Hökumə Sultanova

Hökumə Sultanova
Azərbaycan SSR Nazirlər Soveti sədrinin müavini 8 may 1954 — 30 avqust 1958
Azərbaycan SSR Nazirlər Soveti yanında İncəsənət İşləri İdarəsinin rəisi 18 noyabr 1947 — 1951
Azərnəşrin direktoru 1941 — 1947
Şəxsi məlumatlar
Doğum tarixi	dekabr 1909
Doğum yeri	Lahıc, Şamaxı qəzası, Bakı quberniyası, Rusiya imperiyası
Vəfat tarixi	noyabr 1981 (71 yaşında)
Vəfat yeri	Bakı, Azərbaycan SSR, SSRİ
Partiya	Sov.İKP
Təltifləri

Hökumə İsmayıl qızı Sultanova (dekabr 1909, Lahıc, Şamaxı qəzası – noyabr 1981, Bakı) — Azərbaycan ictimai-siyasi və dövlət xadimi, Azərbaycan SSR Nazirlər Soveti sədrinin müavini (1954–1960), Azərbaycan Qadınlar Şurasının rəhbəri.

Həyatı

Hökumə İsmayıl qızı Sultanova 1909-cu ildə fəhlə ailəsində anadan olmuşdur. Erkən yaşlarından əmək fəaliyyətinə başlamış, Azərbaycanda sosializm quruculuğundan fəal iştirak etmişdir. 1928–1932-ci illərdə Azərbaycan SSR komsomolu mərkəzi komitəsinin şöbə müdiri işləmiş, sonra isə mərkəzi komitənin katibi olmuşdur. 1930-cu ildən Sov.İKP üzvü olan Hökumə İsmayılova 1936-cı ildə Marksizm-Leninizm İnstitutunu bitirmişdir.

Hökumə Sultanova 1941–1947-ci illərdə Azərnəşrin direktoru vəzifəsində çalışıb. 1947–1951-ci illərdə Azərbaycan SSR Nazirlər Soveti yanında İncəsənət İşləri İdarəsinin rəisi, 1952–1954-cü illərdə Azərbaycan SSR Baş Litoqrafiyasının rəisi, 1954–1958-ci illərdə isə Nazirlər Soveti sədrinin müavini (bu vəzifədə ilk Azərbaycanlı qadındır) vəzifələrində çalışıb.

1960-cı ildən ömrünün sonlarınadək Azərbaycan KP MK yanında Partiya Tarixi İnstitutunda işləyən Hökumə Sultanova Azərbaycan Kommunist Partiyası və respublikada qadın hərəkatı problemlərini tədqiqi ilə məşğul olmuş, bir sıra elmi əsərlər çap etdirmişdir. O, eyni zamanda təşkilatçılıq fəaliyyəti də göstərərək Azərbaycan KP MK yanında Respublika Qadınlar Şurasına rəhbərlik etmiş, "Azərbaycan qadını" redaksiya heyətinin üzvü olmuşdur.

Hökumə Sultanova 1981-ci ildə vəfat etmişdir.

Ailəsi

Hökumə Sultanova inqilabçı Qasım İsmayılovun, Azərbaycan SSR xalq maarifi komissarı Ağa Sultanovun, və Azərbaycanın ilk təyyarəçilərindən olan Yaqub Sultanovun bacısıdır.

Təltif və mükafatları

• "Azərbaycan SSR əməkdar mədəniyyət işçisi" fəxri adı — 21 oktyabr 1967
• "Qırmızı əmək bayrağı" ordeni — 25 fevral 1946
• "Şərəf nişanı" ordeni