İcbari Tibbi Sığorta üzrə Dövlət Agentliyi (Azərbaycan)

Vikipediya, azad ensiklopediya
Jump to navigation Jump to search
İcbari Tibbi Sığorta üzrə Dövlət Agentliyi
ITS RGB Large logo.jpg
Agentliyin loqosu
Ölkə: Azərbaycan Azərbaycan
Yaradılıb: 27 dekabr 2007
Tabeçilik: Azərbaycan Respublikası Prezidenti
Ünvan: Bakı, Lev Tolstoy küçəsi 170, AZ1000
Rəhbərlik
Rəhbər: Zaur Əliyev[1][2]
Birinci müavin: Nigar Bayramova[3][4]
Sayt
its.gov.az

İcbari Tibbi Sığorta üzrə Dövlət Agentliyi — Azərbaycan Respublikasında icbari tibbi sığortanın tətbiqini təmin edən, Xidmətlər Zərfi çərçivəsində tibbi xidmətlərin maliyyələşdirilməsi üçün vəsaitləri özündə cəmləşdirən, səhiyyə xidmətlərinin alıcısı olan və bununla bağlı zəruri xərclərin ödənilməsini təmin edən publik hüquqi şəxsdir.

Tarixi[redaktə | əsas redaktə]

Yaradılması[redaktə | əsas redaktə]

Azərbaycan Respublikasının Nazirlər Kabineti yanında İcbari Tibbi Sığorta üzrə Dövlət Agentliyi adı ilə Azərbaycan Respublikası Prezidentinin 2007-ci il 27 dekabr tarixli 2592 nömrəli Sərəncamına əsasən yaradılmışdır[5]. Azərbaycan Respublikası Prezidentinin 2016-cı il 15 fevral tarixli 765 nömrəli Fərmanına[6] əsasən bu qurum fəaliyyətə başlamış, 2016-cı il 24 noyabr tarixli 1125 nömrəli Fərmanı ilə onun əsasında “İcbari Tibbi Sığorta üzrə Dövlət Agentliyi” (bundan sonra – Agentlik) publik hüquqi şəxs yaradılmışdır.

Azərbaycan Respublikası Prezidentinin 2017-ci il 6 sentyabr tarixli Fərmanı ilə Agentliyin Nizamnaməsi[7] təsdiq edilmişdir.

Fəaliyyət istiqamətləri[redaktə | əsas redaktə]

  • İcbari tibbi sığorta sahəsində vahid siyasətin formalaşdırılmasında iştirak etmək və bu siyasətin həyata keçirilməsini təmin etmək;
  • Əhalinin icbari tibbi sığortalanmasını həyata keçirmək və icbari tibbi sığortanın maliyyə dayanıqlığını təmin etmək;
  • İcbari tibbi sığorta çərçivəsində tibbi xidmətlərdən istifadə edilməsində əhali üçün bərabər şərtlər yaradılması, icbari tibbi sığortanın hamı üçün əlçatan olması, əhalinin sağlamlığının qorunması məqsədi ilə tibbi xidmətlərin keyfiyyətinin və səmərəliliyinin artırılması istiqamətində tədbirlər görmək;
  • İcbari tibbi sığorta sahəsinin inkişafını təmin etmək.

İcbari tibbi sığorta sistemi[redaktə | əsas redaktə]

Pilot layihə[redaktə | əsas redaktə]

Azərbaycan Respublikası Prezidentinin 2016-cı il 29 noyabr tarixli 1127 nömrəli və 2018-ci il 16 fevral tarixli 1830 nömrəli Fərmanları[8][9]na əsasən Agentlik tərəfindən icbari tibbi sığorta pilot layihə şəklində Mingəçevir şəhəri, Yevlax və Ağdaş rayonlarının inzibati ərazilərində tətbiq edilmişdir. Pilot ərazilərdə dövlət səhiyyə sisteminə daxil olan qurumlar (Məhkəmə Tibbi Ekspertiza və Patoloji Anatomiya Birliyinin şöbələri, sanitariya və epidemioloji xidmət, əczaçılıq və tibbi təhsil müəssisələri, habelə psixonevroloji və narkoloji dispanserlər istisna olmaqla) layihə başa çatanadək Agentliyin tabeliyinə verilmişdir.

