Dilsuz Qarayev

Dilsuz Qarayev
Dilsuz Məmmədağa oğlu Qarayev
Şəxsi məlumatlar
Doğum tarixi	23 dekabr 1990
Doğum yeri	Hindarx, Ağcabədi rayonu, Azərbaycan SSR, SSRİ
Vəfat tarixi	3 aprel 2016 (25 yaşında)
Vəfat yeri	Talış, Tərtər rayonu, Azərbaycan
Vəfat səbəbi	Şəhid olmuşdur
Dəfn yeri	Ağcabədi rayonu
Vətəndaşlığı	Azərbaycan
Həyat yoldaşı	Röya Qarayeva
Atası	Məmmədağa Qarayev
Anası	Cəvahir Qarayeva
Hərbi fəaliyyəti
Mənsubiyyəti	Azərbaycan Silahlı Qüvvələri
Qoşun növü	Xüsusi Təyinatlı Qüvvələr
Xidmət illəri	2009—2016
Rütbə	Gizir
Döyüşlər	Aprel döyüşləri
Təltifləri

Dilsuz Məmmədağa oğlu Qarayev (23 dekabr 1990; Hindarx, Ağcabədi rayonu, Azərbaycan SSR – 3 aprel 2016; Talış, Tərtər rayonu, Azərbaycan) — Azərbaycan Silahlı Qüvvələrinin giziri, Aprel döyüşləri şəhidi.

Həyatı və hərbi xidməti

Dilsuz Qarayev 23 dekabr 1990-cı ildə Ağcabədi rayonunun Hindarx qəsəbəsində anadan olub. Orta məktəbi bitirdikdən sonra hərbi xidmətə yollanmışdır. Gədəbəydə yerləşən "N" saylı hərbi hissədə xidmət etmişdir. 6 ay xidmət keçdikdən sonra gizir məktəbinə göndərilməsi üçün komandanlığa müraciət etmişdir. Gizir məktəbinə bitirdikdən sonra Xüsusi Təyinatlı Qüvvələrin giziri olmuşdur. Paytaxtda xidmət edən Dilsuz Qarayev ön xəttdə xidmət etmək üçün komandanlığa müraciət edir və o, ön xəttdə yerləşən "N" saylı hərbi hissələrdən birinə göndərilir.

2016-cı il aprelin 1-dən 2-nə ötən gecədən başlayaraq Azərbaycan və Ermənistan Silahlı Qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində şiddətli döyüşlər başladı. Tarixə Aprel döyüşləri olaraq yazılan hərbi əməliyyatlar zamanı Dilsuz Qarayev Tərtər rayonunun Talış kəndi istiqamətində döyüşlərdə kəşfiyyatçı olaraq vuruşdu. Dilsuz Qarayev 3 aprel 2016-cı ildə Talış kəndi istiqamətində gedən döyüşlərdə döyüş tapşırığının yerinə yetirilməsi zamanı şəhid oldu.

Aprelin 4-ü isə Dilsuz Qarayev doğulduğu Ağcabədi rayonunun Hindarx qəsəbəsində son mənzilə yola salındı. Dəfn mərasiminə minlərlə rayon sakini ilə yanaşı, şəhidin qulluq etdiyi hərbi hissənin əsgərləri və zabitləri də qatıldı. Dəfn mərasiminin sonunda yaylım atəşi açıldı və gizir Qarayev uğrunda şəhid olduğu torpağa tapşırıldı.

Dilsuz Qarayev ölümündən sonra göstərdiyi qəhrəmanlığa görə Azərbaycan Respublikasının Prezidenti İlham Əliyevin sərəncamı ilə "Hərbi xidmətdə fərqlənməyə görə" III dərəcəli medalı ilə təltif edildi.

Təltifləri

• (26.06.2013) — "Azərbaycan Silahlı Qüvvələrinin 95 illiyi" yubiley medalı
• (2016) — III dərəcəli "Hərbi xidmətdə fərqlənməyə görə" medalı (ölümündən sonra)