Həmid Abbasbəyli

Həmid Abbasbəyli
Şəxsi məlumatlar
Doğum tarixi	17 noyabr 1991
Doğum yeri	Bakı, Azərbaycan
Vəfat tarixi	20 oktyabr 2020 (28 yaşında)
Vəfat yeri	Laçın rayonu, Azərbaycan
Dəfn yeri	II Fəxri Xiyaban
Vətəndaşlığı	Azərbaycan
Atası	Cavanşir Abbasov
Anası	Gülnarə Məmmədova
Təhsili	Heydər Əliyev adına Azərbaycan Ali Hərbi Məktəbi
Hərbi fəaliyyəti
Mənsubiyyəti	Azərbaycan Ordusu
Qoşun növü	Xüsusi Təyinatlı Qüvvələr
Xidmət illəri	2006—2020
Rütbəsi	Baş leytenant
Vəzifəsi	Taqım komandiri
Döyüşlər	Aprel döyüşləri Vətən müharibəsi
Təltifləri

Həmid Cavanşir oğlu Abbasbəyli (17 noyabr 1991, Bakı — 20 oktyabr 2020, Laçın) — Azərbaycan Silahlı Qüvvələrinin baş leytenantı, Vətən müharibəsinin şəhidi.

Həyatı

Abbasbəyli Həmid Cavanşir oğlu 17 noyabr 1991-ci ildə Bakı şəhərində ziyalı ailəsində anadan olmuşdur. İlk təhsilini Binəqədi rayonu Famil İsgəndərov adına 157 nömrəli tam orta məktəbdə almış və müəllimləri tərəfindən çalışqan bir şagird kimi xarakterizə olunmuşdur. Orta təhsilini uğurla bitirən Həmid təhsilini Cəmşid Naxçıvanski adına Hərbi Liseydə davam etdirmişdir. Liseyi müvəffəqiyyətlə başa vurduqdan sonra isə Heydər Əliyev adına Azərbaycan Ali Hərbi Məktəbində ali təhsil almışdır. 4 xarici dil biliyinə malik idi. İdmana xüsusi marağı olan Abbasbəyli Həmid dəfələrlə bir sıra medallarla təltif olunmuşdur.

Hərbi xidməti

Erkən fəaliyyəti

Baş leytenant Abbasbəyli ali təhsilini başa vurduqdan sonra cəbhə bölgəsində Milli qəhrəman Mübariz İbrahimovun adını daşıyan bölükdə taqım komandiri vəzifəsində xidmət etmiş və Aprel döyüşlərinin iştirakçısı olmuşdur. Ardınca, Xüsusi Təyinatlı Qüvvələr nəzdnində baş leytenant rütbəsində fəaliyyətini davam etdirmişdir. Bu dövrdə Türkiyə və Çində xüsusi təlimlərdə iştirak etmiş və həmin təlimləri birinciliklə başa vurmuşdur.

Azərbaycan Respublikası Silahlı Qüvvələrinin yaradılmasının 100 illik yubileyi münasibətilə iyunun 26-da Bakının Azadlıq meydanında təntənəli hərbi paradda Xüsüsi Təyinatlı Qüvvələrin tərkibində çıxış etmişdir. 2020-ci ilin iyun ayının 24-də Moskva şəhərində Qırmızı meydanda keçirilən Böyük Vətən Müharibəsində Qələbənin 75-ci illiyinə həsr edilmiş irimiqyaslı paradda 75 hərbçi ilə Azərbaycan Ordusunu təmsil etmiş və “Böyük Vətən müharibəsində Qələbənin 75 illiyi (1945–2020)” medalı ilə təltif edilmişdir.

İkinci Qarabağ Müharibəsində iştirakı

Həmid Abbasbəyli 27 sentyabr 2020-ci ildən etibarən İkinci Qarabağ müharibəsində iştirak etmişdir. Döyüşlər zamanı minaya düşərək ayağından yaralanmış, lakin ilkin tibbi yardımdan sonra döyüşə davam etmişdir. Füzuli, Cəbrayıl, Zəngilan şəhərlərinin, Hadrut qəsəbəsinin, Ərgünəş və Laçın dəhlizinə nəzarət edən yüksəkliklərin işğaldan azad olunmasında fəal iştirak etmişdir. Abbasbəyli Həmid oktyabrın 19-dan 20-nə keçən gecə Laçın döyüşləri zamanı şəhid olub.

Dəfni

Şəhidin nəşi 24 oktyabr tarixində əvvəlcə Xətai rayonuna gətirilmiş və burada böyük izdihamla qarşılanmışdır. Valideynləri ilə vidalaşdıqdan sonra avtomobil karvanının müşayiəti ilə İkinci Fəxri Xiyabana gətirilmiş və yaylım atəşinin ardınca Xətai Rayonu icra hakimiyyətinin, Xüsusi Təyinatlı Qüvvələrin və Müdafiə Nazirliyinin nümayəndələrinin iştirakı ilə torpağa tapşırılmışdır.

"Tabutunu evə gətirəndə mən oğlumu təbrik etdim. Dedim, oğul, Şəhid adın mübarək. Arzuna çatdın!" Şəhidin anası

Təltifləri

• (26.06.2018) — "Azərbaycan Ordusunun 100 illiyi" yubiley medalı — Azərbaycan Silahlı Qüvvələrində 100 illiyinə görə Azərbaycan Prezidentinin adından Müdafiə nazirinin əmri ilə təltif edilmişdir.
• (19.10.2019) — "1941-1945-ci illər Böyük Vətən müharibəsində Qələbənin 75 illiyi" yubiley medalı — Rusiya Federasiyası Prezidenti Vladimir Putinin sərəncamı ilə təltif edilmişdir.
• (09.12.2020) — "Qarabağ" ordeni — Azərbaycan Respublikasının Prezidentinin Sərəncamı ilə təltif edilmişdir.
• (15.12.2020) — "Vətən uğrunda" medalı — Azərbaycan Respublikasının Prezidentinin Sərəncamı ilə təltif edilmişdir.
• (24.12.2020) — "Cəbrayılın azad olunmasına görə" medalı — Azərbaycan Respublikasının Prezidentinin Sərəncamı ilə təltif edilmişdir.

Xatirəsi

Xətai Rayonu İcra Hakimiyyəti tərəfindən yaşadığı ərazidə şəhidin adına bulaq tikilmiş, 2021-ci ildə isə yaşadığı binanın önündə xatirə lövhəsi yerləşdirilmişdir.