Elçin Əliyev (güləşçi)

Elçin Əliyev
Şəxsi məlumatlar
Tam adı	Elçin Əliyev
Vətəndaşlığı	Azərbaycan → Türkiyə
Doğum tarixi	26 aprel 1990
Doğum yeri	Azərbaycan
Boyu	160 sm. (5 ft 6 in)
İdman növü	Güləş
Karyera illəri	2001—2021
Məşqçisi	Əbülət Məmmədov
Medallar Azərbaycan üçün Avropa Çempionatı Qızıl 2010 Azərbaycan 55 Kq. Qızıl 2012 Serbiya 55 Kq. Gümüş 2013 Gürcüstan 55 Kq.

Elçin Əliyev (26 aprel 1990, Azərbaycan) — 2007-2013-cü illərdə Azərbaycanı, 2018-2021-ci illərdə isə Türkiyəni təmsil edən yunan-roma güləşçisi, 2010 və 2012-ci illərdə Avropa Çempionatının qalibi.

Karyerası

Elçin Əliyev 2007-ci ildə Belqrad şəhərində (Serbiya) baş tutan gənclər arasında Avropa Çempionatının qalibi oldu. 2008-ci ildə isə o, İstanbul şəhərində gənclər arasında Dünya Çempionatını 8-ci pillədə başa vurdu.

Daha sonra Elçin Əliyev 2009-cu ildə Fransada Kristo Lutte Turnirini qızıl medalla, Azərbaycanda Qızıl Qran-Pri beynəlxalq turnirini isə 7-ci pillədə başa vurdu.

2010-cu ilin yanvarında İstanbul şəhərində Vəhbi Əmrə Turnirinin qalibi olan Elçin Əliyev, apreldə Avropa Çempionatında debüt elədi. Azərbaycanda baş tutan Avropa Çempionatının 1/8 final mərhələsində Ukrayna nümayəndəsi Vüqar Rəhimova, 1/4 final mərhələsində Norveç nümayəndəsi Anders Renningena, 1/2 final mərhələsində isə Bolqarıstan nümayəndəsi Alexander Kostadinova qalib gələn Elçin Əliyev, final görüşündə Rusiya nümayəndəsi, olimpiya çempionu Nazir Manqiyev üzərində qələbə qazandı və Avropa Çempionatının qalibi oldu. Daha sonra Elçin Əliyev iyulda Azərbaycanda Qızıl Qran-Pri beynəlxalq turnirini və sentyabrda Rusiyada Dünya Çempionatını 8-ci pillələrdə başa vurdu.

2011-ci ildə isə Elçin Əliyev sadəcə İstanbul şəhərində Vəhbi Əmrə Turnirində mübarizə apardı və turnirin bürünc medalına sahib oldu.

Elçin Əliyev 2012-ci ilin yanvarında İstanbul Qran-Prisini bürünc medalla başa vurdu. Daha sonra o, martda Avropa Çempionatında mübarizə apardı Serbiyanın Belqrad şəhərində baş tutan Avropa Çempionatının 1/8 final mərhələsində Ermənistan nümayəndəsi Roman Amoyana, 1/4 final mərhələsində Ukrayna nümayəndəsi Dmitri Xaroya, 1/2 final mərhələsində isə Türkiyə nümayəndəsi Fatih Üçüncüya qalib gələn Elçin Əliyev, final görüşündə Macarıstan nümayəndəsi Peter Modos üzərində qələbə qazandı və növbəti dəfə Avropa Çempionatının qalibi oldu. Daha sonra Elçin Əliyev sentyabrda Azərbaycanda Qızıl Qran-Pri beynəlxalq turnirinin qalibi oldu.

2013-cü ilin martında Elçin Əliyev Gürcüstanın Tbilisi şəhərində baş tutan Avropa Çempionatında mübarizə apardı. Turnirin 1/8 final mərhələsində Serbiya nümayəndəsi Kristian Qazdağa, 1/4 final mərhələsində Türkiyə nümayəndəsi Fatih Üçüncüya, 1/2 final mərhələsində isə Moldova nümayəndəsi Victor Çobanuya qalib gələn Elçin Əliyev, final görüşündə Belarus nümayəndəsi Elbəy Taciyeva məğlub oldu və Avropa Çempionatının gümüş medalına sahib oldu. Daha sonra Elçin Əliyev iyulda İspaniya Qran-Prisini gümüş medalla başa vurdu.

