003278 saylı lisenziya (qeydiyyat №33) verilmişdir. Lisenziyaya əsasən Azərbaycan Universitetinə həm orta ixtisas təhsili , həm də ali təhsilin bakalavriat və magistratura səviyyələrində kadr hazırlığına icazə verilmişdir.

Azərbaycan Respublikası Təhsil Nazirliyi Akkreditasiya Komissiyasının qərarına və Təhsil Nazirliyinin 24 fevral 2009-cu il tarixli, 213 saylı əmrinə əsasən, Azərbaycan Universiteti ali təhsil müəssisəsi kimi akkreditə olunmuşdur. Elə həmin ildə Azərbaycan Universiteti yenidən lisenziyalaşdırılmış və onun fəaliyyətinə 15.07.2009-cu il tarixli 031995 №-li lisenziya verilmişdir[7].

Universitetin idarəetmə orqanı[redaktə]

Azərbaycan Universitetinin idarəetmə orqanı rektorluq və Elmi Şuradır. Universitetin Elmi Şurası Azərbaycan Respublikasının Təhsil Nazirliyinin Ali təhsil müəssisələrinin Elmi Şurası haqqında əsasnaməsinə uyğun olaraq fəaliyyət göstərir. Birbaşa idarəetməni rektor və prorektorlar həyata keçirirlər. Elmi Şuranın tərkibinə 27 nəfər, o cümlədən 1 nəfər AMEA-nın həqiqi üzvü, 1 nəfər AMEA-nın müxbir üzvü, 5 elmlər doktoru, 12 nəfər elmlər namizədi və 1 nəfər baş müəllim daxildir[8].

Azərbaycan Universitetinin rektorları[redaktə]

Azərbaycan Universitetinin rektoru Eldar Qəhrəmanov

Azərbaycan Universitetinin qurucusu professor Səlahəddin Xəlilovdur [9] [10].

Fəlsəfə elmləri doktoru, professor, AMEA-nın müxbir üzvü, AMEA-nın Fəlsəfə, Politologiya və Sosiologiya elmləri üzrə Problem Şurasının səd­ri­, “Fəlsəfə” jurnalının baş redaktoru Səlahəddin Xəlilov (Səlahəddin Sədrəddin oğlu Xəlilov) 2007-ci ilə qədər Azərbaycan Universitetinin rektoru olmuşdur.

İqtisad elmləri doktoru, professor, AMEA-nın müxbir üzvü, , Azərbaycan Respublikası Vergilər Nazirliyinin Vergi siyasəti və strateji araşdırmalar Baş İdarəsinin rəisi Akif Musayev (I)(Akif Fərhad oğlu Musayev) 2007-ci ildən 2011-ci ilədək[11] Azərbaycan Universitetinin rektoru vəzifəsini icra etmişdir.

Yazıçı-dramaturq, fizika-riyaziyyat elmləri namizədi, dosent Aslan Qəhrəmanlı (Aslan Qəhrəman oğlu Qəhrəmanov) 2011-2012-ci illərdə Azərbaycan Universitetinin rektoru olmuşdur[12].

1 may 2012-ci il tarixindən Azərbaycan Universitetinin rektoru Eldar Qəhrəmanovdur (Eldar Əvəz oğlu Qəhrəmanov)[13].

Fakültələr[redaktə]

Azərbaycan Universiteti 2007-ci ildən başlayaraq Boloniya Bəyannaməsinin tələbləri əsasında fəaliyyət göstərir[14] və kredit çoxballı sistemin tətbiqi üzrə Təhsil Nazirliyi tərəfindən 2009-cu ildə pilot ali məktəb elan edilmişdir[15]. Hazırda Azərbaycan Universitetində 3 fakültəMagistratura-doktorantura şöbəsi fəaliyyət göstərir.

