Murad Məmmədov (güləşçi)

Murad Məmmədov
Şəxsi məlumatlar
Tam adı	Murad Səxavət oğlu Məmmədov
Vətəndaşlığı	Azərbaycan
Doğum tarixi	12 avqust 1995(1995-08-12) (28 yaş)
Doğum yeri	Sumqayıt, Azərbaycan
Boyu	167 sm
Çəkisi	59 kq
İdman növü	Yunan-Roma güləşi, güləş
Karyera illəri	2005–h. h.
Məşqçisi	Əbülfət Məmmədov
Medallar Dünya Çempionatı Bürünc 2021 Norveç 60 Kq. Gümüş 2023 Serbiya 63 Kq. Avropa Çempionatı Gümüş 2018 Rusiya 60 Kq. Bürünc 2022 Macarıstan 60 Kq. Qızıl 2024 Rumıniya 63 Kq.

Murad Məmmədov (12 avqust 1995, Sumqayıt) — Azərbaycanı təmsil edən yunan-roma güləşçisi.

Karyerası

Murad Məmmədov 2010-cu ildə Bosniya və Herseqovinanın Sarayevo şəhərində baş tutan yeniyetmələr arasında Avropa Çempionatında bütün rəqibləri üzərində qələbə qazanaraq turnirin qalibi oldu. Bir il sonra, 2011-ci ildə Murad Məmmədov Polşanın Varşava şəhərində baş tutan yeniyetmələr arasında Avropa Çempionatında növbəti dəfə qızıl medalın sahibi oldu. Həmin il Murad Məmmədov həm də Macarıstanda yeniyetmələr arasında Dünya Çempionatını beşinci pillədə başa vurdu. 2012-ci il mövsümündə isə Murad Məmmədov Polşada yeniyetmələr arasında Avropa Çempionatını gümüş medalla başa vursa da, Azərbaycanda yeniyetmələr arasında Dünya Çempionatında bütün rəqibləri üzərində qələbə qazanaraq turnirin qalibi oldu.

2014-cü il mövsümü Murad Məmmədov üçün uğurlu oldu. Murad Məmmədov iyunda Polşanın Katoviçe şəhərində gənclər arasında Avropa Çempionatını və avqustda Xorvatiyanın Zaqreb şəhərində gənclər arasında Dünya Çempionatını qızıl medallarla başa vurdu. 2015-ci ildə Murad Məmmədov yanvarda Fransada Paris Qran-Prisinin bürünc medalına sahib oldu. Mövsümün nüfuzlu turnirlərində isə Murad Məmmədov əvvəl iyunda İstanbul şəhərində gənclər arasında Avropa Çempionatını gümüş medalla başa vurdu, sonra isə avqustda Braziliyada gənclər arasında Dünya Çempionatının qalibi oldu.

Murad Məmmədov 2016-cı ildə Bolqarıstanda U23 Avropa Çempionatını gümüş medalla, KYRM-da isə hərbçilər arasında Dünya Çempionatını bürünc medalla başa vurdu. 2017-ci il ərzində Murad Məmmədov Vəhbi Əmrə Turnirində, İslam Həmrəyliyi Oyunlarında və Hərbçilərin Dünya Çempionatında bürünc medallara sahib oldu, Macarıstanda U23 Avropa Çempionatının isə qalibi oldu.

2018-ci il mövsümündə Murad Məmmədov Kiyev şəhərində Kiyev Turnirinin və Belarusda Oleq Karavayev Turnirinin qalibi oldu, Rusiyada Hərbçilərin Dünya Çempionatını gümüş medalla başa vurdu, həmçinin İstanbul şəhərində U23 Avropa Çempionatını bürünc, Buxarest şəhərində U23 Dünya Çempionatını isə gümüş medalla başa vurdu. 2018-ci ildə Murad Məmmədov həm də Dünya və Avropa Çempionatlarında debüt elədi. Apreldə Rusiyada Avropa Çempionatının gümüş medalına sahib olan Murad Məmmədov debüt Dünya Çempionatında isə uğursuz çıxış elədi və turniri 25-ci pillədə başa vurdu.

