Heydər Əliyev Mükafatı

Vikipediya, açıq ensiklopediya
Keçid et: naviqasiya, axtar

Heydər Əliyev Mükafatı — Azərbaycan Respublikasının Prezidenti İlham Əliyevin 2004-cü il martın 10-da verdiyi fərmanla təsis olunub. 2007-ci il sentyabrın 20-də dövlət başçısı mükafatın əsasnaməsini təsdiqləyib.

Əsasnaməsi[redaktə | əsas redaktə]

Mükafatın 25 bənddən ibarət əsasnaməsində göstərilir ki, Heydər Əliyev Mükafatı ictimai-siyasi, sosial, iqtisadi, elmi-mədəni sahələrdə xüsusi xidmətlərə, dövlət qulluğunda xüsusi xidmətlərə, yüksək peşə ustalığına və ictimai həyatda fəal iştiraka, Azərbaycanın müstəqilliyi və suverenliyinin möhkəmləndirilməsində fərqlənməyə, beynəlxalq münasibətlərdə dostluq və qarşılıqlı əməkdaşlığın inkişaf etdirilməsinə görə verilir.

Mükafat Azərbaycan vətəndaşlarına, həmçinin xarici ölkələrin vətəndaşlarına və vətəndaşlığı olmayan şəxslərə verilə bilər.

Heydər Əliyev Mükafatı üzərində Heydər Əliyevin surəti həkk olunmuş qızıl döş nişanı, diplom və pul mükafatından ibarətdir. Mükafatın məbləği 50 min manatdır. Mükafat dövlət büdcəsinin vəsaiti hesabına Mükafat Komissiyasının təqdimatı ilə Azərbaycan prezidentinin sərəncamına əsasən verilir.

Heydər Əliyev Mükafatına namizədi hər il oktyabr ayının sonunadək Azərbaycanın Prezidenti, Baş Naziri, Milli Məclisinin sədri, Konstitusiya Məhkəməsinin sədri, Milli Elmlər Akademiyasının prezidenti, yaradıcılıq təşkilatları, əvvəllər Heydər Əliyev mükafatına layiq görülmüş şəxslər irəli sürə bilərlər. Mükafatı dövlət başçısı, yaxud onun vəkil etdiyi digər şəxs (şəxslər) təntənəli və aşkarlıq şəraitində təqdim etməlidir.

Heydər Əliyev Mükafatı komissiyasının tərkibi 2007-ci il noyabrın 14-də prezident fərmanı ilə müəyyənləşib. Komissiyanın sədri prezident İlham Əliyevdir.

Əsasnaməyə görə, Heydər Əliyev Mükafatı hər il mayın 10-da – Heydər Əliyevin doğum günündə verilməlidir.

Laureatları[redaktə | əsas redaktə]

Heydər Əliyev mükafatı ilk dəfə 2009-cu ildə təqdim olunub. Əsasnamədə göstərilən məhdudiyyətə baxmayaraq (əsasnaməyə görə, Heydər Əliyev mükafatı hər il yalnız bir nəfərə verilə bilər) 2009-cu ildə mükafatı üç nəfər alıb: heykəltəraş, xalq rəssamı Ömər Eldarov, bəstəkar, xalq artisti Arif Məlikov, Heydər Əliyev Fondunun prezidenti Mehriban Əliyeva.[1]

2011-ci ildə yazıçı Anar Azərbaycan ədəbiyyatının inkişafında xüsusi xidmətlərinə görə bu mükafata layiq görülüb[2]. 2015-ci ildə Tahir Salahov "Azərbaycan mədəniyyətinin inkişafında müstəsna xidmətlərinə və dünya təsviri sənət xəzinəsinə layiqli töhfələrinə görə" bu mükafatı alıb [3].

İstinadlar[redaktə | əsas redaktə]

  1. Heydər Əliyev Mükafatına namizədlərin siyahısı açıqlanıb
  2. Heydər Əliyev mükafatı "Buta"da təqdim olundu
  3. İlham Əliyevdən Tahir Salahovla bağlı- Sərəncam