İslam Əməkdaşlıq Təşkilatı

İslam Konfransı Təşkilatının bayrağı

İslam Əməkdaşlıq Təşkilatı və ya İslam Konfransı Təşkilatı (qısaca İKT) (ərəbcə: منظمة المؤتمر الإسلامي Münəzzəmər əl-mü təmar əl-islami) — 1969-cu ildə Rabatda (Mərakeş) müsəlman ölkələrinin dövlət və hökumət başçılarının konfransında yaradılmışdır. 60-a yaxın dövləti özündə birləşdirir. Bəzi ölkələrin müsəlman icmalarının, habelə bir sıra beynəlxalq təşkilatların nümayəndələri İKT yanında müşahidəçi statusuna malikdirlər.

İKT Birləşmiş Millətlər Təşkilatı ilə sıx əməkdaşlıq edir. 1975-ci ildən BMT yanında müşahidəçi statusu almışdır. Baş Məclisin 36-cı sessiyasında "BMT ilə İKT arasında əməkdaşlıq haqqında" qətnamə qəbul edilmişdir. Qətnamədə tərəflərin fəaliyyətini əlaqələndirmək üçün xüsusi mexanizm yaratmaq zərurəti qeyd edilir.

1972-ci ildə qəbul edilmiş nizamnaməyə görə, İKT-nin ali orqanı dövlət və hökumət başçılarının konfransıdır: (1969-cu ildə Rabatda, 1974-cü ildə Lahorda, 1981-ci ildə Məkkədə və Taifdə, 1984-cü ildə Kasablankada keçirilmişdir). İKT-nin siyasi orqanı xarici işlər nazirləri konfransı (1970-1981-ci illərdə 12 növbətçi və 3 fövqəladə konfrans keçirilmişdir), icraçı orqanı isə Baş katiblikdir. Baş katibliyin iqamətgahı Qüds İsrail işğalından azad edilənədək müvəqqəti olaraq Ciddədə (Səudiyyə Ərəbistanı) yerləşir.

Baş katibliyin tərkibində bir sıra şöbələr, o cümlədən sosial-istisadi, elm və texnika, Asiya məsələləri, Afrika məsələləri, beynəlxalq məsələlər, informasiya, insan hüquqları və azsaylı dini icma məsələləri, müsəlmanların qeyri-hökumət təşkilatları məsələləri şöbələri və başqa şöbələr işləyir.

İKT yanında onun konfranslarının qərarları ilə yaradılmış tam bir sıra müstəqil təşkilatlar fəaliyyət göstərir. Onların fəaliyyətini baş katiblik əlaqələndirir.

İslam Konfransı Təşkilatına üzv ölkələrin xarici işlər nazirlərinin 2011-ci il iyunun 28-30-da Astanada keçirəcəyi iclasda təşkilatın adının, embleminin və bayrağının dəyişməsi məsələsi müzakirə ediləcək.

İKT-nin Baş katibləri

1. Tunku Əbdül Rəhman (Malayziya) : (1971-1973)
2. Hassan Əl-Tuhami (Misir) : (1974-1975)
3. Dr. Amadou Karim Gaye (Seneqal) : (1975-1979)
4. Həbib Şətti (Tunus) : (1979-1984)
5. Seyed Şarifuddin Pirzada (Pakistan) : (1985-1988)
6. Dr. Hamid Alqabid (Niger) : (1989-1996)
7. Dr. Azeddine Laraki (Mərakeş) : (1997-2000)
8. Dr. Abdelouahed Belkeziz (Mərakeş) : (2001-2004)
9. Prof. Dr. Ekmeleddin İhsanoğlu (Türkiyə) : (2005-ci ildən hal-hazıradək)

Adının dəyişdirilməsi

2011-ci ilin iyun ayında Qazaxıstanın paytaxtı Astanada keçirilmiş İslam Konfransı Təşkilatı xarici işlər nazirlərinin 38-ci sessiyasının Xarici İşlər Nazirləri Şurasının qərarı ilə təşkilatın adı İslam Əməkdaşlıq Təşkilatına (İƏT) dəyişdirilmişdir.