Səid Nəcəfzadə

Səid Nəcəfzadə
Səid Nəcəfzadə 2021-ci ildə
Şəxsi məlumatlar
Tam adı	Səid Əli oğlu Nəcəfzadə
Vətəndaşlığı	Azərbaycan
Doğum tarixi	14 yanvar 1999
Doğum yeri	Sumqayıt, Azərbaycan
İdman növü	Yüngül atletika
Karyera illəri	2009–h. h.
Məşqçisi	Vladimir Zayets
Medallar Paralimpiya Oyunları Bürünc 2020 Tokio Uzunluğa tullanma, T12 Dövlət təltifləri

Səid Əli oğlu Nəcəfzadə (14 yanvar 1999; Sumqayıt, Azərbaycan) — Azərbaycanı təmsil edən yüngül atlet. 2020-ci ildə baş tutan XVI Yay Paralimpiya Oyunlarında bürünc medala sahib olub.

Həyatı

Səid Nəcəfzadə 1999-cu il yanvarın 14-də Sumqayıt şəhərində anadan olub. 2005-2016-cı illərdə Sumqayıt şəhərində F. Piriyev adına 18 nömrəli tam orta məktəbdə təhsil alan Səid Nəcəfzadə, ali təhsilini 2016-2020-ci illərdə Azərbaycan Dövlət Bədən Tərbiyəsi və İdman Akademiyasında (ADBTİA) alıb. 2009-cu ildən idmanla məşğul olur. Şəxsi məşqçisi Vladimir Zayetsdir.

Karyerası

Səid Nəcəfzadə 2016-cı ilin may ayında uzunluğa tullanma üzrə şəhər çempionatının qalibi oldu.

2019-cu ilin iyul ayında o, Tunisdə baş tutan beynəlxalq turnirdə 6.80 metr nəticə ilə gümüş medala sahib oldu.

2021-ci ilin iyun ayında Səid Nəcəfzadə Polşada baş tutan Avropa Çempionatında 6.96 metr nəticə ilə turnirin qalibi oldu.

2021-ci ilin avqust ayında isə Səid Nəcəfzadə Yaponiyada baş tutan XVI Yay Paralimpiya Oyunlarında mübarizə apardı. Uzunluğa tullanma turnirində Səid Nəcəfzadə 7.02 metr nəticə ilə bürünc medala sahib oldu.

Azərbaycan Prezidenti İlham Əliyevin 6 sentyabr 2021-ci il tarixli Sərəncamına əsasən XVI Yay Paralimpiya Oyunlarında qazandığı nailiyyətlərə və Azərbaycan idmanında xidmətlərinə görə Səid Əli oğlu Nəcəfzadə 3-cü dərəcəli "Vətənə xidmətə görə" ordeni ilə təltif edildi.