1. İqtisadiyyat və idarəetmə fakültəsi

2. Biznes inzibatçılığı fakültəsi (Biznes Məktəbi)

3. Humanitar fənlər fakültəsi

4. Magistratura və doktorantura şöbəsi

İxtisaslar[redaktə]

Azərbaycan Universitetində bakalavriat pilləsi üzrə aşağıdakı ixtisaslar tədris olunur [16]:

I Qrup II Qrup III Qrup
Riyaziyyat İqtisadiyyat Filologiya (Azərbaycan dili və ədəbiyyatı)
Kompüter mühəndisliyi Dövlət və bələdiyyə idarəetməsi Sosial iş
Kompüter elmləri Dünya iqtisadiyyatı (Beynəlxalq biznes -BBA) Tarix
Mühasibat uçotu və audit (BBA) Tərcümə (İngilis dili)
Maliyyə (BBA)
Menecment (BBA)
Marketinq (BBA)

Tələbə dəstək layihəsi[redaktə]

Təqaüd alan tələbələrlə görüş

Daxili Təqaüd və Təhsil haqqından Güzəştlər Proqramına əsasən Azərbaycan Universitetinə yüksək balla qəbul olanlar təhsil haqqı güzəştlərindən faydalanmaqla yanaşı təqaüdlə də mükafatlandırılırlar [17].

Təhsil haqqından güzəştlər Təqaüdlərin şərtləri
350-419 bal: ayda 50 AZN
420-489 bal: 25% 420-489 bal: ayda 75 AZN
490-559 bal: 50% 490-559 bal: ayda 100 AZN
560-629 bal: 75% 560-629 bal: ayda 150 AZN+notebook
630-700 bal: 100% 630-700 bal: ayda 200 AZN+notebook

Təqaüd və güzəştlər tədris prosesində universitetin təyin etdiyi minimum müvəffəqiyyət göstəricilərinə əsasən tənzimlənir. Universitetin öz büdcəsindən maliyyələşən proqramın məqsədi fərqlənməyi bacaran və uğur əldə edən tələbələrə dəstək olmaqdan ibarətdir.

Beynəlxalq əməkdaşlıq[redaktə]

Azərbaycan Universiteti 1994-cü ildən Planlaşdırma üzrə Avropa Məktəblər Assosiasiyası (AESOP); 1996-cı ildən Universitet Prezidentlərinin Beynəlxalq Assosiasiyası (IAUP); 1997-ci ildən Universitetlərin Beynəlxalq Assosiasiyası (IAU) və Demokratiya üzrə Universitetlər Alyansı (AUDEM), 2000-ci ildən Avropa Ali Təhsil Cəmiyyəti (EHES) və İnstitusional Araşdırmalar üzrə Avropa Assosiasiyası (EAIR) adlı beynəlxalq təşkilatların üzvü, 17-dən çox xarici ölkə ali məktəbi ilə (ABŞ, BBK, İsveç, Almaniya, Rusiya, Türkiyə, Gürcüstan, Qazaxıstan, Aavstriya və s.) tərəfdaşdır[18].

Azərbaycan Universiteti keyfiyyətin artırılması, daxili potensialın gücləndirilməsi və kadrların peşakarlıq səviyyəsinin daim yüksəldilməsi məqsədi ilə beynəlxalq təhsil təşkilatları ilə də sıx əməkdaşlıq edir. 2011-ci ildə Azərbaycan Universiteti Azərbaycandan ilk universitet olaraq CEEMAN (Beynəlxalq Menecmentin İnkişafı Assosasiyası) təşkilatına üzv seçilmişdir. Təşkilatın əsas fəaliyyət istiqaməti menecment müəllimlərinin hazırlanması, menecmentin tədrisi ilə bağlı tədris materiallarının hazırlanmasına dəstək, bizes məktəblərində tədrisin keyfiyyətinin uyğunluğunu müəyyənləşdirən CEEMAN Beynəlxalq Keyfiyyət Akreditasiyasını keçirmək, beynəlxalq tədqiqat layihələrini reallaşdırmaq, biznes məktəblərinin problemlərinin müzakirəsi üçün peşəkarların görüşlərini təşkil etmək və s. ibarətdir.

ABŞ-ın Cociya Dövlət Universiteti (CDU) ilə birgə BBA və MBA proqramları[redaktə]

Azərbaycan Universiteti Biznes Məktəbində BBA və MBA proqramları ABŞ-ın Corciya Dövlət Universiteti ilə birgə 2008-ci ildən tətbiq edilir[19][20][21]. Biznes Məktəbində təhsil bütövlükdə CDU-nun BBA və MBA proqramları və orada tətbiq olunan kurikulum əsasında aparılır. Fənlərin sillabusları hər semestrin əvvəlində Mak Robinson Biznes Kolleci tərəfindən təftiş edilərək CDU-nun tələblərinə uyğun olması yoxlanılır. Dərslər Azərbaycanda biznes sahəsində ən peşəkar müəllimlər hesab olunan qərb təhsilli mütəxəssislər, habelə xaricdən dəvət olunan peşəkar müəllimlər tərəfindən aparılır[22].