Layihə müddətində əhalidən sığorta haqqı tutulmamışdır. Pilot ərazilərdə 343 min 800 nəfər sığortaolunan baza zərfi (1829 adda tibbi xidmət) çərçivəsində ödənişsiz tibbi xidmətlərdən istifadə etmək hüququ əldə etmişdir.

Ölkə üzrə mərhələli tətbiq[redaktə | əsas redaktə]

Azərbaycan Respublikası Nazirlər Kabinetinin 2020-ci il 10 aprel tarixli 136 nömrəli Qərarı[10] ilə icbari tibbi sığortanın ölkənin inzibati ərazi vahidləri üzrə tətbiqi ardıcıllığı təsdiq edilib. “Tibbi sığorta haqqında” Azərbaycan Respublikası Qanununun[11] 16-4.1-ci maddəsinə uyğun olaraq, icbari tibbi sığortanın ölkə üzrə 3 mərhələdə tətbiq edilməsi nəzərdə tutulub.

Birinci mərhələdə, 2020-ci il 1 yanvar tarixindən etibarən icbari tibbi sığorta Naxçıvan Muxtar Respublikasında, Mingəçevir şəhərində, Qusar, Xaçmaz, Quba, Şabran, Siyəzən, Xızı, Qobustan, İsmayıllı, Ağsu, Şamaxı, Balakən, Zaqatala, Qax, Şəki, Oğuz, Qəbələ, Göyçay, Ucar, Zərdab, Kürdəmir, Yevlax və Ağdaş rayonlarında tətbiq edilir.

İkinci mərhələdə, 2021-ci il 1 yanvar tarixindən 36 şəhər və rayon - Gəncə, Naftalan, Şirvan, Qazax, Ağstafa, Tovuz, Şəmkir, Gədəbəy, Daşkəsən, Samux, Göygöl, Goranboy, Xocalı, Beyləqan, Xocavənd, Ağcabədi, Laçın, Bərdə, Füzuli, Ağdam, Tərtər, Kəlbəcər, Astara, Lənkəran, Lerik, Yardımlı, Masallı, Cəlilabad, Neftçala, Biləsuvar, Cəbrayıl, Salyan, İmişli, Saatlı, Sabirabad və Hacıqabul sözügedən sistemə qoşulacaq.

Üçüncü mərhələdə, 2021-ci il 1 aprel tarixindən etibarən isə Bakı, Sumqayıt, Abşeron, Xankəndi, Qubadlı, Zəngilan və Şuşa əhalisi icbari tibbi sığortanın Xidmətlər Zərfindən istifadə edəcək.

İcbari tibbi sığortanın Xidmətlər Zərfi çərçivəsində göstərilən xidmətləri[redaktə | əsas redaktə]

  • Təcili və təxirəsalınmaz tibbi yardım (o cümlədən ambulans xidməti);
  • İlkin səhiyyə (ailə həkimi) xidməti;
  • Ambulator şəraitdə müayinə və müalicə;
  • Stasionar müalicə;
  • Funksional-diaqnostik müayinələr;
  • Fizioterapevtik xidmətlər;
  • Laborator müayinələr;
  • Hamiləlik və doğuş xidməti;
  • Təcili vaksinasiyalar;
  • Uşaqların peyvənd təqvimi əsasında planlı vaksinasiya;
  • Cərrahi əməliyyatlar (o cümlədən dəyəri yüksək olan həyati vacib açıq və qapalı ürək-damar əməliyyatları);

İcbari tibbi sığorta haqqı[redaktə | əsas redaktə]

İşəgötürənlər, işçilər, mülki-hüquqi xarakterli müqavilələr əsasında işləri (xidmətləri) yerinə yetirən fiziki şəxslər və fərdi sahibkarlar icbari tibbi sığorta haqqı ödəyəcəklər.

Digər şəxslər üçün icbari tibbi sığorta haqqı dövlət tərəfindən ödəniləcək.

İcbari tibbi sığorta haqqının 1 yanvar 2021-ci ildən ödənilməsi nəzərdə tutulub.

Tibbi Ərazi Bölmələri (TƏB)[redaktə | əsas redaktə]

Agentlik tərəfindən “Azərbaycan Respublikasının inzibati ərazi vahidləri üzrə tibbi ərazi bölmələri”i təsdiq edilib. Tibbi ərazi bölməsi “Tibbi Ərazi Bölmələrini İdarəetmə Birliyi”nin (TƏBİB) tabeliyinə verilən dövlət səhiyyə sisteminə daxil olan tibb müəssisələrinin inzibati ərazi vahidləri üzrə qruplaşdırılmasıdır.

