Fabritsio Moro

Vikipediya, azad ensiklopediya
Jump to navigation Jump to search
Fabritsio Moro
it. Fabrizio Moro
Fabrizio Moro 2018 (cropped).jpg
Fabritsio Moro 2018-ci ildə
Sənətçi məlumatları
Doğum adı Fabritsio Mobriçi
it. Fabrizio Mobrici
Doğum tarixi 9 aprel 1975 (1975-04-09) (44 yaş)
Doğum yeri Roma, İtaliya
Vətəndaşlığı İtaliya İtaliya
Peşələri müğənni, bəstəkar

Üslub Rok, Pop
Ləqəbi Fabritsio Moro
it. Fabrizio Moro
Musiqi aləti vokal, gitara
Fəaliyyət illəri 1996–h.h.
fabriziomoro.net
Commons-logo.svg Vikianbarda əlaqəli mediafayllar

Fabritsio Mobriçi (it. Fabrizio Mobrici; d. 9 aprel 1975, Roma, İtaliya) və ya səhnə adı ilə Fabritsio Moroİtaliya müğənnisi və bəstəkarı. Onun debüt albomu 2000-ci ildə təqdim olunmuşdur. 2007-ci ildə Moro İtaliyanın ən böyük musiqi hadisələrindən hesab olunan Sanremo musiqi festivalında ifa etdiyi "Pensa" mahnısı ilə qalib gəldikdən sonra İtaliyada şöhrət qazanmışdır. Mahnı ölkədə uzun müddət hit olaraq qalmışdır.

2018-ci ilə kimi Moronun yeddi studiya albomu, bir mini-albomu və bir canlı ifalardan təşkil olunmuş albomu işıq üzü görmüşdür. 2011-ci ildə İtaliyanın RAI 2 telekanalında ifaçı Sberra adlı televiziya proqramına aparıcılıq etmişdir. Bundan başqa Moro digər italyan müğənniləri üçün mahnılar da yazmışdır.

Moro Ermal Meta ilə duet şəklində ifa etdiyi "Non mi avete fatto niente" mahnısı ilə 2018 Sanremo musiqi festivalında qələbə qazanmışdır. Onlar həmin mahnı ilə İtaliyanı 2018 Avroviziya Mahnı Müsabiqəsində təmsil etmiş və nəticədə 5-ci yeri qazanmışdırlar.

Musiqi karyerası[redaktə | əsas redaktə]

Fabritsio Moronun "Per tutta un'altra destinazione" adlı debüt sinqlı 1996-cı ildə çıxmışdır. Sinql daha sonra ifaçının 2000-ci ildə satışa buraxdığı və özü adını verdiyi debüt albomuna daxil edilmişdir. Moro 50-ci keçirilən Sanremo musiqi festivalında ifa etdiyi "Un giorno senza fine" mahnısı ilə 13-cü yerdə qərarlaşmışdır.

2004-cü ildə Moro "Situazioni della vita" mahnısının ispan dilində səslənən versiyasını hazırlamış və mahnı Italianos para siempre albomunda yer almışdır. Latın Amerikasında satışa buraxılan alboma eyni zamanda digər italyan müğənnilərinin də ifa etdiyi mahnılar daxil edilmişdir.[1] Moronun növbəti sinqlları "Eppure pretendevi di essere chiamata amore" və "Ci vuole un business" 2004 və 2005-ci illərdə təqdim olunmuşdur.

2007-ci ildə Moro Sanremo musiqi festivalındakı ikinci iştirakı ilə ölkədə şöhrət qazanmışdır. O, festivalda anti-mafiya mövzusunda ifa etdiyi "Pensa" mahnısı ilə qələbə qazanmışdır.[2] Mahnı sinql kimi buraxıldıqdan sonra İtaliya hit paradlarında zirvədə yer almış və eyni zamanda qonşu ölkələrdə də ən çox dinlənilən mahnılardan olmuşdur. Həmin ilin mart ayında Moronun Pensa adını verdiyi ikinci studiya albomu işıq üzü görmüşdür.