ABŞ-ın Corciya Dövlət Universiteti CDU) ilə birgə həyata keçirilən Biznes İnzibatçılığı üzrə bakalavr (Bachelor of Business Administration-BBA) və Biznes İnzibatçılığı üzrə magistratura (Master of Business Administration-MBA) proqramlarında yeni tədris ilindən bəzi yeniliklər tətbiq ediləcək[23].

BBA proqramlarında tədris[redaktə]

BBA proqramlarında tədris CDU-nun Mak Robinson Biznes Kollecinin bazası əsasında təşkil olunmaqla indiyə qədər ingilis dilində aparılırdı. 2014/2015-ci tədris ilindən etibarən isə Azərbaycandilli BBA proqramlarının tədrisinə də başlanır. Azərbaycandilli qruplarda da ingilisdilli proqramların kurikulumu, sillabusları və orada yaranmış təcrübə və keyfiyyət tamamilə tətbiq edilir[24].

BBA ixtisaslarında tələbənin dil hazırlığına xüsusi əhəmiyyət verilir. Proqrama qəbul olan bütün tələbələr dil bacarıqlarına görə qruplaşdırılır və onlara 2 yaxud 3 semestr müddətində intensiv ingilis dili tədris edilir[25].

Tətbiq ediləcək yeniliklərdən biri də tədrisin dilinə tələbənin özünün qərar verəcəyidir. Tələbə tədris prosesində hər iki dildə təhsilin üstünlüklərini və öz dil imkanlarını yenidən dəyərləndirərək azərbaycandilli qrupdan ingilisdilli qrupa və ya əksinə keçə biləcək[26].

Biznes Məktəbinin dekanı Elçin Rəşidov

Biznes məktəbinin dekanı Elçin Rəşidov:

İngilisdilli BBA ixtisaslarında birinci tədris ilində ingilis dili öyrədilir, digər fənlər isə biznes üzrə ümumi dünyagörüşünü möhkəmlətməyi nəzərdə tutur və “yumşaq” ingilis dilin də aparılır. Belə fənlər vərdişləri “iti ləməyə” imkan verir. Ardınca tələbə “keçid fənləri”nə buraxılır. Bu fənlər “keçid” ingilis dilində tədris edilməklə, tələbəni növbəti semestrdən sərbəst ingilis dilində tədrisolunacaq biznes fənlərində faydalı iştiraka hazırlayır. Bu fənlərə Tənqidi düşüncə, İnsan ünsiyyəti, Biznes ingilis dili, Akademik yazı və s. daxildir. Tələbə həmin fənlərdə müvafiq olaraq aktiv dinləmək, biznes mətnlərini rahat oxumaq,peşəkarcasına yazmaq, analitik düşünmək və müzakirələr aparmaq səriştələrini təkmilləşdirir[27].

  1. İSTİQAMƏTLƏNDİRMƏ [[1]]

BBA proqramında tələbə ingilis dilini mükəmməl öyrənməklə yanaşı, biznes üzrə bütün ixtisaslar üçün ümumi fənləri və hər bir sahə üzrə peşəkar mütəxəssis yetişdirilməsini nəzərdə tutan ixtisas fənlərini dünyanın ən qabaqcıl universitetlərinin məzunları tərəfindən öyrənir. Tədris CDU-da və Qərb ölkələrinin digər aparıcı biznes məktəblərində istifadə edilən və öz sahələrində dünya şöhrətli müəlliflərin yazdıqları dərsliklər və köməkçi ədəbiyyat əsasında həyata keçirilir. Biznes Məktəbi ABŞ-ın aparıcı dərslik nəşri şirkətlərindən Pearson ilə əməkdaşlıq edir və nəticədə ən yeni dərsliklər və tədris materiallarını əldə edir ki, bu da tədrisin keyfiyyətinə öz müsbət təsirini göstərir[28].

