Xəzər TV

Xəzər TV
Xəzər TV
Ölkə	Azərbaycan
Yayım ərazisi	Azerspace-1 peyklərinin əhatə dairələri
Dil	Azərbaycan dili
Baş qərargah	Nobel prospekti, Bakı, Azərbaycan
Yaranma tarixi	2 oktyabr 2007 (20:00)
Sahibi	Samanyolu Yayım Qrupu
Rəhbərlik	Şamxal Əli oğlu Həsənli
Keçmiş adları	STV Xəzər (11 yanvar 2000 - 2 oktyabr 2007)
Qardaş kanallar	Radio Xəzər Bürc FM Araz FM Dalğa TV
Sayt	xezertv.az

Xəzər Televiziyası – 2 oktyabr 2007-ci il tarixində fəaliyyətə başlayan televiziya kanalı.

Tarixçə

2000-ci ildə STV fəaliyyətə başladı. Xəzər TV-nin açılmasına qədər efirdə olan STV-nin efirində bəzən Azərbaycan dilində verilişlər, hətta matəm günlərində canlı yayımlar olurdu. 2007-ci ilin sentyabr ayında MTRŞ-nın iclası oldu. İclasda Nuşirəvan Məhərrəmli bildirdi ki, oktyabr ayında Xəzər TV fəaliyyətə başlayacaq. 2007-ci ilin oktyabrın 2-də artıq bəzi media qurumları axşam saat 8-də televiziyanın yayıma başlayacağı xəbərini verirdilər. 2 oktyabr 2007-ci il tarixində saat 20:00-da STV-nin yayımı dayandı Xəzər TV-nin yayımı başladı. Yarım saat ərzində efirdə Xəzər TV-nin loqosu və introları yayımlandı. 20:30-da isə "Gündəm" verilişi başladı. Verilişin qonağı MTRŞ-nın sədri Nuşirəvan Məhərrəmli idi. Həmin gün telekanalın yayımı saat 01:30-a qədər davam etdi. Loqotip məsələsində qərarsızlıq var idi. Sadəcə "Xəzər" yazısı, yoxsa "Xəzər TV" yazısı olsun deyə fikirlər var idi.

Hal-hazırda yayım Azerspace-1 peyki ilə, Azərbaycanın bütün kabel televiziyaları vasitəsilə davam edir.

Qərargahı ilk vaxtlarda Yasamal rayonundakı Zahid Xəlilov küçəsində idi. Daha sonra Atatürk prospekti 28 ünvanındakı binaya köçürüldü. 2015-ci ilin dekabr ayının 30-da isə Xətai rayonu, Nobel prospektində televiziyanın özünə məxsus binaya köçürüldü. Bina 10 mərtəbədən, 265 otaqdan ibarətdir. Binanın açılışında Azərbaycan Prezidentinin İctimai-siyasi məsələlər üzrə köməkçisi Əli Həsənov, Milli Televiziya və Radio Şurasının sədri Nuşirəvan Məhərrəmli, Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli, Mətbuat Şurasının sədri Əflatun Amaşov, millət vəkilləri, ziyalılar və ictimaiyyət nümayəndələri iştirak etmişdilər.

29 yanvar 2016-cı il tarixində 16:9 təsvir formatlı yayıma keçmişdir. Həmin ilin fevral ayının 2-də isə xəbər studiyasını yeniləmişdir. Kanal 4 Sentyabr 2016-cı ildə loqotipini dəyişmişdir. 19 Sentyabrda isə xəbər studiyasını bir daha yeniləmiş və yeni yayım dönəminə başlamışdır.

Xarici keçidlər

Xəzər TV rəsmi saytı