Bakı Avrasiya Universiteti
| Bakı Avrasiya Universiteti | |
|---|---|
| Əsası qoyulub | 1992 |
| Rektor | Nazim Hüseynli |
| Şəhər | Bakı |
| Ölkə | |
| Ünvan | Bakı - AZ1073, akad. Həsən Əliyev küçəsi, 135 A |
| baau.edu.az | |
Bakı Avrasiya Universiteti — Azərbaycanda fəaliyyət göstərən özəl ali təhsil müəssisələrindən biri.
Bakı Avrasiya Universiteti 1992-ci il, aprelin 30-da Ali Diplomatiya Kolleci adı ilə fəlsəfə elmləri doktoru, professor Nazim Ziyad oğlu Hüseynli tərəfindən təsis edilmişdir. Ali Diplomatiya Kollecinin yaradılmasında əsas məqsəd çoxpilləli tədris prosesində xarici siyasət və beynəlxalq hüququn əsaslarına yiyələnməklə, respublikamızın xarici ölkələrdəki səfirlik və konsulluqlarında, digər təmsiledici strukturlarında və beynəlxalq təşkilatlarda fəaliyyət göstərmək potensialına malik mütəxəssislər, qərb və şərq dövlətləri üzrə ixtisaslaşmış diplomatlar, sinxron tərcüməçilər, jurnalist və hüquqşünaslar yetişdirmək, eləcə də diplomatiya sahəsində fəaliyyət göstərən kadrları təkmilləşdirmək və müvafiq istiqamətlər üzrə elmi-tədqiqat işləri aparmaq idi. 1992-ci ildən 1993-cü ilin mart ayına qədər olan mərhələni tələbə qəbuluna hazırlıq, eyni zamanda təhsil müəssisəsinin elmi-tədqiqat mərkəzi olaraq geniş və səmərəli fəaliyyətin qurulduğu dövr kimi xarakterizə etmək olar. Təsadüfi deyil ki, məhz bu dövrdə təhsil müəssisəsində respublikamız üçün tamamilə yeni olan sahələr üzrə elmi-tədqiqat işləri aparılırdı: - diplomatiya və xarici siyasətə dair fundamental və tətbiqi problemləri araşdırmaq; - Azərbaycanşünaslıq ixtisası üzrə tədqiqat işləri aparmaq; - elmi nəşrlərin hazırlanması işini təşkil etmək; - müvafiq sahələr üzrə informasiya sistemini təşkil etmək və s. Təhsil müəssisəsi Dövlət Ali Ekspert Komissiyasının 1993-cü il 13 mart tarixli 7/1 saylı qərarı ilə dövlət qeydiyyatından keçmişdir. Həmin qərara əsasən Ali Diplomatiya Kollecinə diplomatiya, beynəlxalq hüquq, beynəlxalq jurnalistika, sinxron tərcümə, beynəlxalq iqtisadi münasibətlər ixtisasları üzrə kadrlar hazırlamaq hüququ verildi və tələbə qəbulunun test üsulu ilə Tələbə Qəbulu Üzrə Dövlət Komissiyasının nəzarəti altında keçirilməsi tövsiyə edildi. DAEK-in rəyi əsasında, Azərbaycan Respublikası Nazirlər Kabinetinin 21 fevral 1996-ci il tarixli 22 saylı qərarı ilə təhsil müəssisəsinə dövlət statusu verilmişdir. 2005-ci ildə Azərbaycan Respublikası Təhsil Nazirliyi Ali Diplomatiya Kollecinin milli təhsil konsepsiyasına uyğun fəaliyyət göstərməsini, zəngin tədris və kadr hazırlığı təcrübəsinə malik olmasını, beynəlxalq əlaqələrini sürətlə genişləndirməsini və keyfiyyətli tədris prosesini təmin etməyə qadir metodiki, maddi-texniki bazaya və qabaqcıl elmi-pedaqoji kadr potensialına malik olmasını, məzunlarının respublikadaxili və beynəlxalq əmək bazarında layiqli iştirakını, eyni zamanda Təhsil Nazirliyi tərəfindən aparılan monitorinqlərdə yüksək iş keyfiyyətinin bir daha müşahidə edilməsini nəzərə alaraq adının dəyişdirilərək Bakı Diplomatiya Universiteti adlandırılması ilə bağlı Azərbaycan hökumətinə müraciət etmişdir. Bu müraciət əsasında Azərbaycan hökümətinin qərarı ilə 2005-ci il 30 iyun tarixindən etibarən Bakı Diplomatiya Universiteti, 2006-cı il 26 may tarixindən etibarən isə Bakı Avrasiya Universiteti adı altında dövlət qeydiyyatından keçmişdir. Hal-hazırda ali təhsil ocağı Bakı Avrasiya Universiteti kimi fəaliyyət göstərir
Kadr hazırlığı[redaktə | əsas redaktə]
Universitetdə 3 pillədə: bakalavriatura, magistratura və doktorantura üzrə kadr hazırlığı həyata keçirilir.