2014-cü ilin yanvar-fevral aylarında Elçin Əliyev və Azərbaycan Güləş Federasiyası arasında saqqal mövzusunda mübahisə yaşandı. Yanvar ayında Azərbaycan Güləş Federasiyasının Baş Katibi Əjdər Cəfərov Elçin Əliyevə saqqalının uzun olduğunu və beynəlxalq qaydalara əsasən onu qısaltmalı olduğu ilə bağlı dəfələrlə xəbərdarlıq elədi. Bundan sonra Elçin Əliyev sələfi təriqətinə mənsub olmasının şiə olan İranlı məşqçinin xoşuna gəlmədiyini bildirdi və yığmamdan ayrıldığını açıqladı. Fevralın 4-də Əjdər Cəfərov və Elçin Əliyev arasında görüş oldu. Görüş zamanı Elçin Əliyev "Saqqala toxuna bilmərəm. Allah-təalanın əmridir." olduğunu bildirdi. Bundan sonra ona saqqalını turnirlər zamanı beynəlxalq qaydalara uyğun olara qısatlması xahiş olundu. Nəticədə fevralın 6-da Elçin Əliyev Azərbaycan yığmasının heyətinə qayıtdı.

Bununla belə saqqal davasından sonra Elçin Əliyevə beynəlxalq turnirlərdə şans verilmədi. Nəticədə Elçin Əliyev məşqlərini dayandırdı və bazarda alverlə məşğul olmağa başladı. 2018-ci ildə müsahibə zamanı Elçin Əliyev o günlər barədə bunları demişdi: Yığmamızın toplanışından ayrıldıqdan sonra bazarda utana-utana, gizlənə-gizlənə alver edəndə bir nəfərdə sahib çıxmadı. Allahın dinini qorumalı idim. Sadəcə, Rəbbimə ibadət edirdim.

Saqqal davasından sonra sərbəst güləş üzrə Azərbaycan yığmasından uzaqlaşdırılan Elçin Əliyev 2018-ci ildən Türkiyə bayrağı altında beynəlxalıq turnirlərdə mübarizə aparmağa başladı. 2018-ci ildə Rusiyada Avropa Çempionatını 14-cü pillədə başa vuran Elçin Əliyev İspaniyada Aralıq dənizi Oyunlarının gümüş medalına sahib oldu. Ümumi olaraq 2018-2021-ci illərdə 8 beynəlxalq turnirdə çıxış edən Elçin Əliyev cəmi 2 gümüş medala sahib oldu. Elçin Əliyev 2021-ci ildə 30 yaşında idmanla vidalaşdı.

Uğurları

Sıra	İl	Yarış	Ev sahibi	Nəticə
Azərbaycan
1	2007	Gənclərin Avropa Çempionatı	Serbiya	1.
2	2008	Gənclərin Dünya Çempionatı	Türkiyə	8.
3	2009	Kristo Lutte Turniri	Fransa	1.
4		Qızıl Qran-Pri	Azərbaycan	7.
5	2010	Vəhbi Əmri Turniri	Türkiyə	1.
6		Avropa Çempionatı	Azərbaycan	1.
7		Qızıl Qran-Pri	Azərbaycan	8.
8		Dünya Çempionatı	Rusiya	8.
9	2011	Vəhbi Əmri Turniri	Türkiyə	3.
10	2012	İstanbul Qran-Prisi	Türkiyə	3.
11		Avropa Çempionatı	Serbiya	1.
12		Qızıl Qran-Pri	Azərbaycan	1.
13	2013	Avropa Çempionatı	Gürcüstan	2.
14		İspaniya Qran-Prisi	İspaniya	2.
Türkiyə
15	2018	Avropa Çempionatı	Rusiya	14.
16		Aralıq dənizi Oyunları	İspaniya	2.
17		Vəhbi Əmri Turniri	Türkiyə	7.
18		Almaniya Qran-Prisi	Almaniya	12.
19	2019	Vəhbi Əmri Turniri	Türkiyə	8.
20		D. Kolov - N. Petrov Turniri	Bolqarıstan	11.
21	2021	Fransa Qran-Prisi	Fransa	2.
22		Vəhbi Əmri Turniri	Türkiyə	5.