Qrup ölçülərinin kiçik olması (10-18 nəfər) təhsilin keyfiyyətini yüksəkdə tutmağa imkan verir. Müəssisə və firmaların fəaliyyətində üzləşdikləri problemlərin həlli yollarının tapılması istiqamətində bilik və bacarıqların inkişaf etdirilməsinə yönələn tapşırıqlar-situasiyaların analizinə hesablanan keyslər müasir biznes təhsilinin əsasını təşkil edir. Bu formatlı təhsil modeli təkcə biliklərin çatdırılması ilə məhdudlaşmır, tələbənin vərdiş və bacarıqlarının hərtərəfli inkişafı üçün effektiv yollar axtarır[29].

Biznes Məktəbinin daha bir özəlliyi kurikulumun inkişafı və tətbiqinin proqram yanaşması üzərindən həyata keçirilməsidir. Yəni, kurikulum elə hazırlanıb ki, tələbəni 4 il ərzində addım-addım, orta məktəb məzunundan biznes peşəkarına çevirir. Bu zaman fənlərin ardıcıllığı və hər bir fənnin məzmunu daim dəyişən biznes ehtiyaclarına davamlı olaraq uyğunlaşdırılmaqla təkmilləşdirilir. Nəticədə, tələbə artıq üçüncü tədris ilində aparıcı müəssisələrdə yaxşı iş tapa bilir. Bu məqsədlə III və IV tədris ilində dərslər axşam saatlarında-iş saatından sonra keçirilir ki, tələbə istəyinə uyğun yerlərdə təcrübə və iş praktikası qazana bilsin[30].

BBA proqramı üzrə dərs deyən müəllimlər iş təcrübəsi ilə sıx bağlıdırlar və biznes strukturlarında yüksək karyeraya sahibdirlər. Proqram, biznes sahəsində ən yüksək mövqe tutmaq istəyənlər üçün tərtib olunub və təhsil alanların ən praktik biliklərə yiyələnməsini və biznes karyeralarında sürətlə irəliləmənin təmin edilməsini nəzərdə tutur[31].

Tətbiqi nəzərdə tutulan daha bir yenilik, tələbənin digər ixtisasın da fənlərini (əlavə 4-9 fənn) götürməklə, ikinci ixtisas qazanması şansıdır[32].

MBA proqramlarında tədris[redaktə]

Magistratura pilləsində azərbaycandilli tədrisə pilot səviyyəsində ötən tədris ilindən start verilmiş və uğurlu nəticələr əldə edilmişdir[33].

2014/2015-ci tədris ilindən etibarən isə Azərbaycan Universitetinin tələbəsi olmayan biznes nümayəndələri “sərbəst iştirakçı” qismində MBA ixtisaslarında tədris olunan fənləri öyrənə biləcək. Bu statusda olan şəxslər hər bir fənnə görə 200 AZN ödəməklə,dərslərdə tam semestr boyu iştirak edə biləcək. İmtahanlarda uğurlu nəticə əldə edən sərbəst iştirakçı AU sertifikatı ilə yanaşı, gələcəkdə AU və onun tərəfdaş universitetlərinə köçürülə biləcək magistr kreditləri də əldə edəcək[34].

İsveçin Lund Universiteti ilə birgə “Linnaeus-Palme” layihəsi[redaktə]

Azərbaycanda Sosial işin tədrisinə başlayan ilk özəl universitet kimi Azərbaycan Universiteti bu ixtisas üzrə kadr hazırlığını beynəlxalq proqram əsasında aparmaq məqsədi ilə İsveç Krallığının Lund Universiteti ilə 2010-cu ildə əməkdaşlıq müqaviləsi imzalamışdır. Hazırda Lund Universiteti ilə “Linnaeus-Palme” layihəsi çərçivəsində əməkdaşlıq davam edir. Azərbaycan Universitetinin tərəfdaş olduğu 9 illik layihə çərçivəsində tələbələr tam pulsuz mübadilə şəklində İsveçdə təhsil ala bilirlər. Layihədə müəllim-tələbə və təcrübə mübadiləsi, kurikulumun inkişafı, Azərbaycan Universitetinin dərslik təminatına dəstək, beynəlxalq təhsil layihələrində müştərək iştirak, Lund Universitetində ixtisasartırma keçmək nəzərdə tutulur. Eyni zamanda Lund Universitetinin tələbələrinin Azərbaycanda, Azərbaycan Universiteti tələbələrinin İsveçdə araşdırmalar aparması planlaşdırılır[35].

