Gəncəçay
Gəncəçay - Kürün sağ qoludur. Daşkəsən, Xanlar rayonları, Gəncə şəhər Sovetliyi ərazisindən axaraq, Mingəçevir su anbarına tökülür.
[redaktə] Ümumi məlumat
Uzunluğu 99 km, hövzəsinin sahəsi 752 kvadrat km-dir. Murovdağ silsiləsindən (2814 m) başlayan bulaqlar çayın mənbəyini təşkil edir. Yuxarı axımında çaya, sağdan Zivlən (uzunluğu 15 km), soldan isə Dəstəfur (uzunuğu 28 km) və Xaçbulaq(uzunluğu13 km) kimi qollara qarışır. İllik axımının 38%-i qar, 15%-i yağış, 47%-i isə yeraltı sular hesabına yaranır. Orta illik su sərfi 4,0 kub m/san-dir. Çayda yaz daşqını mart ayının axırın-dan başlayıb iyunun əvvəllərinə kimi (110 günə qədər) davam edir. Daşqın vaxtı keçən axım illik axım həcmindən 10-15 dəfə artıqdır. Çayın orta illik su sərfi 4,0 kub m/san-dir. Yaz-yay fəsillərində illik axımının 35-40%-i, payız-qış fəsillərində isə 10-15%-i keçir. İntensiv suvarma dövründə (iyul, avqust aylarında) illik axımının 15%-i axıdılır. Çayda ən az su sərfi iyul-avqust və dekabr-yanvar aylarında olur.
Gəncəçayın orta illik asılı gətirmələr sərfi 0,058 kq/san, orta lillənməsi isə 75 q/kub m-dir. Ən çox lillənmə (250-300 q/kub m) yaz daşqını zamanı müşahidə edilir. Suyu orta minerallaşmaya (150-250 mq/l) malik olmaqla hidrokarbonatlı-kalsiumludur.
Gəncəçaydan suvarmada, energetikada və başqa sahələrdə (dəyirmanların işlədilməsində) geniş istifadə edilir. Zurnabad kəndi qarşısında su anbarı yaradılmışdır.
