Ağamirzə Əhmədov

Vikipediya, azad ensiklopediya
Jump to navigation Jump to search
Ağamirzə Əhmədov
Ağamirzə Əhmədov.jpg
bayraqAzərbaycan SSR Ali Sovetinin sədribayraq
26 mart 1951 — 18 aprel 1953
Sələfi Yusif Yusifov
Xələfi Mustafa Topçubaşov
bayraqAzərbaycan SSR ticarət naziribayraq
21 yanvar 1959 — 12 avqust 1963
Sələfi Nadir Axundov
Xələfi Ağarza Qafarov
bayraqBakı Şəhər Zəhmətkeş Deputatlar Soveti İcraiyyə Komitəsinin sədribayraq
1956 — yanvar 1959
Xələfi Əliş Ləmbəranski
bayraqAzərbaycan Kommunist Partiyası Naxçıvan Vilayət Komitəsinin ikinci katibibayraq
1943 — 1944
Xələfi Şirəli Məmmədov
Şəxsi məlumatlar
Doğum tarixi 1905
Doğum yeri
Vəfat tarixi 12 may 1964(1964-05-12)
Vəfat yeri
Dəfn yeri
Partiya
Təhsili

Təltifləri 2-ci dərəcəli "Vətən müharibəsi" ordeni "Qırmızı əmək bayrağı" ordeni "Qırmızı əmək bayrağı" ordeni "Şərəf nişanı" ordeni

Ağamirzə (Ağamirzəli) Mirzəli (Mirzalı) oğlu Əhmədov (1905, Əngəxaran, Şamaxı qəzası12 may 1964, Bakı) — Azərbaycan-sovet dövlət və partiya xadimi, Azərbaycan SSR Ali Sovetinin sədri (1951–1953), Azərbaycan SSR ticarət naziri (1959–1963).

Həyatı[redaktə | mənbəni redaktə et]

Ağamirzə Əhmədov 1905-ci ildə hazırkı Şamaxı rayonunun Əngəxaran kəndində yoxsul kəndli ailəsində anadan olmuşdur.[1] Azərbaycanda sovet hakimiyyəti qurulan zaman Ağamirzə Əhmədov komsomol sıralarına daxil olmuş, sonra isə Bakıda Sovet Partiya Məktəbində oxumağa göndərilmişdir. Burada oxuyarkən o, 1928-ci ildə ÜİK(b)P üzvü seçilmişdir. Məktəbi bitirdikdən sonra isə Azərbaycan rayonlarına rəhbər işlərə göndərilmiş, Baskal rayon komsomol komitəsinin katibi, Şamaxı rayon maarif şöbəsinin müdiri, rayon partiya komitəsinin təşkilat şöbəsinin müdiri vəzifələrində çalışmışdır.[2]

Ağamirzə Əhmədov 1932–1934-cü illərdə Bakıda Marksizm-Leninizm İnstitutunda təhsil almış, sonra isə Kürdəmir rayonundakı Mollakənd MTS-də siyasi şöbə rəisinin müavini, Lənkəran, Zəngilan, Şamxor rayonlarında rayon partiya komitələrinin katibi işləmişdir. Beş il partiya fəaliyyəti göstərdikdən sonra o, 1939-cu ildə yenidən ÜİK(b)P Mərkəzi Komitəsi yanında Ali Partiya Təşkilatçıları Məktəbində[ru] oxumağa göndərilmiş, Moskvadan qayıtdıqdan sonra, 1941-ci ildən Azərbaycandakı partiya təşkilatlarında rəhbər vəzifələrdə işləməyə başlamışdır. O, Əli Bayramlı rayon partiya komitəsinin katibi, Zaqafqaziya dəmir yolları siyasi şöbəsinin rəisinin müavini, Naxçıvan vilayət partiya komitəsinin ikinci katibi, Bakı şəhər partiya komitəsi nəqliyyat şöbəsinin müdiri, Quba rayonu, Kirovabad və Bakı şəhərlərinin partiya komitələrinin katibi olmuşdur.[2]

1951–1953-cü illərdə Ağamirzə Əhmədov Azərbaycan SSR Ali Sovetinin sədri seçilmiş[3] və paralel olaraq 1952-ci ildə Bakı Vilayət Zəhmətkeş Deputatları Soveti İcraiyyə Komitəsi sədrinin müavini təyin edilmişdir. Vilayət ləğv edildikdən sonra o, Azərbaycan SSR Nazirlər Soveti aparatında işləmişdir. 1954-cü ilin əvvəllərindən Bakı Şəhər Soveti İcraiyyə Komitəsi sədrinin müavini, sonra isə sədri olmuşdur.[2] 1963-cü ilədək o, Azərbaycan SSR ticarət naziri, ömrünün sonlarına yaxın vaxtlarda isə Azərbaycan SSR Nazirlər Soveti aparatında işləmişdir.[4]

Ağamirzə Əhmədov 1955–1957-ci illərdə Azərbaycan Kommunist Partiyası Bakı Şəhər Partiya Komitəsinin büro üzvü, 1956–1961-ci illərdə Azərbaycan KP Mərkəzi Komitəsinin üzvü, 1961–1964-cü illərdə isə Azərbaycan KP Təftiş Komissiyasının üzvü olmuşdur.[1] O, iki dəfə "Qırmızı əmək bayrağı", ikinci dərəcəli "Vətən müharibəsi", "Şərəf nişanı" ordenləri və medallarla təltif edilmişdir. SSRİ Ali Sovetinin (3-cü çağırış), Azərbaycan SSR Ali Sovetinin deputatı (2–5-ci çağırış) deputatı seçilmişdir.[5]

Ağamirzə Əhmədov 1964-cü ilin mayında Bakıda vəfat etmişdir.[5]

İstinadlar[redaktə | mənbəni redaktə et]

  1. 1 2 Ahkmedov, Agamirzali Mirza ogly // Who was who in the USSR (ingilis). Metuchen, New Jersey: Scarecrow Press. 1972. səh. 7.
  2. 1 2 3 Ағамирзә Мирзәли оғлу Әһмәдов // Азәрбајҹан ССР Али Совети депутатларынын тәрҹүмеји-һаллары. Бешинҹи чағырыш: 15 март 1959-ҹу ил. Бакы. 1960. С. 194.
  3. "Ахмедов Ага Мирза Мирза Али оглы". knowbysight.info (rus). Справочник по истории Коммунистической партии и Советского Союза 1898–1991. 29 dekabr 2021 tarixində arxivləşdirilib. İstifadə tarixi: 29 dekabr 2021.
  4. А. М. Әһмәдов // Коммунист. № 111 (12582). 13 мај 1964-ҹү ил. С. 4.
  5. 1 2 Əhmədov Ağamirzə Mirzəli oğlu // Fəxri Xiyaban. Bakı: Heydər Əliyev Fondu. 2007. səh. 50.

Xarici keçidlər[redaktə | mənbəni redaktə et]