Süleyman Məlikov

Süleyman Məlikov
Doğum tarixi	21 dekabr 1899(1899-12-21)
Doğum yeri	Bakı, Bakı quberniyası, Rusiya imperiyası
Vəfat tarixi	22 sentyabr 1969(1969-09-22) (69 yaşında)
Vəfat yeri	Bakı, Azərbaycan SSR, SSRİ
Dəfn yeri	İkinci Fəxri xiyabanda dəfn olunanların siyahısı
Fəaliyyəti	jurnalist
Mükafatları

Məlikov Süleyman Dadaş oğlu (21 dekabr 1899 - 22 sentyabr 1969) — jurnalist, tərcüməçi, redaktor. Azərbaycan SSR-nin əməkdar mədəniyyət işçisi (1967), Qızıl Əmək Bayrağı ordeni, ÜİK(b)P üzvü.

Həyatı

Süleyman Dadaş oğlu Məlikov 1899-cu ildə Bakıda anadan olmuşdur. Əslən Pirşağı kəndindən idi. Marksizm-leninizm klassiklərinin əsərlərini Azərbaycan dilinə əsas tərcüməçi və redaktorlarından biri olmuşdur.

Süleyman Məlikovun ən böyük xidmətlərindən biri də lüğət tərtibi sahəsində olmuşdur. Sovet hakimiyyətinin ilk illərində lüğətə böyük ehtiyac olduğu zaman Hənəfi Zeynallı, Yusif Əliyev, Süleyman Musabəyov, Vəli Xuluflu, Tağı Şahbazi Simurğ, Əhməd bəy Pepinov, Ələkbər Heydərli, Yusif Vəzir Çəmənzəminli, Məhərrəm Kamil, Rəşid Yusifzadə, Ələkbər Qərib, Sami Kamal, Xudadat bəy Əzizbəyovla birlikdə Ruhulla Axundovun başçılığı ilə ilk "Rusca-türkcə lüğət"in (1926) tərtibçilərindən biri olmuşdur

1921-1952-ci illərdə "Molla Nəsrəddin" jurnalının məsul katibi, "Şərq qadını", "Maarif və mədəniyyət", "Qızıl qələm" jurnallarının, "Kommunist" və bir sıra digər qəzetlərin redaksiyasında işləmiş, 1952-1969-cu illərdə "Kirpi" jurnalının redaksiya heyətinin üzvü olmuşdur.

1952-1969-cu illərdə Partiya tarixi institutunun "Marksizm-leninizm əsərlərinin tərcümə şöbəsinin" müdiri olmuşdur.

1980-cı illərdə oğlu Oqtay Məlikov həmin şöbəyə rəhbərlik etmişdir.

K.Marksın "Kapital"ının (cild 1-3), K.Marks və F.Engelsin iki cildlik seçilmiş əsərlərinin (1953) əsas tərcüməçi və redaktoru olmuşdur.

"Molla Nəsrəddin"də çalışarkən onun nəşri məsələləri ilə məşğul olmuş, jurnalda publisistik məqalələr dərc etdirmişdir. Süleyman Məlikovun yaradıcılığında ciddi siyasi pafosu, prinsipial tənqidi satirik və yumorlu üslubla birləşdirmişdi. "Qəmişqulu", "Əbülhaq" imzalı yazıları 1924-1925 illərdə "Kommunist" qəzetində və "Molla Nəsrəddin" jurnalında, "Qıraxdanbaxan" imzaları ilə məqalələri 1922 ildə "Zəhmət" qəzetində çıxmışdır. Mətbuatda Məmmədquluzadə haqqında bir neçə məqaləsi, xatirələri çap olunmuşdur. "Cəfər Cabbarlı haqqında xatirələr"ində (B., 1969) yeri gəidikcə "Molla Nəsrəddin" jurnalından da söz açmışdır.

"Kommunist" qəzetin tanınmış əməkdaşlarından biri də müxtəlif vəzifələrdə çalışmış Süleyman Məlikov idi. O, əsasən respublika və qəza mətbuatının durumu haqqında yazır, eləcə də qəzetin xüsusi müxbiri kimi qəzalara yollanaraq oradan partiya-həmkarlar, sosial-məişət və iqtisadi mövzularda məqalələr göndərirdi. Beynəlxalq və partiya mövzularında məqalələrini “Suleyman Məlikov”, “S.Məlikov”, qalan yazılarını isə “Əbu-l-hövl”, “Qəmişqulu”, “Damğa”, “Kənardan baxan”, “D.Oğlu”, “S.M.Oğlu”, “S.Məlikzadə”, “M-zadə”, “M-zadə S.”, “S.” və s. təxəllüsləri ilə çap etdirirdi.

Ailəsi

Oğlu Oqtay Məlikov (1925-2006) tarixçi, tərcüməçi, digər oğlu Eldəniz Məlikov (1927-2009) həkim idi. Qızı Süsən Məlikova (1953) filolog.

Qardaşı - Əjdər Məlikov (1889-1921)—Siyasətçi. “Hümmət” partiyasının yaradıcısı.

Xarici keçidlər

• "Xalq qəzeti" - yaranması, inkişafı tarixindən
• http://www.tarix.gov.az/kitablar/Elmar.pdf?fbclid=IwAR35P7sX8Jn_YPMePWr_zDnMx5NOZarNd8SXRgZwsTUvNJCvYsvIIi5fyr0 səhifə 31-35.
• İsrafil Mirzəhməd oğlu Qurbanov, Azərbaycan Respublikası Prezidentinin İşlər İdarəsi. “Suleymandan galan dunya” https://newspaperarchive.com/baku-kommunist-jan-18-1990-p-4/
• Cəlil Məmmədquluzadə ENSİKLOPEDİYASI http://calilbook.musigi-dunya.az/m/melikov_suleyman.html
• "Kommunist" qəzetin tanınmış əməkdaşl... http://www.anl.az/down/meqale/xalqqazeti/xalqqazeti_aprel2009/88869.htm
• http://www.science.gov.az/news/open/3445