Azərbaycan Liberal Partiyası

Azərbaycan Liberal Partiyası
Lider	Lalə Şövkət
Qurucu	Lalə Şövkət
Quruluş tarixi	3 iyun 1995
İdeologiya	liberalizm

Azərbaycan Liberal Partiyası — Azərbaycanda mövcud siyasi partiyalardan biri.

Tarixi

Azərbaycan Liberal Partiyası 3 iyun 1995-ci ildə sabiq dövlət katibi professor Lalə Şövkətin rəhbərliyi ilə Bərdə şəhərində təsis konfransında yaradılmışdır. Təsis konfransında partiyanın nizamnaməsi və proqramı qəbul edilmiş, ali orqanları seçilmişdir. Lalə Şövkət ALP-nin sədri seçilmişdir. 14 avqust 1995-ci ildə Azərbaycan Respublikası Ədliyyə Nazirliyinin kollegiyasının qərarı ilə dövlət qeydiyyatına alınmışdır. İdeologiyasının əsasında insan haqlarının müdafiəsi, qanunun aliliyi durur. Proqramının hədəfi insan haqlarının üstünlüyünü təmin edən cəmiyyətin qurulmasıdır. Partiya siyasi sistemdə mərkəz-sağ mövqedədir. Partiyada üzvlərin sayının, 1998-ci ilin məlumatına görə, 58 000 nəfər olduğu bildirilir. Lakin partiya mövcud üzvlərinin sayını dəqiq ifadə etməkdən çəkinir. Partiyanın daimi büdcəsi yoxdur. Partiya 65 şəhər və rayon təşkilatı vasitəsilə yerlərdə fəaliyyətini davam etdirir. Keçirilmiş qurultaylarının sayı 5, qurultayların keçirilmə müddəti 4 ildən bir, qurultayda kvotalar ümumi 300 nəfərdir. Seçkili orqanları sədr, Siyasi Şura, Nəzarət-Təftiş Komissiyası və rayon təşkilatlarıdır. Partiya üzvlərinin 25-30%-ni gənclər, 25%-ni qadınlar təşkil edir. 2008-ci ilin prezident seçkilərində partiya boykot mövqeyində durmuşdur. 2005-ci ilin parlament seçkilərində 70 namizəd irəli sürmüş, bir namizəd parlamentə keçmişdir (Lalə Şövkət). Partiya 2009-cu ildə keçirilən bələdiyyə seçkilərində iştirak etməmişdir. Partiya parlamentdə iştirakdan imtina etdiyindən parlamentə təklif etdiyi layihələr yoxdur. 2013-cü il Azərbaycan Respublikası prezidenti seçkilərində 2013-cü ildə bəzi müxalif Azərbaycan siyasi partiyalar; tərəfindən yaradılmış Milli Şuraya Qatılmış və siyasi qurumun vahid namizədi Cəmil Həsənliyə dəstək verilməsi qərara alınmışdır.

Partiyanın iqtidar-müxalifət dialoquna münasibəti müsbətdir, lakin ilk addımın iqtidar tərəfindən atılması əsas şərt kimi qəbul olunur. Mövcud resursları baxımından partiya zəif maddi-texniki resurslara malikdir. Siyasi sistemin optimallaşdırılmasında partiya dövlət dəstəyinin təmin olunmasını ən yaxşı yol hesab edir.

Bayrağı və emblemi

Partiya bayrağı albalı rəngli fonunda şahə qalxan ağ atın ön hissəsinin şəkilindən ibarətdir. Partiya emblemi ağ fonda açıq göy rəngində stilləşdirilmiş ALP hərflərindən ibarətdir.

Qərargahı

Azərbaycan Liberal Partiyası bu vaxta qədər bir neçə dəfə qərargah dəyişib. Əvvəl Bünyad Sərdarov küçəsində yerləşən partiya sonra Həsənbəy Zərdabi küçəsində yerləşən 3 mərtəbəli şəxsi tikilidə özünə sığınacaq tapdı. Amma 2005-ci ildən bəri partiya qərargahsızdır. Qərargahla təmin olunmaq üçün partiya rəhbərliyi dəfələrlə aidiyyatı qurumlara müraciət etsə də, yer ala bilməyib.

Strukturu

ALP İcraiyyə Komitəsi

1. Elman Məmmədzadə - sədr (1959-cu ildə Sumqayıt şəhərində anadan olmuşdur. Ali təhsillidir, 1996-cı ildən ALP üzvüdür);
2. Niyazi Abbasov - sədr müavini (1965-ci ildə Bakı şəhərində anadan olmuşdur. Ali təhsillidir, 1997-ci ildən ALP üzvüdür);
3. Mahir Yaqubov - sədr müavini (1958-ci ildə Quba rayonunda anadan olmuşdur. Ali təhsillidir, 1998-ci ildən ALP üzvüdür);
4. Yusif Abdullayev - katib (1965-ci ildə Bakı şəhərində anadan olmuşdur. Ali təhsillidir, 2003-cü ildən ALP üzvüdür);
5. Solmaz Əzizova (1963-cü ildə Bakı şəhərində anadan olmuşdur. Ali təhsillidir, 1995-ci ildən ALP üzvüdür);
6. Səfa Quliyev (1950-ci ildə Lənkəran rayonunda anadan olmuşdur. Ali təhsillidir, 1996-cı ildən ALP üzvüdür);
7. Edar Əmrahov (1951-ci ildə İsmayıllı rayonunda anadan olmuşdur. Ali təhsillidir, 2001-ci ildən ALP üzvüdür);
8. Elman Abbasov (1969-cu ildə Qubadlı rayonunda anadan olmuşdur. Ali təhsillidir, 2001-ci ildən ALP üzvüdür);
9. Pərviz Hacıyev (1949-cu ildə Gürcüstan Respublikasının Dmanisi rayonunda anadan olmuşdur. Ali təhsillidir, 2002-ci ildən ALP üzvüdür);
10. İlham Məmmədov (1978-ci ildə Yevlax şəhərində anadan olmuşdur. Ali təhsillidir, 2002-ci ildən ALP üzvüdür);
11. Kəmalə İskəndərova (1966-cı ildə Gəncə şəhərində anadan olmuşdur. Ali təhsillidir, 2003-cü ildən ALP üzvüdür);
12. Fərrux Cəbiyev (1957-ci ildə Ordubad rayonunda anadan olmuşdur. Ali təhsillidir, 2003-cü ildən ALP üzvüdür).

ALP Mərkəzi Nəzarət Təftiş Komissiyası

(17 Fevral 2007 seçilmişdir)

1. İsmayıl Əliəsgərli (sədr);
2. Oqtay Əzimov (sədr müavini);
3. Mustafa Bədəlov;
4. Cənnətgül Ramazanova;
5. Xurşud Abbasova;
6. Məmmədəli Həsənov;
7. İmaməddin Zəkiyev.

Üzvləri və rəhbərləri

1995-ci ildən 2003-cü ilə qədər ALP-nin sədri professor Lalə Şövkət idi. 2003-2010 illərində ALP sədrinin birinci müavini Əvəz Temirxan partiyanın sədr əvəzi kimi fəaliyyət göstərmişdir. 12 sentyabr 2010-cu il tarixində ALP-nin növbəti qurultayında Əvəz Temirxan partiyanın yeni sədri seçilmişdir.

Mənbə

• Tahirə Allahyarova, Fərhad Məmmədov. Azərbaycanda siyasi partiyalar: seçkidən seçkiyə. Azərbaycan Respublikasının Prezidenti yanında Strateji Araşdırmalar Mərkəzi. Bakı: 2010, səh.121-122.