Türkiyə universitetləri ilə “Mövlanə Mübadilə Proqramı”çərçivəsində əməkdaşlıq[redaktə]

Azərbaycan Universiteti 2014-2015-ci tədris ilində “Mövlanə Mübadilə Proqramı” çərçivəsində professor-müəllim və tələbə mübadiləsi üçün sənəd qəbulu elan etmişdir. Mübadilə proqramı ilə bağlı əlaqələndiricilik məsələləri Beynəlxalq Əlaqələr Şöbəsi tərəfindən icra olunur.

Türkiyə Respublikasının Gazi, Hacettepe, Kocaeli, Anadolu, Selçuk, Gaziantep, Gazi Osman Paşa, İnönü və Mehmet Akif Ersoy universitetləri ilə əməkdaşlıq müqavilələri imzalanmışdır. Türkiyədə fəaliyyət göstərən bir çok universitetlə yeni tərəfdaşlıq müqavilələrinin imzalanması nəzərdə tutulur.

Azərbaycan Universitetinin tələbələri növbəti tədris ilindən etibarən minimum bir, maksimum isə iki semestr tərəfdaş universitetlərdə təhsil ala biləcəklər. Proqrama müraciət edə bilmək üçün tələbələrin 4 ballıq GPA üzrə orta balı ən azı 2,5 olmalıdır. Tələbələr təhsil aldığı universitetdə ödəməli olduğu təhsil haqqından başqa hərhansı bir ödəniş etməyəcək, eyni zamanda 560 TL miqdarında təqaüd alacaqlar.

Akademik heyət isə minimum bir həftədən maksimum 3 aya qədər tərəfdaş universitetlərdə tədris prose­sində iştirak edə, mühazirə oxuya və müxtəlif birgə tədqiqatlarda iştirak edə bilərlər[36].

Karyera mərkəzi və məzunlarla iş şöbəsi[redaktə]

"Siğorta və siğorta mədəniyyəti" təlimində iştirak edənlər sertifikatlarını aldılar

Karyera mərkəzi Azərbaycan Universitetində təhsil alan yuxarı kurs tələbələrinin karyeralarının planlaşdırılmasına məsləhət xidməti və istiqamət verərək, onları iş dünyasına hazırlayır. Mərkəz tələbə və magistrantlara karyera planlaşdırılması prosesində köməkçi olmaq məqsədiylə müxtəlif kurs və təlimlər təşkil edir, iş imkanlarının araşdırılması ilə bağlı mütəxəssislərlə görüşlər keçirir[37].

Təlimlər[redaktə]

- Ərizə formaları, CV-lər, motivasiya məktublarının hazırlanması

- Beynəlxalq proqram və təqaüdlər haqqında məlumat

- Kollektiv iş metodları

- İdarəetmə psixologiyası

- Şirkət mədəniyyəti və iş etikası

- Vaxtın idarə edilməsi

- İşə qəbul və müsahibə qaydaları [38]

Məzunlarla əlaqə[redaktə]

Azərbaycan Universitetinin məzunları iş dünyasının hər sferasında, dövlət qulluğunda, diplomatik nümayəndəliklərdə, məhkəmə və vergi orqanlarında, mediada, təhsil müəssisələrində işləyir, böyük uğurlara imza atırlar. Məzunlar hər zaman diqqət mərkəzində saxlanılır, Tələbə şöbəsinin təşkilatçılığı ilə hazırda təhsil alan tələbələrin onların təcrübəsindən faydalanması üçün ənənəvi məzun görüşləri keçirilir[39].

Azərbaycan Universitetinin məşhur məzunları[redaktə]

