Azərbaycan Respublikasının Dövlət İmtahan Mərkəzi

Vikipediya, azad ensiklopediya
Jump to navigation Jump to search

Azərbaycan Respublikasının Dövlət İmtahan Mərkəzi2016-cı ildə Azərbaycan Respublikasının Prezidenti İlham Əliyevin əmri ilə yaradılan qurum.

Yaradılması[redaktə | əsas redaktə]

Azərbaycan Respublikasının Prezidenti yanında Dövlət Qulluğu Məsələləri üzrə Komissiya və Azərbaycan Respublikasının Tələbə Qəbulu üzrə Dövlət Komissiyasının ləğv edilərək onların dövlət əmlakı Dövlət İmtahan Mərkəzinin balansına verilmişdir.[1]

Quruluşu[redaktə | əsas redaktə]

Prezidentin fərmanında deyilir: "Azərbaycan Respublikasının Dövlət İmtahan Mərkəzinin idarəetmə orqanı 7 nəfər üzvdən ibarət Direktorlar Şurasıdır. Azərbaycan Respublikasının Dövlət İmtahan Mərkəzinin Direktorlar Şurası sədrinin, sədr müavinlərinin və digər üzvlərinin vəzifəyə təyin və vəzifədən azad edilməsi, habelə onların səlahiyyətlərinə vaxtından əvvəl xitam verilməsi Azərbaycan Respublikasının Prezidenti tərəfindən həyata keçirilir;"[2]


İmtahan Xronikası[redaktə | əsas redaktə]

İmtahandan bir gün əvvəl sual kitabçaları Dövlət İmtahan Mərkəzinin sifarişi əsasında layihələndirilib istehsal edilmiş, tam avtomatlaşdırılmış çoxfunksiyalı çap sistemi vasitəsilə çap olunur. Hər bir İmtahan iştirakçısı üçün fərdiləşdirilmiş şəkildə çap edilmiş kitabçalar zallar üzrə qruplaşdırıb paketlənir,paketlər binalar üzrə qutulara yığılıb möhürlənir. Bütün bu proseslər insan müdaxiləsi olmadan, qapalı rejimdə, müşahidə kameralarının nəzarəti altında həyata keçirilir. Kitabçaların üzərinə açıq və kodlaşdırılmış formada bütün zəruri-fərdi məlumatların da çap etmək imkanının olması gələcəkdə imtahanlarda yazılı tapşırıqlardan istifadə etməyə şərait yaratmaqla yanaşı çap prosesinin tam etibarlılığını təmin edir. Tam avtomatlaşdırılmış çap prosesi imtahanın təhlükəsizliyi baxımından da mühüm elementdir. İmtahan keçirilən gün imtahan materialları, elmi-pedaqoji ictimaiyyətin nümayəndələri və idarəetmə orqanlarının əməkdaşları sırasından seçilmiş imtahan rəhbərlərinə DİM-in binasında xüsusi akt əsasında təhvil verilir. İmtahan rəhbərləri imtahan materialları ilə birlikdə, xüsusi mühafizə altında, mütəşəkkil qaydada imtahan mərkəzlərinə yola salınır. İmtahan respublikanın bütün ərazisi əhatə olunmaqla 11 regionda, 50dən çox imtahan mərkəzində keçirilir. İmtahahanı idarə edən heyət təsdiq olunmuş qrafikə uyğun olaraq bütün imtahan mərkəzlərinə imtahanın başlamasına en geci 2 saat 30 dəqiqə qalmış çatdırılır. İmtahan binasında təhlükəsizliklə bağlı müəyyən tədbirlər başa çatdıqdan sonra imtahanın başlamasına ən azı 1 saat 30 dəqiqə qalmış abituriyentlərin imtahan binasına buraxılış rejimi başlanır. Abituriyentlərin şəxsiyyətini təsdiq edən sənədi və imtahana buraxılış vərəqəsi yoxlanılır, abituriyentlərin üstünə baxış keçirilir, və qadağan edilmiş mobil telefon və digər köməkçi vasitələr olub-olmadığı müəyyənləşdirilir. Daha sonra abituriyentlərin buraxılış vərəqələrinin üzərində çap olunmuş ştrix kod skannerdən keçirilir və təqdim olunan sənədlərin DİM-in bazasında olan məlumatlarla uyğunluğu bir daha yoxlanılır. İmtahan mərkəzləri DİM-də yaradılmış imtahan qərargahı tərəfindən daimi olaraq nəzarətdə saxlanılır, və imtahanla bağlı daxil olan hər bir məlumatın xüsusi protokollarda qeydiyyatı aparılır. İmtahanlar bütün imtahan mərkəzlərində eyni vaxtda, saat 11:00-da başlayır. İmtahanda abituriyentlərə 5 fənndən 25 test tapşırığı olmaqla ümumilikdə 125 sual təqdim edilir, və sualların cavablandırılması üçün 3 saat vaxt verilir. İmtahan başa çatdıqdan sonra imtahan sənədləri xüsusi mühafizə altında DİM-ə gətirilir və təhvil verilir. Cavab kartları olan qutuların möhürləri qapalı rejimdə açılır, cavab kartları qutulardan çıxarılır, ardıcıl yığılır və emal üçün hazırlanır. Bu proses mühafizə kameraları ilə protokollaşdırılan xüsusi zalda həyata keçirilir. Emalın ilk mərhələsində sürətli skannerlərlə cavab kartlarının hər iki üzünün rəngli-elektron fotoşəkilləri alınır. Cavab kartlarının foto-şəkilləri internetdə abituriyentlərin şəxsi kabinetində yerləşdirilir. Bununla da abituriyentlər və onların valideynləri imtahanda qeyd edilmiş cavabları balların hesablanmasında istifadə edilən cavablarla müqayisə edə bilirlər. Daha sonra cavab kartları saatda 10.000 cavab kartı oxuma sürətinə və yüksək dəqiqliyə malik optik skannerlər vasitəsilə oxunur. Hər bir cavab kartı iki dəfə müxtəlif skannerdən keçir və iki oxuma faylları müqayisə edilir. İstifadə edilən avadanlıqla texnologiya cavab kartlarının xətasız oxunmasına tam təminat verir. Sonda optik oxu vasitəsilə yaradılmış cavablar kompyuterdə etalon cavablarla müqayisə olunmaqla abituriyentlərin balları hesablanır. Abituriyentlərin imtahanda topladıqları ballar və cavab kartlarının elektron təsviri DİM-in internet saytında yerləşdirilir. Abituriyentlər topladıqları ballar haqqında məlumatları internet saytında, eyni zamanda da bütün mobil operatorlar vasitəsilə də əldə edə bilirlər. İmtahan başa çatdıqdan sonra televiziya ilə DİM məsul əməkdaşları və ekspertlər tərərəfindən imtahanda təqdim olunan test tapşırıqları və sualların düzgün cavabları ilə bağlı geniş izahatlar verilir.


İstinadlar[redaktə | əsas redaktə]

  1. Saməddin Mehralıyev (2016-04-11). "İlham Əliyev TQDK-nı ləğv etdi" (azərb.). ANSPRESS. İstifadə tarixi: 2016-04-12.
  2. "Azərbaycan Respublikasının Dövlət İmtahan Mərkəzi publik hüquqi şəxsin yaradılması haqqında Azərbaycan Respublikası Prezidentinin Fərmanı" (azərb.). president.az. 2016-04-11. İstifadə tarixi: 2016-04-12.