Agentlik tərəfindən ümumilikdə 13 sayda tibbi ərazi bölməsi müəyyənləşdirilib. Bir tibbi ərazi bölməsinə bir neçə şəhər/rayon üzrə dövlət tibb müəssisəsi daxil edilib.

Müştərək maliyyələşmə məbləğinin ödənilməsi zamanı sığortaolunanın qeydiyyatda olduğu inzibati ərazi və müraciət etdiyi tibb müəssisəsinin yerləşdiyi tibbi ərazi bölməsi nəzərə alınır.

Müştərək maliyyələşmə məbləği[redaktə | əsas redaktə]

Tibbi xidmətin tarifinin sığorta hadisəsi zamanı sığortaolunan tərəfindən ödənilməli olan müəyyən hissəsi müştərək maliyyələşmə məbləğidir. Müştərək maliyyələşmə məbləği ixtisaslaşdırılmış ambulator tibbi yardım və stasionar tibbi yardım xidmətlərə görə müraciət zamanı Xidmətlər Zərfində müəyyən edildiyi şərtlərə riayət edilmədiyi hallarda bütün sığortaolunanlara şamil olunur. Müştərək maliyyələşmə məbləğinin ödənilməsi şərtləri Xidmətlər Zərfi ilə müəyyən edilir və tibb müəssisəsinə birbaşa ödənilir. Müştərək maliyyələşmə məbləğinin tətbiqinə 1 yanvar 2021-ci ildən başlanılacaq.

Filiallar[redaktə | əsas redaktə]

Agentliklə bölgələrdə fəaliyyət göstərən tibb müəssisələri arasında səmərəli əlaqələndirməni təmin etmək məqsədi ilə Agentliyin strukturuna daxil olan 11 filialı təsdiq edilib: Şəmkir, Gəncə, Şəki, Lənkəran, Cəlilabad, Quba, Göyçay, Şirvan, Ağcabədi, Mingəçevir, Şamaxı. Hazırda 6 filial fəaliyyət göstərir: Gəncə, Quba, Lənkəran, Şəki, Şirvan, Şamaxı

Beynəlxalq əlaqələr[redaktə | əsas redaktə]

2017-2019-cu illərdə Agentlik Fransanın sosial sahələrlə bağlı nazirliklərinin Avropa və beynəlxalq məsələlər üzrə nümayəndəliyinin, Litvanın sosial müdafiə qurumları ilə birgə "Azərbaycanda icbari tibbi sığorta sisteminin tətbiqinə dəstək" tvininq layihəsini icra etmişdir. Layihə çərçivəsində Fransa, Litva və Estoniyadan olan beynəlxalq ekspertlərlə təcrübə mübadilələri aparılmış, Agentliyin təşkilati quruluşu və strateji vəzifələri hazırlanmış, sığortalı şəxsin statusunun təyini və sığortalı şəxslərin qeydiyyatı prosesinin müəyyənləşdirilməsi, o cümlədən tibbi sığorta haqlarına dair qanunvericiliyə və xərclərin bölüşdürülməsi siyasətlərinə aid təkliflər hazırlanmışdır.

Layihə müddətində icbari tibbi sığorta üzrə pilot layihənin qiymətləndirilməsi aparılmış və müsbət nəticələrə əsasən hökumət tərəfindən icbari tibbi sığortanın ölkə üzrə tətbiqinə qərar verilmişdir.

Tabeliyindəki qurum[redaktə | əsas redaktə]

Tibbi Ərazi Bölmələrini İdarəetmə Birliyi (TƏBİB)[redaktə | əsas redaktə]

“Tibbi Ərazi Bölmələrini İdarəetmə Birliyi” publik hüquqi şəxs (TƏBİB) Azərbaycan Respublikası Prezidentinin 2018-ci il 20 dekabr tarixli 418 nömrəli Fərmanına əsasən yaradılmışdır. Fərmanın icrası məqsədilə 12 aprel tarixində Azərbaycan Respublikasının Nazirlər Kabineti TƏBİB-in tabeliyindəki tibb müəssisələrinin siyahısının təsdiq edilməsi barədə qərar qəbul edib. TƏBİB-in əsas vəzifəsi icbari tibbi sığortanın tətbiqi ilə əlaqədar tibb müəssisələrinin idarəedilməsini və bu sahədə nəzarəti həyata keçirməkdir.