  1. Kəmaləddin Heydərov — Azərbaycan Respublikasının fövqəladə hallar naziri, general-polkovnik, Azərbaycan Taekvondo və Boks federasiyalarının prezidenti, Dünya Taekvondo Federasiyasının vitse-prezidenti, Azərbaycan bəstəkarı. Azərbaycan Universitetində ikinci ali təhsil almışdır.
  2. Bahar Muradova — Azərbaycan Respublikası Milli Məclisinin deputatı, 2005-ci il dekabrın 2-dən Milli Məclis Sədrinin müavini, ATƏT-in Parlament Assambleyasında Azərbaycan nümayəndə heyətinin rəhbəri. Siyasi elmlər üzrə fəlsəfə doktoru. 2000-ci ildə isə Azərbaycan Universitetinin hüquq fakültəsini bitirmişdir.
  3. Ceyhun Bayramov — Azərbaycan Respublikası Təhsil nazirinin müavini. Azərbaycan Universitetini hüquqşünaslıq ixtisası üzrə bitirmişdir.
  4. Fərhad Hacıyev — Azərbaycan Respublikasının Prezidenti yanında Gənclər Fondunun icraçı direktoru
  5. Cəsarət Valehov — Filologiya elmləri namizədi, kino və veriliş redaktoru, Təhsil Nazirliyinin informasiya şöbəsinin müdir müavini, qeyri-hökumət təşkilatları və kütləvi informasiya vasitələrilə iş sektorunun müdiri. 2003-cü ildə Beynəlxalq münasibətlər fakültəsi üzrə magistratura proqramını fərqlənmə diplomu ilə bitirmişdir.
  6. Siyavuş Əlizadə — Qala Dövlət tarix-etnoqrafiya qoruğunun əməkdaşı, diyarşünas.

Tələbə həyatı[redaktə]

Azərbaycan Universiteti Tələbə Gənclər Təşkilatı [40][redaktə]

Azərbaycan Universiteti Tələbə Gənclər Təşkilatı "Yaxşıların yaxşısı-2013" mükafatına layiq görülmüşdür

2006-cı ildə təsis edilən Azərbaycan Universiteti Tələbə Gənclər Təşkilatı (AU TGT), ümumi maraqlar və könüllülük prinsipi əsasında birləşən tələbələrin ictimai həyatda fəal iştirakını təmin edir. Təşkilatın əsas məqsədi dövlət gənclər siyasətinin həyata keçirilməsi istiqamətində tələbələrin və ayrı-ayrılıqda hər bir tələbənin maraqlarını təmsil və müdafiə etmək, respublikanın ictimai, mədəni, sosial, iqtisadi həyatında onların fəal iştirakını təmin etməkdir.

Təşkilatın əsas vəzifələri; Tələbələrin sosial problemlərinin həlli istiqamətində iş aparılması; Tələbələr arasında maarifləndirmə işinin aparılması; Tələbələrin asudə vaxtının səmərəli təşkil edil məsi; Tələbələrin hüquqlarının təmin edilməsi; Respublikanın daxilində və xaricində keçirilən müsabiqələrdə, olimpiadalarda, sərgilərdə istedadlı və yaradıcı tələbələrin iştirakının təmin edilməsi; Tələbələr arasında narkomaniya,alkoqolizm, cinayətkarlıq və s. kimi digər neqativ meyillərə qarşı profilaktik tədbirlərin həyata keçirilməsi; Tələbələrin iştirakı ilə müsabiqələrin, seminarların, festivalların, forumların, toplantıların, sərgilərin, aksiyaların, dəyirmi masaların, elmi konfransların, təlim kurslarının, kütləvi təbliğat kampaniyalarının, diskussiya klublarının, müzakirələrin, simpoziumların, görkəmli şəxslərlə görüşlərin təşkil edilməsidir.

Azərbaycan Universiteti Tələbə Gənclər Təşkilatı (AU TGT) Bakı Şəhər Gənclər və İdman Baş İdarəsinin cari ilin yekunlarına dair təsis etdiyi "Yaxşıların yaxşısı-2013" mükafatının təqdimatı mərasimində ilin ən yaxşı “Tələbə Gənclər Təşkilatı” seçilmişdir.

Azərbaycan Universiteti Tələbə Gənclər Təşkilatının sədri Nəsimi Musayevdir. Nəsimi Musayev İqtisadiyyat və idarəetmə fakültəsində Mühasibat uçotu və audit ixtisası üzrə III kurs tələbəsidir.

