Qərbi Kaspi Universiteti

Vikipediya, açıq ensiklopediya
(Qərb Universiteti səhifəsindən istiqamətləndirilmişdir)
Keçid et: naviqasiya, axtar

Qərbi Kaspi Universiteti

Şüar Uğurlu karyeranın təməli
Yaranma tarixi 1991
Rektor Andris Leitas
Tələbə sayı 1500
Şəhər Bakı
Ölkə Azərbaycan
Koordinat http://wu.edu.az//az/TU/loc/mad/
Ünvan Azərbaycan, Bakı
Universitet şəhərciyi İstiqlaliyyət 27, Bakı, Azərbaycan
İdman http://wu.edu.az//az/TU/sports/
Vebsayt www.wu.edu.az

Qərbi Kaspi UniversitetiAzərbaycan Respublikasının Bakı şəhərində fəaliyyət göstərən özəl ali təhsil müəssisəsi. Universitetin rektoru professor Andris Leitasdır[1].

Ümumi məlumat[redaktə | əsas redaktə]

Azərbaycanın ilk özəl ali təhsil müəssisələrindən biri olan Qərbi Kaspi Universitetinin əsası 1991-ci ildə Qərb Universiteti adı ilə qoyulmuşdur. Universitet 1992-ci ildən UNESCO nəzdindəki Beynəlxalq Universitetlər Assosiasiyasının, 1996-cı ildən İdarəçiliyin İnkişafı üzrə Avropa Fondunun, 1999-cu ildən Qara Dəniz Ölkələri Universitetlər Şəbəkəsinin, 2000-ci ildən Beynəlxalq İnzibati Elmlər İnstitutunun və "Atlas" Beynəlxalq Turizm Assosiasiyasının üzvüdür. Qərbi Kaspi Universiteti dünyanın bir çox nüfuzlu təhsil müəssisələri ilə sıx əməkdaşlıq edir.

Bir çox təhlillərdə Qərbi Kaspi Universiteti, yeni mühitdə yaranmış ən yaxşı 10 universitetlərdən birinci kimi göstərilmişdir. 1991-ci ildə SSRİ dağılandan sonra Şərqi Avropada və MDB məkanında gedən ictimai-siyasi və iqtisadi proseslərin təsirinə məruz qalmışdır.

2017-ci ildən adı dəyişdirilərək Qərbi Kaspi Universiteti olmuşdur[2].

Məqsədləri[redaktə | əsas redaktə]

Universitetin məqsədi qlobal əməkdaşlıq və beynəlxalq səviyyədə tanınan dünya səviyyəli tədris üçün mükəmməl təhsil mühiti yaratmaq, gələcək karyerasında ardıcıl uğurlar əldə edə biləcək kadrlar hazırlamaqdır. Bu günə kimi Qərbi Kaspi Universiteti bir sıra beynəlxalq proqram və layihələrdə yer almaqla öz akademik fəaliyyətini genişləndirmiş, təhsil dünyasında mövqeyini möhkəmlətmiş və gələcək inkişafı üçün əlverişli şərait yaratmışdır.

Əsas məqsədləri bunlardır:

  • Yüksək təhsil və ən yüksək beynəlxalq səviyyəli elmi tədqiqatlar təqdim etməklə cəmiyyətə müsbət töhfələr verir.
  • Tələbələri üçün ən yüksək keyfiyyətli tədris və təlim mühiti yaradır.
  • Azərbaycanın ən aparıcı universiteti kimi mövqeyini gücləndirir və beynəlxalq nüfuzunu artırır.
  • Beynəlxalq partnyorlar ilə müqavilələri artırmağa və təhsil fəaliyyətini genişləndirməyə davam edir.
  • Qlobal əməkdaşlıq və beynəlxalq səviyyədə tanınan dünya səviyyəli tədris üçün mükəmməl təhsil mühiti yaratmağa davam edir.
  • Şəxsi və peşəkar sahədə yüksək standardlara nail olmaq üçün tam təminatlı iş qabiliyyətinə malik məzunlar yetişdirir.
  • Elmi tədqiqatlara həvəsləndirici və təkan verici qüvvə olur.
  • Dünya trendlərindən geri qalmamaqla mütərəqqi olmağa çalışır.
  • İqtisadi keçid dövründə Respublikanın maraqlarını təmin edə biləcək mütəxəssislər yetişdirməklə Azərbaycanın iqtisadi, sosial və siyasi inkişafına dəstək olur.

