Natiq Əliyev

Natiq Əliyev
Şəxsi məlumatlar
Doğum tarixi	23 noyabr 1947(1947-11-23)
Doğum yeri	Bakı, Azərbaycan SSR, SSRİ
Vəfat tarixi	9 iyun 2017 (69 yaşında)
Vəfat yeri	İstanbul, Türkiyə
Vəfat səbəbi	ürək çatışmazlığı
Dəfn yeri	II Fəxri Xiyaban
Vətəndaşlığı	SSRİ→ Azərbaycan
Partiya	Fayl:YAP-loqo.jpg Yeni Azərbaycan Partiyası
Təhsili	Azərbaycan Dövlət Neft və Sənaye Universiteti
Fəaliyyəti	siyasətçi
Təltifləri
Vikianbarda əlaqəli mediafayllar

Natiq Ağaəmi oğlu Əliyev (d. 23 noyabr 1947; Bakı, Azərbaycan - ö. 9 iyun 2017; İstanbul, Türkiyə) — dövlət xadimi, geoloq. Natiq Əliyev, 1993-2005-ci illərdə Azərbaycan Respublikası Dövlət Neft Şirkətinin prezidenti olub. 2005-2013-cü illərdə isə Azərbaycan Respublikasının Sənaye və Energetika naziri olan Natiq Əliyev, 2013-cü ildən ömrünün son gününə qədər Azərbaycan Respublikasının Energetika naziri vəzifəsində çalışıb.

Natiq Əliyev, 9 iyun 2017-ci ildə Türkiyənin İstanbul şəhərində, ürəyi ilə bağlı olan problemlərə görə yerləşdirildiyi "Florence Nightingale" xəstəxanasında ömrünün 69-cu yaşında vəfat edib.

Natiq Əliyev, Azərbaycanda uzun illərdir yüksək vəzifə tutan dövlət məmuru olmağına baxmayaraq, adı heç bir zaman müxtəlif qruplaşmalarda, müəyyən biznes monopoliyalarında və digər qalmaqallarda hallanmayıb. O, dövlətin ən sabit və etibarlı məmurlarından biri hesab olunurdu.

Həyatı

Natiq Əliyev 23 noyabr 1947-ci ildə Bakı şəhərində anadan olub. 1965-ci ildə orta təhsilini bitirən Natiq Əliyev, həmin ildən 1970-ci ilə qədər Məşədi Əzizbəyov adına Azərbaycan Neft və Kimya İnstitutunda dağ geoloqu ixtisası üzrə təhsil alıb.

O, Azərbaycan, ingilis və rus dillərində danışmağı bacarırdı.

Şəxsi həyatı

Natiq Əliyev ailəli idi, bir övladı və iki nəvəsi yadigar qalıb.

• Oğlu - Fərhad Əliyev (d. 1978) iki dəfə ailəli olub. Dizayner Sara Əliyeva ilə olan birinci nigahdan Aliyə adında bir qız, müğənni Səfurə Əlizadə ilə olan ikinci nigahdan isə İsgəndər (d. 2014) adında bir oğlu, Ayşə adında bir qızı (d. 2017) və Natiq (d. 2019) adında bir oğlu böyüyür.

Fəaliyyəti

Ali təhsilini başa vurandan sonra Natiq Əliyev, "Xəzərdənizneftqazsənaye" Ümumittifaq İstehsalat Birliyinin "Azərdənizneftkəşfiyyat" trestində, kompleks dəniz geoloji-kəşfiyyat konturunda çalışıb. O, 1979-cu ilə qədər bu vəzifəni icra edib.

Natiq Əliyev 1971-ci ildən 1974-cü ilə qədər Azərbaycan Elmlər Akademiyasının Geologiya İnstitutunun aspiranturasında təhsil alıb. O, həmdə 1974-cü ildən etibarən geologiya-mineralogiya elmləri namizədi idi.

1979-cu ildə Natiq Əliyev, "Xəzərdənizneftqazsənaye" Ümumittifaq İstehsalat Birliyinin kompleks dəniz geoloji-kəşfiyyat konturunda geologiya şöbəsinin rəisi vəzifəsinə təyin olunub.

1984-cü ildən Azərbaycan Respublikası Kommunist Partiyası Mərkəzi Komitəsinin aparatında neft və kimya şöbəsində təlimatçı, daha sonra isə sosial-iqtisadi inkişaf şöbəsinin bölmə müdiri vəzifəsində çalışıb.