Fabritsio Moro 2007-ci ildə konsertdə

Sanremo musiqi festivalındakı üçüncü iştirakından sonra Moronun 2008-ci ildə Domani adlı üçüncü studiya albomu satışa buraxılmışdır. Albomun əsas mahnısı "Eppure mi hai cambiato la vita" mahnı yarışmalarından birində üçüncü yerə layiq görülmüş və Moronun İtaliyadakı növbəti hiti olmuşdur.[3]

2009-cu ildə Moro İtaliyanın Stadio adlı pop-rok qrupunun Diluvio universale albomu üçün "Resta come sei" mahnısını bəstələmişdir. Həmin mahnının bir hissəsini Moro ifa etmişdir. 2009-cu ilin iyun ayında ifaçının Barabba adlı ilk mini-albomu işıq üzü görmüşdür. İtalyan mediasına görə albomun əsas mahnısında İtaliyanın keçmiş baş naziri Silvio Berluskoninin azyaşlı bir qızla münasibətdə olması qalmaqalına toxunulmuşdur. Lakin ifaçı iddiaları rədd edərək, mahnıda heç bir siyasi məqam olmadığını vurğulamış və mahnının həmin qalmaqaldan öncə yazıldığını söyləmişdir.[4] Növbəti ildə Moro "Non è una canzone" mahnısı ilə Sanremo musiqi festivalında iştirak etmişdir. Festivalın yarımfinalında o, həm də ispan qrupu Jarabe de Palo ilə birlikdə çıxış etmişdir. Nəticədə isə festivalın final gecəsinə vəsiqə qazana bilməmişdir. Mahnı ifaçının Ancora Barabba adlı dördüncü studiya albomuna daxil edilmişdir. Ancora Barabba İtaliyanın albom siyahılarında 17-ci yerədək yüksələ bilmişdir.

2011-ci ilin noyabr ayında Moro İtaliyanın RAI 2 telekanalında Sberra adlı televiziya proqramına aparıcılıq etmişdir. O, həm də proqram üçün xüsusi olaraq "Respiro" mahnısını bəstələmişdir. Həmin mahnı ifaçının ilk canlı ifaların yer aldığı albomuna daxil edilmişdir.

Bəstəkar kimi Moro italyan müğənni Noemi üçün "Sono solo parole" və "Se non è amore" mahnılarını yazmışdır. Hər iki mahnı 2012-ci ildə Noeminin RossoNoemi studiya albomunda yer almışdır.

Moro Ermal Meta ilə duet şəklində ifa etdiyi "Non mi avete fatto niente" mahnısı ilə 2018 Sanremo musiqi festivalında qələbə qazanmışdır. Onlar həmin mahnı ilə İtaliyanı 2018 Avroviziya Mahnı Müsabiqəsində təmsil etmiş və nəticədə 308 xalla 5-ci yeri qazanmışdırlar.[5]

Diskoqrafiya[redaktə | əsas redaktə]

Albomlar[redaktə | əsas redaktə]

Albom adı İl
Fabrizio Moro 2010
Pensa 2007
Domani 2008
Ancora Barabba 2010
L'inizio 2013
Via delle girandole 10 2015
Pace 2017
Parole rumori e anni 2018

Canlı albom[redaktə | əsas redaktə]

Albom adı İl
Atlantico Live 2011

Mini-albom[redaktə | əsas redaktə]

Albom adı İl
Barabba 2009

İstinadlar[redaktə | əsas redaktə]

  1. "Fabrizio Moro – Biografia" (italyanca). Rockol.it. 1 yanvar 2010. İstifadə tarixi: 16 dekabr 2012.
  2. "Il rap contro la mafia conquista Sanremo". Corriere della Sera (italyanca). 3 mart 2007. İstifadə tarixi: 16 dekabr 2012.
  3. "Italian Charts – Fabrizio Moro – Eppure mi hai cambiato la vita (song)". Italiancharts.com. Hung Medien. 13 dekabr 2014 tarixində orijinalından arxivləşdirilib. İstifadə tarixi: 16 dekabr 2012.
  4. "Fabrizio Moro: la mia canzone non è su Noemi". Corriere della Sera (italyanca). 5 iyun 2009. İstifadə tarixi: 16 dekabr 2012.
  5. "Ermal Meta e Fabrizio Moro rappresenteranno l'Italia all'Eurovision Song Contest" (italyanca). Rockol.it. 11 fevral 2018. İstifadə tarixi: 11 fevral 2018.
Əvvəlki:
Françesko Qabbani
"Occidentali's Karma"
İtaliya Avroviziya Mahnı Müsabiqəsində
EuroItalia.svg

2018
Sonrakı:
Mahmud
"Soldi"

Xarici keçidlər[redaktə | əsas redaktə]