Təşkilat və idarəetmə[redaktə | əsas redaktə]

Məktəb, fakültələr və ixtisaslar[redaktə | əsas redaktə]

Qərb Universiteti bakalavr, magistratura və doktorantura üzrə yüksək səviyyəli geniş proqramlar təklif edir.

Yüksək Texnologiyalar və İnnovativ Mühəndislik Məktəbi[redaktə | əsas redaktə]

Yüksək Texnologiyalar və İnnovativ Mühəndislik məktəbi kafedra şəklində 1991-ci ildə "Riyaziyyat və Kompüter texnologiyaları” adı ilə fəaliyyətə başlamışdır.

Kafedra öz fəaliyyəti dövründə İnformatika və hesablama texnikası istiqaməti üzrə, İnformasiya texnologiyaları və sistemləri mühəndisliyi və Kompüter mühəndisliyi ixtisasları üzrə mütəxəssislər hazırlamışdır. 2017-ci ildən isə kafedra Yüksək texnologiyalar və innovativ mühəndislik məktəbinə çevrilmişdir. Hazırda bu məktəbdə aşağıda adı çəkilən ixtisaslar mövcuddur.

Bakalavriat səviyyəsi üzrə:

  • Kompüter mühəndisliyi
  • İnformasiya texnologiyaları
  • Mexanika mühəndisliyi
  • Ekologiya mühəndisliyi
  • Mühəndis sistemləri və qurğularının tikintisi mühəndisliyi
  • Cihazqayırma mühəndisliyi
  • Elektrotexnika, telekommunikasiya və radiotexnika mühəndisliyi;
  • Mexatronika və robototexnika mühəndisliyi;
  • Təkrar emal və bərpa texnologiyaları mühəndisliyi;
  • Poliqrafiya mühəndisliyi;
  • Sistem mühəndisliyi;
  • Meşə materiallarının və ağac emalının texnologiyası mühəndisliyi;
  • İstehlak mallarının ekspertizası və marketinqi;
  • Meşəçilik;
  • Yer quruluşu, torpaq və şəhər kadastrı;
  • Biologiya;

Magistratura səviyyəsi üzrə

  • İdarəetmədə informasiya sistemləri
  • Aqrar sahədə ətraf mühitin mühafizəsi

Doktorantura səviyyəsi üzrə

  • Sistemli analiz, idarəetmə və informasiyanın işlənməsi

Dizayn və Memarlıq Məktəbi[redaktə | əsas redaktə]

2017-ci ildə Qərbi Kaspi Universitetində Dizayn və Memarlıq məktəbi yaradıldı. Bu məktəb 1996-cı ildən fəaliyyət göstərən Dizayn fakültəsinin bazasında təşkil edildi.

Yeni yaradılan məktəbin məqsədi qlobal düşüncə tərzinə və zəruri professional kompetensiyalara malik mütəxəssis hazırlamaqdır. Müasir cəmiyyətin tələblərinə cavab verən təhsil nəticəsində əldə edilən biliklər və bacarıqlar gələcək mütəxəssislərə bədii-layihə məsələlərini həll etməyə kömək edəcək.

Nəzərdə tutulmuş proqramın həyata keçirilməsi üçün məktəbdə yaradılan yaradıcılıq emalatxanaları yeni avadanlıq və materiallarla təchiz edilmişdir: metalın və ağacın emalı üçün dəzgahlar, 3D printer, zəruri alətlər və s. Kompüter sinifləri modernləşdirilərək müasir proqram təminatı ilə yenilənmişdir. Tələbələr yeni konsepsiyaya əsasən bədii yaradıcılığın bütün incəliklərinin mənimsənilməsi üçün inteqrativ sistemə uyğun olaraq təhsil alacaqlar. Buraya bütün fənlərin ənənəvi tədrisi ilə bərabər müasir informasiya texnologiyalarından istifadə də nəzərdə tutulub. Bu konsepsiya memarlıq-dizayn istiqaməti üzrə təhsil alan tələbələrə qrafik mədəniyyətin bütün imkanlarını aşılayaraq layihələndirmənin yeni metodlarından istifadə etməyə imkan yaradacaq.