Təhsil Azərbaycan, rus, ingilis və bir sıra digər xarici dillərdə aparılır. Bakı Avrasiya Universitetində təhsil həm maddi-texniki baza təchizatı, həm tədrisin təşkili, həm də elmi-pedaqoji potensial baxımından muasir dünya standartlarına uyğun qurulmuşdur. Tələbələrə elmin və peşənin sirlərini tədris edən professor-müəllim heyəti, əsasən, respublikanın qabaqcıl elmi və pedaqoji xadimlərindən ibarətdir.
Təhsil müddətini başa vuran məzunlara dövlət nümunəli ali təhsil diplomu verilir və onlar universitetdə, həmçinin digər ali təhsil müəssisələrində magistratura və aspiranturada təhsillərini davam etdirmək və ya ali təhsilli mutəxəssis kimi əmək fəaliyyətinə başlamaq hüququ qazanırlar. Tələbələr təhsil aldıqları müddətdə Universitetin kompüter mərkəzi, internet şəbəkəsi, elektron kitabxanası və laboratoriyalarının xidmətlərindən istifadə edə bilərlər.
Xarici əlaqələri[redaktə | əsas redaktə]
Bakı Avrasiya Universiteti hazırda 5 beynəlxalq təşkilatın üzvüdür:
- Dünya Diplomatiya Akademiyaları və Beynəlxalq Münasibətlər Universitetləri Birliyi;
- Mərkəzi və Şərqi Avropa Beynəlxalq Tədqiqatlar Birliyi;
- MDB ölkələri Beynəlxalq Münasibətlər Universiteti Assosiasiyası;
- Qara Dəniz Hövzəsi Universitetləri Birliyi;
- Qafqaz Universitetlər Birliyinin üzvüdür.[1]
Dunyanın 25-dən çox ölkəsinin (ABŞ, Böyük Britaniya, Fransa, Almaniya, Türkiyə, Yaponiya, Rusiya və s.) qabaqcıl ali məktəbləri ilə tələbə, müəllim və təcrübə mübadiləsi aparır.
Bağlanmış əməkdaşlıq müqavilələri çərçivəsində universitetin tələbələri 2-ci kursdan etibarən bakalavr və magistr təhsillərini həmin ölkələrin ali məktəblərində davam etdirmək imkanı əldə edirlər.
Bundan əlavə, universitetdə Rusiya Pyotr Akademiyasının, Rusiya Pedaqoji və Sosial Elmlər Akademiyasının, Rusiya Hüquq Akademiyasının və digər nüfuzlu elmi təşkilatların həqiqi və müxbir uzvləri, əməkdar elm və mədəniyyət xadimləri də çalışır.
İstinadlar[redaktə | əsas redaktə]
- ↑ Tüm Uyeler. kunib.com
