Abdullah Gül

Abdulla Gül
19 mart 2004
Türkiyə Respublikasının 11-ci prezidenti 28 avqust 2007 — 28 avqust 2014
Baş nazir	Rəcəb Tayyib Ərdoğan
Sələfi	Əhməd Necdət Sezər
Xələfi	Rəcəb Tayyib Ərdoğan
Türkiyə Respublikasının 46-cı xarici işlər naziri 14 mart 2003 — 28 avqust 2007
Prezident	Əhməd Necdət Sezər
Sələfi	Yaşar Yakış
Xələfi	Əli Babacan
Türkiyə Respublikasının 24-ci baş naziri 18 noyabr 2002 — 14 mart 2003
Prezident	Əhməd Necdət Sezər
Sələfi	Bülənt Əcəvit
Xələfi	Rəcəb Tayyib Ərdoğan
Partiya	Ədalət və İnkişaf Partiyası
Təhsili	İstanbul Universiteti Ekseter Universiteti
Doğum tarixi	29 oktyabr 1950 (1950-10-29)
Doğum yeri	Kayseri, Türkiyə
Vətəndaşlığı	Türkiyə
Atası	Əhməd Həmdi Gül
Anası	Ədəviyə Gül
Həyat yoldaşı	Hayrunnisə Gül
Mükafatları
TCCB.Gov.Tr
VikiAnbarda əlaqəli mediafayllar

Abdulla Gül (türk. Abdullah Gül; d. 29 oktyabr 1950, Kayseri, Türkiyə) - Türkiyə Respublikasının 11-ci prezidenti.

Həyatı

29 oktyabr 1950-ci ildə Kayseridə anadan olmuşdur. Anası Adeviye xanım və atası Əhməd Həmdi Güldür. 21 avqust 1980-ci ildə Hayrünnisə Özyurt ilə ailə həyatı quran Gülün Əhməd Münir, Kübra və Mehmed Əmrə adlarında üç övladı vardır.

Karyerası

Orta təhsilini Kayseri liseyində bitirdikdən sonra İstanbul Universitetinin iqtisadiyyat fakültəsinə daxil olmuşdur. Həmin universitetin məzunu olduqdan sonra doktorluq dissertasiyasını müadafiə etmək üçün London və Ekseterdə staj keçmişdir. Türkiyəyə qayıtdıqdan sonra Sakarya Universitetində sənaye mühəndisliyi bölməsinin təsis edilməsində iştirak etmiş və iqtisadiyyatdan mühazirə demişdir.

1983-1991-ci illər arasında mərkəzi Ciddədə yerləşən İslam İnkişaf Bankının iqtisadiyyat üzrə müşaviri olmuşdur.

1991-ci ildə beynəlxalq iqtisadiyyat sahəsində dosent dərəcəsi almışdır. Həmin il vaxtından əvvəl keçirilən parlament seçkilərdə Türkiyə Böyük Millət Məclisinə Kayseridən Rifah Partiyasının millət vəkili kimi seçilmişdir.

1991-1995-ci illər arasında parlamentin plan və maliyyə komissiyasının üzvü olmuşdur.

1993-cü ildə Rifah Partiyası sədrinin xarici işlər üzrə müavini seçilmişdir. Bu müddət ərzində Avropa və Amerikadakı bir çox qurumlarda iştirak etdiyi konfranslarda partiyasının siyasi xəttini müdafiə etmişdir.

1995-ci ildə keçirilən parlament seçkilərində ikinci dəfə Rifah Partiyasının Kayseri millət vəkili seçilmişdir.

1995-2001-ci illər arasında parlamentin xarici işlər komissiyasının üzvü olmuş, 54-cü hökumətdə Dövlət naziri və hökumətin rəsmi nümayəndəsi olmuşdur.

1999-cu ildə Fəzilət Partiyasından üçüncü dəfə millət vəkili seçilmiş, Fəzilət Partiyasının 14 may 2000-ci ildə keçirilən növbədənkənar Konqresində partiya sədrliyinə namizəd olmuşdur. Sədrliyə cüzi səs fərqi ilə seçilməsə də, konqresdə əldə etdiyi nəticə bütün siyasi dairələrdə böyük bir müvəffəqiyyət kimi dəyərləndirilmişdi.

Fəzilət Partiyasının bağlanmasından sonra "Yenilikçi hərəkat" adlı hərəkatın liderlərindən biri oldu. Sonradan Yenilikçi hərəkat 2001-ci ilin avqustunda Ədalət və İnkişaf Partiyası yaranmasında əsas fiqur oldu.

Abdulla Gül Ədalət və İnkişaf Partiyasının təsisçilərindən biri kimi partiyanın təşəkkülündə böyük rol oynamış, AKP Sədrinin siyasi və hüquqi işlər üzrə məsul müavini olmuşdur.

1992-ci ildən Avropa Şurası Parlament Assambleyasının üzvü olaraq assambleyanın Mədəniyyət, Nizamnamə, Siyasi və iqtisadi inkişaf komitələrində işləmişdir. Avropa Şurasında 2001-ci ilə qədər davam etdirdiyi fəaliyyətlərinə görə "Pro metrio" medalı və Şuranın daimi "fəxri üzvü" adına layiq görülmüşdür.

3 noyabr 2002-ci ildə yenidən TBMM-in millət vəkili seçildi.

16 noyabr 2002-ci il tarixində Baş nazir kimi 58-ci hökuməti qurdu.

14 mart 2003-cü il tarixində Ədalət və İnkişaf Partiyasının sədri Tayyib Ərdoğanın baş nazirliyində qurulan yeni kabinetdə Baş nazirin müavini və xarici işlər naziri oldu.

24 aprel 2007–ci ildə partiyası tərəfindən Türkiyə Respublikasının Prezidentliyinə namizədliyi irəli sürüldü. 2007-ci il avqustun 28-dən Prezident vəzifəsinin icrasına başlamışdır.

11 noyabr 2013-cü ildə Türkiyə Cümhuriyyəti ilə Azərbaycan Respublikası arasında dostluq və əməkdaşlıq əlaqələrinin inkişaf etdirilməsindəki xüsusi xidmətlərinə görə Azərbaycan Respublikası Prezidentinin Sərəncamı ilə "Heydər Əliyev" ordeni ilə təltif edilmişdir.

Evlidir, 3 övladı var. İngilis və ərəb dillərini bilir. Beşiktaş PFK-nın azarkeşdir.

Mükafatları

• 11.11.2013 — "Heydər Əliyev" ordeni
• 30.04.2015 — "ADA" Universitetinin fəxri doktoru

Xarici keçidlər

• Türkiyə Respublikası Prezidentliği rəsmi internet saytı
• Abdulla Gül