Dizayn və memarlıq məktəbində bakalavr, magistratura, doktorantura və dissertantura pillələri üzrə bu ixtisaslar mövcuddur:

Bakalavr səviyyəsi üzrə:

  • Dizayn
  • Memarlıq

Magistratura səviyyəsi üzrə:

  • Dizayn və texniki estetika

Doktorantura və dissertantura pilləsi:

  • Texniki estetika və dizayn

İqtisadiyyat Məktəbi[redaktə | əsas redaktə]

Bu struktur üzrə istiqamətlər Qərbi Kaspi Universiteti yarandığı gündən fəaliyyət göstərir. Məktəbin nəzdində "İqtisadiyyat”, "Maliyyə və mühasibat uçotu”, "Menecment”, və "Əmtəəşünaslıq və ekspertiza” adlı kürsülər (kafedralar) fəaliyyət göstərir. İqtisadiyyat Məktəbində kadr hazırlığı aparılan ixtisaslar aşağıdakılardır:

Bakalavr səviyyəsi üzrə:

  • Dünya iqtisadiyyatı
  • İqtisadiyyat
  • Dövlət və bələdiyyə idarəetməsi
  • Sənayenin təşkili və idarə olunması
  • İstehlak mallarının ekspertizası və marketinqi

Magistr səviyyəsi üzrə:

  • Beynəlxalq iqtisadi münasibətlər
  • İqtisadiyyatın hüquqi tənzimlənməsi
  • Beynəlxalq maliyyə və valyuta kredit münasibətləri

Doktorantura səviyyəsi üzrə:

  • Dünya iqtisadiyyatı
  • Sahə iqtisadiyyatı

Biznes Məktəbi[redaktə | əsas redaktə]

Universitetin aparıcı məktəblərindən sayılan Biznes məktəbində aşağıdakı ixtisaslar üzrə təhsil həyata keçirilir:

Bakalavr səviyyəsi üzrə:

  • Maliyyə
  • Menecment
  • Biznesin idarə olunması
  • Turizm və otelçilik
  • Mühasibat uçotu və audit

Magistr səviyyəsi üzrə:

  • Biznesin təşkili və idarə edilməsi
  • Biznesin idarə edilməsi
  • Vergi və vergiqoyma
  • Maliyyə nəzarəti və audit
  • İnnovasiyaların və layihələrin idarə olunması
  • Turizm və sosial-mədəni serviz xidməti
  • Beynəlxalq turizm və ölkəşünaslıq

Doktorantura səviyyəsi üzrə:

  • Daxili fiskal siyasət və dövlət maliyyə

Filologiya və tərcümə fakültəsi[redaktə | əsas redaktə]

Fakültə 1996-cı ildən "Qərb dilləri” fakültəsi adı ilə fəaliyyətə başlayıb. Fakültədə Filologiya (ingilis dili və ədəbiyyatı), Tərcümə (ingilis, alman, fransız) ixtisasları üzrə mütəxəssis hazırlığı aparılıb. 2017-ci ildən fakültə Filologiya və Tərcümə məktəbi kimi fəaliyyətini davam etdirir. Fakültənin vəzifəsi yüksək ixtisaslı filoloqlar, o cümlədən xarici dil və ədəbiyyatı mütəxəssisləri və peşəkar tərcüməçilər hazırlamaqdan ibarətdir. Fakültənin əsas məqsədi tələbələrə xarici dilləri və ədəbiyyatı tədris etməkdir. Fakültə peşəkar filoloq və tərcüməçilərin hazırlanmasında dünya standartlarına uyğun tədris proqramlarından və ən müasir texnologiya imkanlarından istifadə edir. Fakültənin əsas istiqaməti xarici dil və ədəbiyyat sahəsində filoloq, o cümlədən ictimai və siyasi əlaqələrin inkişaf etdiyi bir dövrdə respublika üçün daha vacib olan biznes, menecment, politologiya, sosiologiya və hüquq sahələri üzrə tərcüməçi hazırlamaqdan ibarətdir.

Fakültədə ümumilikdə 9 dil tədris olunur: Azərbaycan, ingilis, alman, fransız, rus, latın, çin, ispan, fin dilləri. Tələbələrin dil qabiliyyətini təkmilləşdirmək məqsədilə dil daşıyıcıları olan xarici mütəxəssislər dəvət olunur.

Universitetin akademik tədris proqramları ABŞ, Böyük Britaniya, Almaniya və başqa ölkələrin bir çox ali tədris müəssisələri tərəfindən qəbul edilib və Azərbaycan Respublikası Təhsil Nazirliyinin standartlarına uyğundur. Bu proqramların beynəlxalq standartlara da uyğun olması xarici tələbələrin də universitetdə təhsil almasına imkan yaradır.