Azərbaycan Universiteti Gənc İstedadlar Birliyi[redaktə]

"İntellektini göstər" turnirindən

Azərbaycan Universiteti Gənc İstedadlar Birliyi (AUGİB) 2013-cü ilin oktyabr ayında fəaliyyətə başlamışdır. Birliyin məqsədi istedadlı və bacarıqlı tələbələrin üzə çıxarılması, onların dünyagörüşünün hərtərəfli inkişafına dəstək olmaqdan ibarətdir. “Özünü, sözünü önəmsəyən gənclərin birliyi - Gənc İstedadlar Birliyi” şüarı ilə fəaliyyət göstərən AUGİB, bakalavriat və magistratura pillələrində bütün ixtisaslar üzrə təhsil alan tələbələri birləşdirir. Mədəniyyətdən biznesə, səhiyyədən mediaya, idmandan ekologiyaya qədər müxtəlif sahələri əhatə edən maarifləndirmə xarakterli layihə və təlimlər həyata keçirən birlik, universitet daxilində fəaliyyət göstərən tələbə birlikləri, ölkədə fəaliyyət göstərən universitet və qurumlarla sıx əməkdaşlıq edir.

Azərbaycan Universiteti Gənc İstedadlar Birliyinin sədri Hüseyn Kərimovdur. Hüseyn Kərimov İqtisadiyyat və idarəetmə fakültəsində İqtisadiyyat ixtisası üzrə II kurs tələbəsidir.

Azərbaycan Universiteti Media Klubu[redaktə]

"Gənclər Günü"ndə Universiteti tələbələr idarə edir 2014-cü ilin "Varis"ləri

Azərbaycan Universiteti Media Klubu 2013-cü ilin oktyabrında fəaliyyətə başlamışdır[41]. Klubun fəaliyyət istiqamətləri universitetdə tələbə mediasının formalaşdırılması,Universitetin qəzeti və veb saytı üçün layihələr hazırlanması, klub üzvlərinə informasiyanın peşəkar şəkildə toplanması və işlənməsi, foto və video bacarıqlarının qazandırılması istqamətlərində təlim və master-klassların təşkili, müxtəlif səpkili debat, konfrans, seminar, dəyirmi masa və müzakirələrin, o cümlədən filmlərin nümayişinin, müsabiqələrin, gəzintilərin təşkili, Azərbaycan və Dağlıq Qarabağ ilə bağlı həqiqətlərin sənədlərlə, fotoşəkillərlə, videomateriallarla tələbələrin və dünya ictimaiyyətinin diqqətinə çatdırılması olaraq müəyyənləşdirilmişdir.

Media Klubunun təşkilatçılığı ilə 2 fevral Azərbaycan Gənclər Günündə universitetdə rəhbər vəzifələri tələbələr icra edirlər. "Varis Günü" adı altında həyata keçirilən layihənin məqsədi tələbələrdə idarəçilik ənənələrinin formalaşdırılmasıdır[42].

Azərbaycan Universiteti Media Klubunun sədri Ülfanə Cəfərzadədir. Ülfanə Cəfərzadə Humanitar fənlər fakülətsi Jurnalistika ixtisası üzrə IV kurs tələbəsidir.

Azərbaycan Universiteti Debat Klubu [43][redaktə]

Azərbaycan Universiteti Daxili Debat turnirindən

Azərbaycan Universiteti Debat Klubu universitet daxilində müxtəlif debatlar və debat təlimləri təşkil edir. Təlimlərdə iştirak edən tələbələr auditoriya qarşısında sərbəst çıxış etmək, natiqlik bacarıqlarını inkişaf etdirmək, özünü komanda işində (Team work) sınamaq, qarşısındakını inandırmaq, komplekslərdən azad olmaq, rasional qərar qəbul etmə metodlarını öyrənmək, araşdırmaq qabiliyyətini inkişaf etdirmək, yeni dostlar qazanmaq kimi bacarıq və vərdişlərə sahib olurlar.

Kluba Tarix müəllimliyi ixtisası üzrə təhsil alan III kurs tələbəsi Sənan Hümbətov sədrlik edir.

Azərbaycan Universiteti “Enactus" Klubu[redaktə]

"Enactus" Klubunun üzvləri milli yarışda

Azərbaycan Universitetində “Enactus" Klubu 2014-cü ilin aprel ayında fəaliyyətə başlamışdır.

Kluba İngilis dili mü əllimliyi ixtisası üzrə təhsil alan IV kurs tələ bəsi Ədalət Hacıyev rəhbərlik edir.

39 ölkədən olan 57 min tələbə və 1600-dən artıq komandanın qatıldığı “Enactus” (Enterpreunial. Action. Us.) proqramı Azərbaycanda 2006-cı ildən etibarən fəaliyyət göstərir.