Qanunvericilik[redaktə | əsas redaktə]

Həmçinin bax[redaktə | əsas redaktə]

İstinadlar[redaktə | əsas redaktə]

  1. "Z.R.Əliyevin Azərbaycan Respublikasının Nazirlər Kabineti yanında İcbari Tibbi Sığorta üzrə Dövlət Agentliyinin direktoru təyin edilməsi haqqında" Azərbaycan Respublikası Prezidentinin 27 oktyabr 2015-ci il tarixli, 1474 nömrəli Sərəncamı. e-qanun.az  (azərb.)
  2. "Z.R.Əliyevin İcbari Tibbi Sığorta üzrə Dövlət Agentliyinin İdarə Heyətinin sədri təyin edilməsi haqqında" Azərbaycan Respublikası Prezidentinin 11 sentyabr 2017-ci il tarixli, 3222 nömrəli Sərəncamı. e-qanun.az  (azərb.)
  3. "N.Y.Bayramovanın Azərbaycan Respublikasının Nazirlər Kabineti yanında İcbari Tibbi Sığorta üzrə Dövlət Agentliyi direktorunun müavini təyin edilməsi haqqında" Azərbaycan Respublikası Prezidentinin 26 may 2016-cı il tarixli, 2070 nömrəli Sərəncamı. e-qanun.az  (azərb.)
  4. "N.Y. Bayramovanın İcbari Tibbi Sığorta üzrə Dövlət Agentliyi İdarə Heyəti sədrinin müavini təyin edilməsi haqqında" Azərbaycan Respublikası Prezidentinin 18 oktyabr 2017-ci il tarixli, 3304 nömrəli Sərəncamı. e-qanun.az  (azərb.)
  5. "Azərbaycan Respublikasının Nazirlər Kabineti yanında İcbari Tibbi Sığorta üzrə Dövlət Agentliyinin yaradılması haqqında" Azərbaycan Respublikası Prezidentinin 27 dekabr 2007-ci il tarixli, 2592 nömrəli Sərəncamı. e-qanun.az  (azərb.)
  6. Azərbaycan Respublikasının Nazirlər Kabineti yanında İcbari Tibbi Sığorta üzrə Dövlət Agentliyinin Əsasnaməsinin və strukturunun təsdiq edilməsi haqqında AZƏRBAYCAN RESPUBLİKASI PREZİDENTİNİN FƏRMANI
  7. İcbari Tibbi Sığorta üzrə Dövlət Agentliyinin NİZAMNAMƏSİ Azərbaycan Respublikası Prezidentinin 2017-ci il 6 sentyabr tarixli Fərmanı
  8. Mingəçevir şəhərinin, Yevlax və Ağdaş rayonlarının inzibati ərazilərində icbari tibbi sığortanın tətbiqinə dair pilot layihənin həyata keçirilməsi ilə bağlı tədbirlər haqqında AZƏRBAYCAN RESPUBLİKASI PREZİDENTİNİN FƏRMANI
  9. İcbari tibbi sığortanın tətbiqinə dair pilot layihənin genişləndirilməsi və “Mingəçevir şəhərinin və Yevlax rayonunun inzibati ərazilərində icbari tibbi sığortanın tətbiqinə dair pilot layihənin həyata keçirilməsi ilə bağlı tədbirlər haqqında” Azərbaycan Respublikası Prezidentinin 2016-cı il 29 noyabr tarixli 1127 nömrəli Fərmanında dəyişikliklər edilməsi barədə AZƏRBAYCAN RESPUBLİKASI PREZİDENTİNİN FƏRMANI
  10. “İcbari tibbi sığortanın ölkənin inzibati ərazi vahidləri üzrə tətbiqi ardıcıllığı”nın təsdiq edilməsi və “İcbari tibbi sığortanın ölkənin inzibati ərazi vahidləri üzrə tətbiqi ardıcıllığı”nın təsdiq edilməsi haqqında” Azərbaycan Respublikası Nazirlər Kabinetinin 2019-cu il 27 dekabr tarixli 504 nömrəli Qərarının ləğv edilməsi barədə AZƏRBAYCAN RESPUBLİKASI NAZİRLƏR KABİNETİNİN QƏRARI
  11. Tibbi sığorta haqqında AZƏRBAYCAN RESPUBLİKASININ QANUNU

Xarici keçidlər[redaktə | əsas redaktə]