Hazırda fakültədə aşağıdakı ixtisaslar üzrə mütəxəssis hazırlığı aparılır:

Bakalavr səviyyəsi üzrə:

  • Filologiya (ingilis dili və ədəbiyyatı);
  • Tərcümə (ingilis, alman, fransız);
  • Filologiya (Azərbaycan dili və ədəbiyyatı)
  • Dil və ədəbiyyat müəllimliyi (İngilis dili və ədəbiyyatı)

Magistratura səviyyəsi üzrə:

  • Tərcümə
  • Dilşünaslıq
  • Ədəbiyyatşünaslıq

Doktorantura və dissertantura səviyyəsi üzrə:

  • German dilləri
  • Dünyaədəbiyyatı

Siyasi və İctimai Elmlər Məktəbi[redaktə | əsas redaktə]

Siyasi elmlər fakültəsi Qərbi Kaspi Universiteti yarandığı ilk gündən onun tədris, elm və inzibati bölməsi olub, yüksək ixtisaslı kadr hazırlığı istiqamətində "Politologiya”, "Psixologiya”, "Regionşünaslıq”, "Beynəlxalq jurnalistika”, "Beynəlxalq hüquq”, "Beynəlxalq münasibətlər” və s. ixtisasları üzrə bakalavr və ali təhsilin magistratura səviyyəsində kadrların hazırlanmasına rəhbərlik etmişdir.

Fəaliyyət göstərən ixtisaslar sahəsində lazımi biliklərin tədrisində yüksək təhsil standartlarını qorumağı qarşısına məqsəd qoyan, intellektual səviyyəsi, elmi və təcrübi bilikləri yüksək olan müəllimlərimiz məktəbimizin qabaqcıllar sırasında olması üçün inamla irəliləyirlər. Tələbələr üçün mütəmadi olaraq onların dünyagörüşünün formalaşmasına xidmət edən, respublikanın tarixində və həyatında önəmli hadisələrə həsr olunmuş ictimai-siyasi və s. müxtəlif formatlı tədbirlər həyata keçirilir. Siyasi və İctimai Elmlər Məktəbinin əsas məqsədi gənc və müstəqil dövlətimizin demokratiya yolunda gələcək inkişafı üçün tələb olunan yüksək ixtisaslı mütəxəssislərin yetişdirilməsindən ibarətdir.

Həmçinin fəaliyyət prosesində sərbəstlik, bütün işlərdə etibar və inam prinsipinə əsaslanan, davamlı inkişaf hədəfi olan təcrübəli professor müəllim heyəti və yenilikçi fakültə rəhbərliyi sağlam, xeyirxah, rəqabətə hazır olan, öz sahələrində mövcud olan elmi yenilikləri mənimsəyib tətbiq etməyi bacara bilən, milli dəyərlərə sadiq, bəşəri dəyərlərə üstünlük verən, bilik, bacarıq və vərdişləri ilə bütün problemləri həll etmək iqtidarındadırlar. Məktəbin əsas məqsədi Respublikamızda Siyası elmlər, regionşünaslıq, beynəlxalq münasibətlər, psixologiya, tarix və fəlsəfə ixtisasını yüksək səviyyədə bilən məzunlar yetişdirən məktəb olmaqdır. Fundametal biliklər verən məktəbimizin missiyası tələbələri seçdikləri ixtisas sahələri üçün zəruri olan metodoloji, empirik və analitik bacarıqlarla silahlandırmaq, təhsilalanları ictimai həyata və səmərəli əmək fəaliyyətinə hazırlamaqdır.

Beynəlxalq proqramlar[redaktə | əsas redaktə]

Yerli mütəxəssislərlə yanaşı ABŞ, Kanada, Böyük Britaniya, Fransa, Almaniya, Niderland və digər ölkələrdən olan mütəxəssislər mütəmadi olaraq universitetə təlimlər və mühazirələr üçün dəvət olunur.

Xaricdə təhsil layihəsi qısa və uzunmüddətli dövrdə xaricdə təhsil proqramlarında iştirak etmək imkanı yaradır. universitetin tələbələri Çexiya, Polşa, Latviya, Rumıniya, Türkiyə, İrlandiya kimi ölkələrin aparıcı universitetlərində təhsil ala bilərlər. Eyni zamanda Qərbi Kaspi Universiteti Böyük Britaniyanın “Koventri” və bu ölkənin Sinqapurda yerləşən “London Biznes və Maliyyə Məktəbi” və İsveçrənin UBİS Universitetləri ilə ikili diplom layihələrini həyata keçirir.

Hazırda Qərbi Kaspi Universitetinin beynəlxalq şəbəkəsi dünyanın 200-dən artıq nüfuzlu təhsil müəssisəsini əhatə edir. Universitetin beynəlxalq fəaliyyətinə birgə və ya ikitərəfli əməkdaşlıq sahəsində bakalavr və magistr kursları, müqavilələrin artikulyasiyası və inkişafı, Erasmus+, Mövlanə və bir sıra digər tələbə mübadilə proqramları daxildir.

