Heydər Əsədov

Heydər Əsədov
Heydər Xanış oğlu Əsədov
Azərbaycan Respublikasının Kənd Təsərrüfatı Naziri 22 oktyabr 2013 — 21 aprel 2018
Sələfi	İsmət Abasov
Xələfi	İnam Kərimov
Azərbaycan Respublikası Hesablama Palatasının 2-ci sədri 17 aprel 2007 — 22 oktyabr 2013
Sələfi	Namiq Nəsrullayev
Xələfi	Vüqar Gülməmmədov
Şəxsi məlumatlar
Təhsili	1. Bakı Sovet Ticarəti Texnikumu 2. Azərbaycan Xalq Təsərrüfatı İnstitutu
İxtisası	iqtisadçı
Doğum tarixi	24 oktyabr 1959(1959-10-24) (60 yaş)
Doğum yeri	Qarakilsə, Ermənistan SSR
Elmi fəaliyyəti
Elmi dərəcəsi	İqtisad elmləri namizədi
Təltifləri

Heydər Xanış oğlu Əsədov (24 oktyabr 1959) — Azərbaycan Dövlət Dəniz Akademiyasının rektoru (3 aprel 2019-dan), Azərbaycan Respublikasının keçmiş Kənd Təsərrüfatı naziri, 2-ci dərəcəli "Vətənə xidmətə görə" ordeni (2011) və "Şöhrət" ordeni (2019) laureatı, "Azərbaycan Xalq Cümhuriyyətinin 100 illiyi (1918-2018)" yubiley medalı (2019) sahibi.

Həyatı

Heydər Əsədov 1959-cu il oktyabr ayının 24-də anadan olmuşdur. 1978-ci ildə Bakı Sovet Ticarəti Texnikumunun Mühasibat uçotu fakültəsini, 1983-cü ildə isə D.Bünyadzadə adına Azərbaycan Xalq Təsərrüfatı İnstitutunun Uçot-iqtisad fakültəsini bitirmişdir.

1978-1984-cü illərdə institutda oxuduğu illərdə fəhlə, mühasib, böyük mühasib, böyük təftişçi vəzifələrində çalışmışdır. 1983-1992-ci illərdə Azərbaycan Dövlət İqtisad İnstitutunda müəllim, baş müəllim vəzifələrində işləmiş, 1987-ci ildə M.V.Lomonosov adına Moskva Dövlət Universitetində namizədlik dissertasiyasını müdafiə edərək iqtisad elmləri namizədi alimlik dərəcəsini almışdır.

1992-1995-ci illərdə Türkiyənin Mərmərə Universitetinin doktorantı olmuşdur.

1995-ci ildə Azərbaycan Respublikası Prezidentinin Sərəncamı ilə Maliyyə nazirinin müavini təyin edilmiş, 1996-2007-ci illərdə Maliyyə Nazirliyi yanında Baş Dövlət Xəzinədarlığının Baş direktoru, Azərbaycan Respublikası Maliyyə nazirinin müavini, 2007-2013-cü illərdə isə Azərbaycan Respublikası Hesablama Palatasının sədri vəzifələrində çalışmışdır.

Azərbaycan Respublikası Prezidentinin 22 oktyabr 2013-cü il tarixli Sərəncamı ilə Azərbaycan Respublikasının Kənd Təsərrüfatı naziri vəzifəsinə təyin edilmişdir..

Azərbaycan Respublikası Prezidentinin 03 aprel 2019-cu il tarixli Sərəncamı ilə Azərbaycan Dövlət Dəniz Akademiyasının rektoru təyin edilmişdir.

Azərbaycan Respublikasının Prezidentinin müvafiq sərəncamları ilə 2011-ci ildə 2-ci dərəcəli "Vətənə xidmətə görə" ordeni, 2019-cu ildə isə "Azərbaycan Xalq Cümhuriyyətinin 100 illiyi (1918-2018)" yubiley medalı ilə təltif edilib. 2019-cu ildə Azərbaycan Respublikasında təhsilin inkişafında xidmətlərinə görə "Şöhrət" ordeni ilə təltif olunub.

3 monoqrafiyanın və 30-dan çox elmi əsərin müəllifidir.

Ailəlidir. Üç övladı var.