2019-cu ilin fevralında İstanbul şəhərində Vəhbi Əmrə beynəlxalq turnirinin qalibi olan Murad Məmmədov mövsümün növbəti turnirlərində uğursuz çıxış elədi. 2020-ci ildə COVID-19 pandemiyası səbəbindən beynəlxalq turnirlər baş tutmadı. 2021-ci ildə Murad Məmmədov yanvarda Fransada Qran-Prinin bürünc medalına sahib oldu, daha sonra isə mart və may aylarında müvafiq olaraq Macarıstanda Avropa Olimpiya Təsnifat Turnirində və Bolqarıstanda Dünya Olimpiya Təsnifat Turnirində çıxış elədi. Olimpiya Təsnifat Turnirlərində uğursuz çıxış edən Murad Məmmədov nəticədə olimpiya lisenziyası əldə edə bilmədi. Həmin il Norveçin Oslo şəhərində baş tutan Dünya Çempionatında isə Murad Məmmədov turnirin bürünc medalına sahib oldu.

2022-ci ildə Murad Məmmədov əvvəl martda Macarıstanın Budapeşt şəhərində baş tutan Avropa Çempionatını bürünc medalla başa vurdu, daha sonra isə İtaliyanın Matteo Pellisone Turnirinin qalibi oldu. Həmin il Murad Məmmədov həm də avqustda Konya şəhərində İslam Həmrəyliyi Oyunlarının gümüş medalına sahib oldu, sentyabrda Belqrad şəhərində isə Dünya Çempionatını beşinci pillədə başa vurdu.

2023-cü ilin sentyabrında Murad Məmmədov Belqrad şəhərində baş tutan Dünya Çempionatının final görüşündə Gürcüstan nümayəndəsi Leri Abuladzeya məğlub olaraq turnirin gümüş medalına sahib oldu.

Nəticələri

Sıra	İl	Yarış	Ev sahibi	Nəticə
1	2010	Yeniyetmələrin Avropa Çempionatı	Bosniya və Herseqovina	1.
2	2011	Yeniyetmələrin Avropa Çempionatı	Polşa	1.
3		Yeniyetmələrin Dünya Çempionatı	Macarıstan	5.
4	2012	Yeniyetmələrin Avropa Çempionatı	Polşa	2.
5		Yeniyetmələrin Dünya Çempionatı	Azərbaycan	1.
6	2014	Gənclərin Avropa Çempionatı	Polşa	1.
7		Gənclərin Dünya Çempionatı	Xorvatiya	1.
8	2015	Paris Qran-Prisi	Fransa	3.
9		V. Əmrə Turniri	Türkiyə	10.
10		Gənclərin Avropa Çempionatı	Türkiyə	2.
11		Gənclərin Dünya Çempionatı	Braziliya	1.
12		Qızıl Qran-Pri	Azərbaycan	15.
13	2016	U23 Avropa Çempionatı	Bolqarıstan	2.
15		Hərbçilərin Dünya Çempionatı	KYRM	3.
16		Qızıl Qran-Pri	Azərbaycan	8.
17	2017	V. Əmrə Turniri	Türkiyə	3.
18		U23 Avropa Çempionatı	Macarıstan	1.
19		İslam Həmrəyliyi Oyunları	Azərbaycan	3.
20		Hərbçilərin Dünya Çempionatı	Litva	3.
21	2018	Kiyev Turniri	Ukrayna	1.
22		Avropa Çempionatı	Rusiya	2.
23		Hərbçilərin Dünya Çempionatı	Rusiya	2.
24		U23 Avropa Çempionatı	Türkiyə	3.
25		Vəhbi Əmrə Turniri	Türkiyə	10.
26		Oleq Karavayev Turniri	Belarus	1.
27		Dünya Çempionatı	Macarıstan	25.
28		U23 Dünya Çempionatı	Rumıniya	2.

Sıra	İl	Yarış	Ev sahibi	Nəticə
29	2019	V. Əmrə Turniri	Türkiyə	1.
30		Macarıstan Qran-Prisi	Macarıstan	15.
31		Avropa Çempionatı	Rumıniya	8.
32	2021	Fransa Qran-Prisi	Fransa	2.
33		Avropa Olimpiya Təsnifat Turniri	Macarıstan	5.
34		Dünya Olimpiya Təsnifat Turniri	Bolqarıstan	6.
35		Dünya Çempionatı	Norveç	3.
36	2022	Avropa Çempionatı	Macarıstan	3.
37		Matteo Pellisone Turniri	İtaliya	1.
38		İslam Həmrəyliyi Oyunları	Türkiyə	2.
39		Dünya Çempionatı	Serbiya	5.
40	2023	Zagreb Open	Xorvatiya	12.
41		Dünya Çempionatı	Serbiya	2.