Akademik profili[redaktə | əsas redaktə]

Elmi tədqiqat institutları[redaktə | əsas redaktə]

Universitet elmi tədqiqatı ardıcıl olaraq təşviq edir, burada 2 tədqiqat institutu – Davamlı İnsan İnkişafı İnstitutu və Dağ Mədəniyyətləri və Landşaftları Tədqiqat İnstitutu - elmi araşdırma fəaliyyəti ilə məşğuldur.

Laboratoriya və mərkəzlər[redaktə | əsas redaktə]

Qərbi Kaspi Universiteti müasir və unikal laboratoriyalar və mərkəzlərlə təchiz olunub.

Fizika və elektronika laboratoriyası tələbələrə fundamental elmi hesablamaları aparmaq, elektronikanın əsasları və fizika qanunları barədə təsəvvürlərini genişləndirmək istiqamətində bacarıqlarını təkmilləəşdirmək imkanı yaradır.

Laboratoriyada aparılan işin əsas məqsədi müvafiq cihaz və avadanlıqların vasitəsi ilə aparılan real təcrübələr çərçivəsində əldə edilən fiziki biliklərin əhəmiyyətini anlamaqda yardımçı olmaq, həmçinin tələbəni fizika sahəsində araşdırmaların aparılması üçün zəruri olan metod və vasitələrlə bilavasitə tanış etməkdir.

Qərbi Kaspi Universitetinin hər bir tələbəsi laboratoriyada əldə etdikləri biliklər sayəsində təcrübə ilə bağlı məlumatları qeydə alıb onlardan istifadə və tətbiq etməyi öyrənəcək.

Laboratoriyalarımız dünya üzrə bir çox universitetlərin elmi-tədqiqat laboratoriyaları üçün avadanlıqlar istehsal edən, eyni zamanda orta məktəb və universitetlər üçün elm və mühəndislik sahəsində yüksək keyfiyyətli təlim-tədris sistemlərinin istehsalçısı olaraq tanınan Almaniya və Türkiyə şirkətlərindən alınmış müasir avadanlıqlarla təchiz edilmişdir.

Universitetimizdə yaradılmış unikal mərkəzlərdən biri Geomatika Mərkəzidir. Mərkəzin yaradılmasında məqsəd coğrafi məlumatların toplanması, işlənməsi və idarə olunması üçün tələb olunan proqram təminatının və texniki xidmətlərin göstərilməsindən ibarətdir. Dünyada belə mərkəzlərin yaradılması tarixi XX əsrin sonlarına təsadüf edir və coğrafi məlumatlara təlabatın artması ilə bağlıdır. Coğrafi məlumatlara artan təlabatın ödənilməsi yalnız ənənəvi çöl-tədqiqat işlərinin yeni texnoloji imkanlara inteqrasiya etdirməklə mümkün idi. Geomatika mərkəzləri bu cür inteqrasiyanı təmin edir, coğrafi informasiya sistemləri, məsafədən aerokosmik tədqiqatlar, geodeziya və kartoqrafiya, fotoqrammetriya, ekologiya, ətraf mühit və onun mühafizəsi və s. sahələrdə elmi-tədqiqat işləri aparılmasında əvəzsiz rol oynayır.

Qərbi Kaspi Universitetində yaradılmış mərkəzin böyük imkanları var. Mərkəzdə obyekt və hadisələrin rəqəmsal xəritələrinin tərtibi və yeniləndirilməsi, GİS əsasında su, meşə, torpaq, daşınmaz əmlak və s. haqqında məlumat bazasının və idarəetmə sisteminin yaradılması, topoqrafik planalma işlərinin aparılması, sürüşmə zonalarının modelləşdirilməsi və sürüşmə dinamikasının monitorinqinin aparılması, müxtəlif spektral diapazonda çəkilmiş peyk şəkilləri üzərində geniş miqyaslı analizlərin aparılması və s. mümkündür.

Biologiya üzrə bakalavr dərəcəsi yer üzündə mövcud olan və məhv olmuş külli miqdarda növ müxtəlifliyi, onların quruluşu və funksiyası, mənşəyi, çoxalması və inkişafı, canlı və cansız təbiətlə əlaqəsini öyrədən çoxsahəli tədris proqramıdır. Proqram çərçivəsində sitologiya (hüceyrə haqqında nəzəriyyə), molekulyar biologiya, insan haqqında nəzəriyyə, ekologiya, biosfer haqqında nəzəriyyə, təkamül nəzəriyyəsi, orqanizmin individual inkişafı kimi sahələr öyrənilir. Tələbələr bioloji elmlərin nailiyyətlərinə yiyələnməklə, eyni zamanda müasir genetika, irsiyyət və dəyişkənlik hadisələri haqqında təcrübi və praktiki biliklər əldə edirlər. Bu məqsədlə Qərbi Kaspi Universiteti tələbələri müxtəlif növ araşdırmalar aparmaq və laborator tədqiqatlarda iştirak imkanları ilə təmin edir.

