Mayıs

Vikipediya, açıq ensiklopediya
Keçid et: naviqasiya, axtar
Kənd
Mayıs
A-Lacin.PNG
Laçın rayonu
Ölkə Azərbaycan
Rayon Laçın


MayısAzərbaycan Respublikasının Laçın rayonu inzibati ərazi vahidində kənd.

1992-ci ildə Ermənistan Respublikası Silahlı Qüvvələri tərəfindən işğal edilib.

Tarixi[redaktə | əsas redaktə]

Mayıs Laçın rayonunun kiçik kəndlərindən biridir. Qarabağ xanlığı dövründə və ondan da əvvəl Mayıs kəndinin ərazisi indiki Qarqışlaq kəndində yaşayan sakinlərin yaylaq yeri olmuşdur. Təxminən 1810-cu illərdə bir neçə ailə indiki Mayıs kəndində və onun yaxınlığında Əlimərdanlar adlanan yerdə məskunlaşaraq, bir daha Qarqışlaq kəndinə dönməmişlər və beləliklə, Mayıs və Əlimərdanlar kəndlərinin əsasını qoymuşlar. Lakin 1930-cu illərdə sovet hökumətinin xırda kəndləri ləğv etmək siyasətinin tərkib hissəsi olaraq Əlimərdanlar kəndi ləğv edilmiş, onun sakinlərinin də əksəriyyəti Mayıs kəndinə köçürülmüşdür.

Mayıs kəndinin adının da maraqlı tarixçəsi var. Əvvəllər onun adı Qısamtolan olmuşdur ki, bu da "Qızxanıma toy olan" ifadəsinin qısaldılmış variantıdır. Belə adın həmin yerdə ilk məskunlaşan və ətraf kəndlərdə böyük hörmət və nüfuza malik bir şəxsin Qızxanım adlı qızına orada toy etməsi ilə bağlı olduğu söylənilir. Mayıs adı isə 1918-ci ildən sonra meydana gəlmişdir. Bu adın 1918-ci ildə erməni quldurları ilə döyüşdə xalqımıza dəstək verməyə gəlmiş Osmanlı türklərindən qaldığı deyilir. Kəndin ərazisindən keçərək döyüşə gedən türk hərbçiləri həmin güllü-çiçəkli yeri Mayıs adlandırmışlar və bu kəlmə də kəndin adına çevrilmişdir. "Mayıs" sözü məhz güllü-çiçəkli yer, gözəl məkan mənasını verir.

Hazırda Sonasar kəndi ilə bir inzibati ərazi vahidini təşkil edən Mayıs kəndi bir sıra yaxşı ənənələri ilə məşhurdur. Laçın rayonu üzrə aparılmış son hesablamalarda məlum olmuşdur ki, Mayıs kəndi ali təhsilli sakinlərinin əhalisinin ümumi sayına nisbətdə rayon üzrə ən yüksək göstəriciyə malikdir. Həqiqətən də, hələ çar Rusiyasının dövründə Mayıs və Əlimərdanlar kəndlərindən o dövr üçün tanınan ziyalılar çıxmışdır. Məsələn, Cabbar Əlimərdanov sovet hakimiyyətinin qurulduğu ilk illərdə Tərtər rayonunda daxili işlər (indiki polis) şöbəsinin rəisi, daha sonra rayon icraiyyə komitəsinin sədri olmuşdur. Mayısın onlarla sakini Respublikanın müxtəlif yerlərində və Laçın rayonunun özündə məsul işlərdə işləmiş və bu gün də çalışmaqdadırlar. Mayıslı müəllimlər Minkənd, Qarqışlaq, Pircahan, Mişni məktəblərinin ilk müəllimlərindən olmuşlar, Sonasar kənd orta məktəbinin pedaqoji heyətinin əsas hissəsini mayıslılar təşkil etmişdir. Mayıs kəndinin yetirməsi olan üç nəfər – Cənnət Mirzəyev, Ənvər Heydərov və Mərdan Səlimov müxtəlif elm sahələri üzrə alimlik dərəcəsinə malik olmuşlar.

Coğrafiyası və iqlimi[redaktə | əsas redaktə]

Laçın rayonunun ən mənzərəli kəndlərindən biri olan Mayıs kəndi Hoçazçayın sağ sahilində meşəli, güllü-çiçəkli bir yerdə yerləşir. Kənd Sonasar, Soyuqbulaq, Mişni kəndləri ilə qonşudur. Ərazisində olan onlarla bulaq, qoz, fındıq, armud, zoğal, böyürtkən, zirinc və başqa yabanı meyvələrlə zəngin olan meşələr təbiətin Mayıs kəndinə bəxş etdiyi əsrarəngiz gözəllikdir.

Əhalisi[redaktə | əsas redaktə]

1992-ci ilin mayında kənddə 50 ailə və ya 240 nəfər yaşayırdı. Hazırda sayları 320 nəfərə çatmış mayıslılar Azərbaycanın 18 rayonunda məskunlaşmışlar.

İqtisadiyyatı[redaktə | əsas redaktə]

Əsas təsərrüfatı heyvandarlıq idi.

İstinadlar[redaktə | əsas redaktə]