Telman Hüseynov (hərbçi)

Telman Hüseynov
Şəxsi məlumatlar
Doğum tarixi	27 noyabr 1977(1977-11-27) (47 yaş)
Doğum yeri	Stepanakert, DQMV, Azərbaycan SSR, SSRİ
Vətəndaşlığı	Azərbaycan
Hərbi fəaliyyəti
Mənsubiyyəti	Müdafiə Nazirliyi
Qoşun növü	Quru Qoşunları
Hərbi hissə	2-ci Ordu Korpusu (—2021) 5-ci Ordu Korpusu (2021—)
Rütbəsi	Polkovnik
Döyüşlər	• Qarabağ müharibəsi (2020) Füzulinin azad edilməsi Cəbrayılın azad edilməsi Xocavəndin azad edilməsi Qubadlının azad edilməsi Şuşanın azad edilməsi Ağdamın azad edilməsi  • Sentyabr döyüşləri  • Antiterror əməliyyatı (sentyabr, 2023)
Təltifləri
Vikianbarda əlaqəli mediafayllar

Telman Əsgər oğlu Hüseynov (27 noyabr 1977, Stepanakert) — Azərbaycan Silahlı Qüvvələrinin polkovniki. İkinci Qarabağ müharibəsinin iştirakçısı, Vətən Müharibəsi Qəhrəmanı, Əlahiddə Ümumqoşun Ordu komandanının müavini.

Haqqında

Hüseynov Telman 1977-ci il noyabrın 27-də Xankəndi şəhərində anadan olub, əslən Füzuli rayonunun Dilağarda kəndindəndir. O, 1984–1992-ci illərdə Füzuli rayonu Dilağarda kənd orta məktəbində təhsil almış, daha sonra 1992–1995-ci illərdə təhsilini Cəmşid Naxçıvanski adına İbtidai Hərbi Məktəbdə davam etdirmişdir. 1995-ci ildə Bakı Ali Birləşmiş Komandanlıq Məktəbinə qəbul olub və 1999-cu ildə həmin məktəbi bitirib, 2017–2019-cu illərdə isə Azərbaycan Respublikası Silahlı Qüvvələrinin Hərbi Akademiyasında təhsil alıb. O, taqım komandiri, kəşfiyyat bölük komandiri, kəşfiyyat rəisinin köməkçisi, briqadanın kəşfiyyat rəisi, qərargah rəisi-hərbi hissə komandirinin müavini, hərbi hissə komandiri, Ordu Korpusunun kəşfiyyat rəisi və Ordu Korpusu komandirinin müavini vəzifələrində xidmət göstərmişdir.

2020-ci ildə, İkinci Qarabağ müharibəsində polkovnik Telman Hüseynovun kəşfiyyat şöbəsinin rəisi olduğu 2-ci Ordu Korpusunun kəşfiyyat bölmələri və tabeliyinə verilən digər bölmələr əsas zərbə istiqamətində düşmənin müdafiə səddini yarıb, Ağdam, Xocavənd, Füzuli, Cəbrayıl, Qubadlı, Şuşa şəhərlərinin azad edilməsində şücayəti ilə fərqlənib. 2-ci Ordu Korpusunun kəşfiyyat bölmələri və digər bölmələr əlverişli hüdudda hücum döyüşü ilə düşmənin cəbhə boyu istiqamətində əks zərbəsini müvəffəqiyyətlə dəf edərək, onun manevr edəcək mobil ehtiyatlarını döyüş imkanlarından məhrum edib, çətin keçilən relyefdə hücumu davam etdirərək düşmənin arxasından dərin dövrələmə manevri edərək irəliləyib. Korpusun bölmələri Cəbrayıl, Hadrut, Füzuli, Qubadlının yaşayış məntəqələrinin və ətrafındakı komanda yüksəkliklərinin düşmən işğalından azad edilməsində iştirak edib.

Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 9 dekabr 2020-ci il tarixli Sərəncamına əsasən Telman Hüseynov "Vətən Müharibəsi Qəhrəmanı" adı və "Vətən Müharibəsi Qəhrəmanı" medalı ilə təltif edilib.

O, Azərbaycan Prezidenti İlham Əliyevin 2 fevral 2024-cü il tarixli Sərəncamı ilə Heydər Əliyevin 100 illiyi (1923–2023)" yubiley medalı ilə təltif edilmişdir.

Təltifləri

• (7 noyabr 2023) 3-cü dərəcəli "Vətənə xidmətə görə" ordeni
• (2 fevral 2024) — "Heydər Əliyevin 100 illiyi (1923–2023)" yubiley medalı
• (9 dekabr 2020) — "Vətən Müharibəsi Qəhrəmanı" medalı
• (24 iyun 2010) — "Vətən uğrunda" medalı
• (24 iyun 2016) — "İgidliyə görə" medalı
• (24 dekabr 2020) — "Cəbrayılın azad olunmasına görə" medalı
• (25 dekabr 2020) — "Füzulinin azad olunmasına görə" medalı
• (29 dekabr 2020) — "Qubadlının azad olunmasına görə" medalı
• (29 dekabr 2020) — "Ağdamın azad olunmasına görə" medalı
• (29 dekabr 2020) — Vətən müharibəsi iştirakçısı" medalı
• (24 iyun 2003) — "Hərbi xidmətlərə görə" medalı
• (25 iyun 2023) — "Hərbi xidmətdə fərqlənməyə görə" 3-cü dərəcəli medalı
• (26 iyun 2008) — "Qüsursuz xidmətə görə" 3-cü dərəcəli medalı
• (13 iyun 2011) — "Qüsursuz xidmətə görə" 2-ci dərəcəli medalı
• (26 iyun 2016) — "Qüsursuz xidmətə görə" 1-ci dərəcəli medalı
• (19 aprel 2021) — "Azərbaycan Respublikası Silahlı Qüvvələri Veteranı" medalı
• (25 iyun 2004) — "Azərbaycan Respublikası Silahlı Qüvvələrinin 10 illiyi (1991–2001)" yubiley medalı
• (19 iyul 2008) — "Azərbaycan Respublikası Silahlı Qüvvələrinin 90 illiyi (1918–2008)" yubiley medalı
• (24 iyun 2013) "Azərbaycan Respublikası Silahlı Qüvvələrinin 95 illiyi (1918–2013)" yubiley medalı
• (26 iyun 2018) "Azərbaycan Ordusunun 100 illiyi (1918–2018)" yubiley medalı