Universitetin İnformasiya Texnologiyaları Mərkəzi də ən son avadanlıqlar və müasir kompyuterlərlə təchiz olunub. Mərkəzdə mövcud olan 3 D printer vasitəsilə tələbələr hazırladıqları müxtəlif formalı əşyaları çap edirlər. Burada tələbələrin həm əməliyyat sistemləri, həm də kompüter mühəndisliyi sahəsinin sirlərinə yiyələnməsi üçün bütün imkanlar mövcuddur.

Elm və İnnovasiya mərkəzi daim inkişafda olan elm və təhsil dünyasının yeniliklərinin universitetdə tətbiqi istiqamətində bir sıra uğurlu layihələrə imza atmışdır.

Qərbi Kaspi Universiteti nəzdində yaradılmış Konfutsi Mərkəzinin missiyası tələbələrə Çin dili və mədəniyyətini təbliğ etmək, həmçinin Azərbaycan və Çin arasında mədəni əlaqələri inkişaf etdirməkdir.

Qərbi Kaspi Universiteti nəzdində fəaliyyət göstərən Dillər Mərkəzi xarici dillərin tədris və öyrənilməsi prosesinə fundamental dəyişikliklərin geniş və səmərəli şəkildə tətbiq edilməsi məqsədilə yaradılmışdır. Bu, konseptual olaraq aşağıdakı formatda öz əksini tapır:

  • Dilin mənimsənilməsi yolunda üzə çıxan problem və çətinliklərin tədqiq edilməsi;
  • Xarici ölkələrdə dilin öyrənilməsi üçün nəzərdə tutulmuş proqramların geniş şəkildə həyata keçirilməsi;
  • Dillər tədrisi təcrübəsinin öyrənilməsi məqsədilə dünyanın aparıcı dil mərkəzləri ilə işgüzar əlaqələrin qurulması.

Kitabxanası[redaktə | əsas redaktə]

Hazırda Universitetin kitabxanası 60.000-dən çox ədəbiyyat, 500-dən çox mikroforma və informasiyanın başqa mənbələri ilə ölkədə ən zəngin kitabxanalardan biridir. Kitabxana Fondunda ingilis dilində 16 000-dən çox ən müasir ədəbiyyat mövcuddur.

Qərbi Kaspi Universiteti Azərbaycanda BMT Kitabxanasının fəaliyyət göstərdiyi ilk və yeganə universitetdir.

2016-ildə qurulmuş BMT kitabxanasının beynəlxalq təşkilatların müxtəlif nəşrləri ilə zənginləşdirilməsi prosesini ötən dövr ərzində davam etdirilib. Təhsil müəssisəsində BMT-nin Ümumdünya Turizm Təşkilatının Depozitariya Kitabxanası yaradılıb. Bununla da, Qərbi Kaspi Universiteti ölkəmizdən sözügedən kitabxana proqramına daxil edilmiş ilk və yeganə ali təhsil ocağı olub.

Bundan başqa, BMT-nin Səhralaşmaya qarşı Mübarizə üzrə Konvensiyası, BMT-nin Asiya və Sakit okean üçün İqtisadi və Sosial Komissiyası, BMT-nin Əhali Fondu, həmçinin Ümumdünya Meteorologiya Təşkilatı və BMT-nin Ətraf Mühit Proqramının birgə beynəlxalq orqanı olan İqlim Dəyişikliyi üzrə Hökumətlərarası Panelin Katiblikləri nəşrlərinin Qərbi Kaspi Universiteti kitabxanasına töhfə edilməsi barədə müsbət qərar qəbul ediblər və bu təşkilatlardan da ədəbiyyatlar kitabxana fonduna ardıcıl şəkildə daxil olur.

Eyni zamanda, Universitet Ümumdünya Əqli Mülkiyyət Təşkilatının Depozitariya Kitabxanası Proqramına qoşulub. Sözügedən proqram çərçivəsində ildə iki dəfə ÜƏMT Katibliyi tərəfindən Qərbi Kaspi Universitetinə müxtəlif nəşrlər təqdim olunur.

