Düsseldorf

Düsseldorf Şəhər İcra Hakimiyyəti binasının üstdən görünüşü

Düsseldorf (Düsseldorf ) — Almaniyanın Şimali Reyn-Vestfaliya vilayətinin paytaxtıdır. Düsseldorf şəhərində Rayn çayı axır. Əhalisi 583 829 nəfərdir (2009).

Düsseldorf şəhəri Almaniyanın qərbindəki Reyn-Rur bölgəsində yerləşir. 2009-cu ilin statistikasına görə, 217 kvadrat kilometr sahəsi olan Düsseldorfun əhalisinin sayı 584 min nəfərdir. Düsseldorf şəhər statusunu 1288-ci ildə alıb. Şəhərin adı Düssel çayından götürülüb. Reyn çayının şimalında - Düssel çayının Reyn çayına töküldüyü yerdə yerləşir.

Düsseldorf 49 rayona bölünmüş 10 dairədən ibarətdir və Reyn-Rur bölgəsinin iqtisadi cəhətdən ən inkişaf etmiş şəhəridir. Şəhər reklam, telekommunikasiya texnologiyaları sahəsində aparıcı mərkəz, həmçinin "Almaniyanın modalar şəhəri" hesab olunur. Düsseldorf şəhəri rəssamlıq akademiyaları, muzeyləri və üzərində dünyanın ən böyük elektron saatı asılmış televiziya qülləsi ilə məşhurdur. Müasir incəsənətin ən tanınmış nümayəndələri öz işlərini Düsseldorf Münsterdəki İncəsənət Akademiyasında davam etdirirlər.

Dünya turizm agentlikləri Düsseldorfu "pivə şəhəri" adlandırır. Almanlar özləri isə bu şəhərə "dünyanın ən uzun barı" deyirlər. Çünki şəhərin qədim hissəsində - Altşatadda 250 pivəxana fəaliyyət göstərir.

Düsseldorf əhalisinin yaşayış səviyyəsinə görə dünyada 6-cı, bahalığa görə isə 5-ci yeri tutur. Almaniyada Frankfurtdan sonra ikinci ən böyük bank və birja mərkəzidir.

İdman

"Fortuna Düsseldorf" şəhəri Bundesligada təmsil edən əsas futbol klubudur. "Fortuna" 1997/1998 futbol sezonund ikinci liqaya düşmüşdü. Klubun əsas liqaya dönüşü isə bu sezona, 2012/2013 futbol sezonuna təsadüf edir. Şəhərin müxtəlif yerlərində kluba aid atributları tapmaq mümkündür. "Fortuna"nın oyunları zamanı isə şəhərdə və Fortuna Arenada inanılmaz atmosfer yaranır. Şəhər əhalisinin idmana, xüsusi ilə futbola marağı böyükdür.

Təhsil

Şəhərdə mövcud olan əsas universitet Heinrich Heine universitetidir (alm. Heinrich-Heine-Universität Düsseldorf). Universitet, məşhur alman şair və politoloq Heinrich Heinenin şərəfinə adlandırılıb. Heinrich Heine 1797-ci ildə Düsseldorfda anadan olmuşdur.

1965-ci ildən fəaliyyətə başlayan universitetdə Hüquq, tibb, fəlsəfə, riyaziyyat, iqtisadiyyat fakultələri mövcuddur. Universitetin ərazisi olduqca böyükdür, universitet ərazisində müxtəlif korpuslar mövcuddur. Universitetdə təxminən 18.000 tələbə təhsil almaqdadır.

Avroviziya 2011

"Avroviziya 2011" yarışı Düsseldorf beynəlxalq hava limanından 5 kilometr aralıda yerləşən "Fortuna Arena"da keçirilib. 54 min nəfərdən çox tamaşaçı tutan "Fortuna Arena"da müsabiqə üçün səhnə və texniki avadanlıqlar quraşdırıldıqdan sonra 25 minə yaxın tamaşaçı üçün yer qalıb. Stadiondan qazon yığışdırılıb, oturacaqlar xüsusi döşəmə ilə əvəzlənmişdi.

Qardaş şəhərlər

• , Resinq, İngiltərə, Böyük Britaniya (1988)
• Hayfa, İsrail (1988)
• Çemnitz, Keçmiş ADR, indiki AFR (1988)
• Varşava, Polşa (1989)
• Moskva, Rusiya (1992)
• Çuntsin, Çin (2004)

Mənbə

• "AVROVİZİYA 2011" ŞƏHƏRİ. ONA "PİVƏ ŞƏHƏRİ" DƏ DEYİRLƏR