Proqram çərçivəsində tələbələrin yaratdıqları komandalar öz fikir və ideyalarını işgüzar mühitlə bölüşürlər və bu layihələr insanların həyat standartlarının keyfiyyətinin yüksəldilməsi məqsədi daşıyır.

Bu layihələrdə tələbələr bazar iqtisadiyyatı, liderlik xüsusiyyətləri, maliyyə uğuru ilə biznes etikası kimi öz lərinə, cəmiyyətə və ölkələrinə fayda verən nəzəriyyələri öyrənir və öz təcrübələrini bölüşürlər.

Azərbaycan Universitetinin korpusları[redaktə]

I korpus[redaktə]

Yasamal rayonu, General Akim Abbasov pr. (keçmiş Kiyev)-84, Bakı, Azərbaycan

II korpus[redaktə]

Nəsimi rayonu, Seyid Cəfər Pişəvəri-36, Bakı, Azərbaycan

İstinadlar[redaktə]

  1. http://www.edu.gov.az/view.php?lang=az&menu=339&id=613
  2. http://au.edu.az/az/aboutus/17
  3. https://az.wikipedia.org/wiki/Eldar_Q%C9%99hr%C9%99manov
  4. http://au.edu.az/az/international/151
  5. http://au.edu.az/az/international/153
  6. http://au.edu.az/az/international/152
  7. http://au.edu.az/az/aboutus/15
  8. http://au.edu.az/az/aboutus/21
  9. http://www.felsefedunyasi.org/site/?name=content&link=3&cont=5&dil=az
  10. http://ensiklopediya.az/?m=yazar&id=12
  11. http://binegedi-ih.gov.az/page/112.html
  12. http://virtualaz.org/medeniyyet/16914
  13. http://au.edu.az/az/aboutus/116
  14. http://au.edu.az/az/aboutus/15
  15. http://au.edu.az/az/aboutus/15
  16. http://au.edu.az/az/entry/83
  17. http://au.edu.az/az/entry/83
  18. http://au.edu.az/az/international/149
  19. http://www.muallim.edu.az/arxiv/2011/38/13.htm
  20. http://www.muallim.edu.az/arxiv/2011/39/10.htm
  21. http://az.apa.az/news/236263
  22. Azərbaycan Universiteti qəzeti, May-iyun 2014, No:3 (38), səh. 4
  23. Azərbaycan Universiteti qəzeti, May-iyun 2014, No:3 (38), səh. 4
  24. Azərbaycan Universiteti qəzeti, May-iyun 2014, No:3 (38), səh. 4
  25. Azərbaycan Universiteti qəzeti, May-iyun 2014, No:3 (38), səh. 4
  26. Azərbaycan Universiteti qəzeti, May-iyun 2014, No:3 (38), səh. 4
  27. Azərbaycan Universiteti qəzeti, May-iyun 2014, No:3 (38), səh. 4
  28. Azərbaycan Universiteti qəzeti, May-iyun 2014, No:3 (38), səh. 4
  29. Azərbaycan Universiteti qəzeti, May-iyun 2014, No:3 (38), səh. 4
  30. Azərbaycan Universiteti qəzeti, May-iyun 2014, No:3 (38), səh. 4
  31. Azərbaycan Universiteti qəzeti, May-iyun 2014, No:3 (38), səh. 4
  32. Azərbaycan Universiteti qəzeti, May-iyun 2014, No:3 (38), səh. 4
  33. Azərbaycan Universiteti qəzeti, May-iyun 2014, No:3 (38), səh. 4
  34. Azərbaycan Universiteti qəzeti, May-iyun 2014, No:3 (38), səh. 4
  35. http://au.edu.az/az/international/153
  36. http://azertag.com/node/1205635
  37. http://au.edu.az/az/cariercenter/96
  38. http://au.edu.az/az/cariercenter/97
  39. http://au.edu.az/az/cariercenter/99
  40. http://au.edu.az/az/studentlife/92
  41. "Azərbaycan Universitetində media klubu fəaliyyətə başlamışdır" (az). AzərTAc. azertag.com. 18.10.2013 [12:30]. http://www.azertag.com/node/1148461. İstifadə tarixi: 2014-06-22. 
  42. http://www.azertag.com/node/1188215
  43. http://au.edu.az/az/studentlife/93

Həmçinin bax[redaktə]

Xarici keçidlər[redaktə]