Tur Heyerdal Muzeyi[redaktə | əsas redaktə]

Mərkəz 2014-cü il 12-20 may tarixlərində keçirilən Tur Heyerdal Film Festivalı həstəfində rəsmi olaraq açılıb. Bu onun 100 illik yubileyini anılmasına həsr edilmişdi. Qərbi Kaspi Universitetinin əsas binasının ikinci mərkəzində yerləşən mərkəz onun fəaliyyəti ilə bağlı olan arxiv materiallarından ibarətdir. Buraya sənədli filmlər, onun səyahətlərinə dair məqalə və kitablar, xatirələr əl yazısı olan açıqcalar və Azərbaycana səfəri də daxil olmaqla onun səyahətlərinə aid fotoşəkillər aiddir.

Tur Heyerdala həsr olunmuş kitablardan aşağıdakılar Qərbi Kaspi Universiteti tərəfindən Azərbaycan dilinə tərcümə edilmişdir:

  • Kon-Tiki Səyahəti;
  • Ra Səyahəti;
  • I-IX Kəşfiyyat Seriyalar.

Qərbi Kaspi Universitetinin Fəxri Professoru, dünya şöhrətli kəşfiyyatçı, arxeoloq və etnoqraf olan Tur Heyerdal insan miqrasiyası ilə bağlı fikirlərini əsaslandırmaq üçün böyük okeanların üstündə qayıqlar və gəmilər üzərində yellənərək elmi düşünməyə meydan oxudu. Heyerdal həyatına 3 əsas çağırışın hakim olduğunu qeyd edirdi: təbiətlə harmoniyada yaşamaq və onu qorumaq; elmi cəmiyyət üzrə qeydlər etmək və bəşəriyyətin təməl birliyini təsəvvür etmək.

Tələbə həyatı[redaktə | əsas redaktə]

Tələbə Gənclər Təşkilatı[redaktə | əsas redaktə]

Tələbə Gənclər Təşkilatı (TGT) universitetdə demokratik tələbə özünüidarəetmə sisteminin effektiv fəaliyyət göstərməsi, universitet rektoru və tələbələr arasında sıx əlaqə yaratmaq baxımından olduqca effektiv qurum kimi sınaqdan çıxıb. TGT öz səlahiyyəti çərçivəsində:

  • tələbələr arasında sorğular keçirir, onların fikir və istəklərni öyrənir;
  • tədrisin təşkili və tələbələrlə bağlı olan rektorluğun normativ aktlarını tələbələrə izah etməklə onların həyata keçirilməsində fəal iştirak edir;
  • tələbə həyatının spesifik problemləri barədə rəy və təkliflər verir;
  • tələbələrin hüquq və maraqlarını (o cümlədən sosial) hərtərəfli müdafiə edir;
  • təhsilin keyfiyyətinə mənfi təsir edən və qayda-qanunun pozulmasına şərait yaradan səbəbləri aradan qaldırmaq barədə təkliflər verir və s.

Karyera[redaktə | əsas redaktə]

Karyera və Məzun Koordinasiya Mərkəzi təcrübə və karyera imkanları, tələbə-universitet münasibətlərinin tənzimlənməsi, tələbələrin təhsil və fərdi məşğuliyyətləri sahəsində geniş mütəxəssis xidmətləri təklif edir, bir çox istiqamətlər və mövzular üzrə təlimlər təşkil edir.

Qərbi Kaspi Universiteti tələbələrin təcrübə keçmələri və işlə təmin olunmaları məqsədilə bir çox təşkilatlarla sıx əməkdaşlıq edir. Tələbə Xidməti Mərkəzinin əsas missiyası isə tələbələrin intellektual və mədəni inkişafı və peşəkar hazırlıq səviyyəsinin yüksəldilməsi üçün layihələr həyata keçirməkdən və Universitetin çoxsaylı məzunları ilə daim əlaqə saxlamaqdan ibarətdir.

Mərkəz tələbə və məzunlara ixtisaslarına uyğun iş yerləri əldə etməkdə yardım edir. Universitetin tələbələri haqqında hərtərəfli məlumat İnformasiya Bazasına toplanır və hər il yeni qəbul olunan tələbələr haqqında məlumatlar yenilənir. Mərkəzin təşəbbüsü ilə Azərbaycanda fəaliyyət göstərən təşkilatların, şirkətlərin, xarici ölkələrin nümayəndələri ilə tez-tez tələbələrin görüşləri keçirilir. Yarandığı gündən bəri Mərkəz yüzlərlə məzun və tələbəyə işə düzəlməkdə yardımçı olmuşdur.