Sovet İttifaqı dağılması ilə yenidən müstəqil dövlət olan Azərbaycan Respublikasında, 1993-cü il 9 avqustda Dövlət Neft Şirkəti yaradıldı. Dövlət başçısı Heydər Əliyevin sərəncamı ilə isə, həmin qurumun prezidenti və Direktorlar Şurasının sədri postuna məhz, Natiq Əliyev gətirildi.

O, həmdə 1994-cü ildən Azəri-Çıraq-Günəşli yataqlarının işlənməsi üzrə layihənin Rəhbər Komitəsinin sədri, 2002-ci ildən isə Bakı-Tbilisi-Ceyhan Şirkətinin Direktorlar Şurasının sədri vəzifələrində çalışıb.

Natiq Əliyev 2004-cü il 18 sentyabrda, beynəlxalq aləmdə Əsrin müqaviləsi adlandırılan Sazişin həyata keçirilməsindəki nailiyyətlərinə və Azərbaycan neft və qaz sənayesinin inkişafındakı xidmətlərinə görə Azərbaycan Respublikası Prezidenti İlham Əliyevin fərmanına əsasən "Şöhrət" ordeni ilə təltif edildi.

2005-ci il 9 dekabrda, dövlət başçısı İlham Əliyevin sərəncamı ilə Natiq Əliyev Azərbaycan Respublikası Dövlət Neft Şirkətinin prezidenti postundan azad edildi, əvəzinə isə Azərbaycan Respublikası Sənaye və Energetika naziri vəzifəsinə təyin olundu. Həmin ildə o, həmdə Azərbaycan Neftçilər Konqresinin prezidenti seçildi.

2009-cu ildə Polşa Respublikasının Prezidenti Lex Kaçinski Natiq Əliyevi, Azərbaycan–Polşa münasibətlərinin inkişafında göstərdiyi xidmətə görə "Polşaya xidmətlərə görə" ordeninin Komandor dərəcəsi ilə təltif etdi.

2013-cü il 22 oktyabrda, Prezident İlham Əliyevin sərəncamı ilə Azərbaycan Respublikası Sənaye və Energetika Nazirliyi ləğv edildi, əvəzinə isə Azərbaycan Respublikası Energetika Nazirliyi yaradıldı. Həmin qurumunun naziri isə, Natiq Əliyev təyin olundu.

Ölümü

2017-ci il iyunun 3-də, Natiq Əliyev səhhətində olan problemlətə görə Mərkəzi Neftçilər xəstəxanasına müraciət etdi. Xəstaxananın rəhbərliyinin nəzarəti ilə Natiq Əliyevin müayinə olunmasına başlanıldı və o, palataya yerləşdirildi. Müayinə zamanı Natiq Əliyevin ürək aortasında tıxanma kəskinləşdi və ürək fəaliyyətini dayandırdı. Təxminən 3 dəqiqə davam edən gərgin iş nəticəsində onun, ürəyinin fəaliyyəti bərpa edildi və xəstəxananın Kardo-reanimasiya şöbəsinə yerləşdirildi. Həmin gün, yerli və xarici mütəxəssislər tərəfindən Natiq Əliyev əməliyyat olundu və ürəyinin damarlarına 4 stend qoyuldu. İyunun 3-də, vəziyyəti yenidən ağırlaşan Natiq Əliyev, axşam saatlarında özəl təyyarə ilə Türkiyənin İstanbul şəhərinə aparıldı. Əvvəlcə o, "American" xəstəxanasına, daha sonra isə "Florence Nightingale" xəstəxanasına yerləşdirildi. İyunun 6-da, həmin xəstəxananın həkimləri Natiq Əliyevin vəziyyətinin stabil olduğunu və müalicənin davam etdirildiyini bildirdi.

İyunun 8-i, axşam saatlarında Azərbaycan Respublikasının Energetika naziri Natiq Əliyev müalicə olunduğu xəstəxanada ömrünün 69-cu yaşında vəfat etdi.

Təltifləri

• "Şöhrət" ordeni (Azərbaycan)
• "Azərbaycan Dövlət Gömrük Komitəsinin 20 illiyi" yubiley medalı (Azərbaycan)
• "Azərbaycan Dövlət Gömrük Komitəsinin 25 illiyi" yubiley medalı (Azərbaycan)
• "Fəxri Legion" ordeninin Zabit dərəcəsi (Fransa)
• "Polşaya xidmətlərə görə" ordeninin Komandor dərəcəsi (Polşa)
• "Şərəf" ordeni (Gürcüstan)
• "Kurmet" ordeni (Qazaxıstan)
• "Qazaxıstanın müstəqilliyinin 20 illiyi" medalı (Qazaxıstan)