Tələbələrin istehsalat təcrübəsinin ən yüksək səviyyədə təşkil olunması üçün də ardıcıl tədbirlər görülür, təcrübəçilərin Milli Məclis, bir sıra nazirlik və komitələrdə, AMEA-nın institutlarında, aparıcı banklarda və digər tanınmış şirkətlərdə təcrübə keçmələri təmin edilir. Tələbələrimizin əksəriyyəti bu cür təcrübələrin sonunda həmin qurumlar tərəfindən iş ilə təmin olunublar.

Tanınmış məzunları[redaktə | əsas redaktə]

  • Nərgiz Qurbanova – Azərbaycan Respublikasının Bolqarıstan Respublikasındakı fövqəladə və səlahiyyətli səfiri;
  • Anar Ələkbərov – Heydər Əliyev Fondunun icraçı-direktoru, Heydər Əliyev Mərkəzinin direktoru, Azərbaycanın I vitse-prezidenti Mehriban xanım Əliyevanın köməkçisi.

Qərbi Kaspi Universiteti tam orta məktəbi[redaktə | əsas redaktə]

2003-cü tədris ilində fəaliyyətə başlayan Qərbi Kaspi Universiteti tam orta məktəbi ən müasir metodları, kurikulum standartlarını tətbiq edir. Məktəbdə yüksək beynəlxalq kriteriyalara cavab verən tam orta təhsillə yanaşı xarici dillərin- ingilis dilinin, ikinci xarici dil kimi fransız və alman dillərinin tədrisinə xüsusi yer verilir, şagirdlərin bu dilləri ən yüksək səviyyədə mənimsəməsi üçün dərslər interaktiv formada, yüksək maddi- texniki baza əsasında və rəngarəng şəkildə təşkil edilir. Xarici metəxəssislərin iştirakı ilə aparılan danışıq klubları xarici dilləri mənimsəmək üçün əlverişli şərait yaradır.

Məktəbdə təhsil sisteminin informasiyalaşdırılması üzrə təhsilin bütün pillələrində İKT-dan, müasir təchizata malik laboratoriyalardan, Mimio kabineti və elektron lövhələrdən istifadə edilir. Həmçinin elmi, bədii ədəbiyyat və dərsliklərlə təmin olunmuş kitabxana da şagirdlərin ixtiyarındadır.

Şagirdlərin yay tətilində qrup rəhbərləri ilə İngiltərənin London şəhərində yerləşən "Katherine and King΄s College of London" və Bekenham şəhərində yerləşən "English language school"da yay məktəblərində təcrübə mübadiləsində iştirak imkanı yaradılır.

Tədrisin keyfiyyətli təşkilinin nəticəsidir ki, məktəbin məzunları son 10 ildə ali məktəblərə qəbul imtahanlarında 100 faizlik nəticə göstəriblər. Onların arasında qəbul imtahanlarında yüksək nəticə göstərdiyi üçün Prezident təqaüdünə layiq görülənlər də var.

Qərbi Kaspi Universitetinin tam orta məktəbinin məzunları hər il yüksək bal toplayaraq (100%) təkcə ölkəmizin deyil, həçinin dünyanın müxtəlif ölkələrinin nüfuzlu ali məktəblərinə daxil olurlar. Bu universitetlər arasında ABŞ-ın Texas Universiteti, Ceyms Medison Universiteti, Çexiyanın Praqa Dövlət Texniki Universiteti, Türkiyənin İstanbul Bilgi Universiteti, Sankt-Peterburq Dövlət Sənaye Texnologiyaları və Dizayn Universiteti, Şimali Kiprin Kipr Beynəlxalq Universiteti, MİTSO Beynəlxalq Universiteti və başqa təhsil ocaqları var.

Qərbi Kaspi Universiteti nəzdində Hazırlıq Mərkəzi[redaktə | əsas redaktə]

Qərbi Kaspi Universiteti nəzdində fəaliyyət göstərən Qərb Bilik Hazırlıq Mərkəzində ali məktəblərə hazırlıq bu sahədə böyük təcrübəsi olan müəllimlər tərəfindən aparılır. Fəaliyyət istiqamətləri:

  • Abuturiyent hazırlığı
  • Magistr hazırlığı
  • Dövlət qulluğuna hazırlıq
  • Xarici dil kursları
  • Xarici universitetlərə qəbul üçün hazırlıq
  • Xaricdə dil kursları

Mənbə[redaktə | əsas redaktə]

Xaricə keçidlər[redaktə | əsas redaktə]

İstinadlar[redaktə | əsas redaktə]