Elzamin Tağıyev

Elzamin Tağıyev
Elzamin Eyvaz oğlu Tağıyev
Şəxsi məlumatlar
Doğum tarixi	11 avqust 1992(1992-08-11)
Doğum yeri	Qaradağlı, Xocavənd rayonu, Azərbaycan
Vəfat tarixi	9 noyabr 2020(2020-11-09) (28 yaşında)
Vəfat yeri	Şuşa, Şuşa rayonu, Azərbaycan
Vətəndaşlığı	Azərbaycan
Atası	Eyvaz Tağıyev
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	2010-2012; 2020
Rütbə	Əsgər
Döyüşlər	Vətən müharibəsi  • Füzuli döyüşləri  • Cəbrayıl döyüşləri  • Hadrut döyüşü  • Qubadlı döyüşləri  • Şuşa döyüşləri
Təltifləri

Elzamin Eyvaz oğlu Tağıyev (11 avqust 1992; Qaradağlı, Xocavənd rayonu, Azərbaycan — 9 noyabr 2020; Şuşa, Şuşa rayonu, Azərbaycan) — Azərbaycan Silahlı Qüvvələrinin əsgəri, Vətən müharibəsi şəhidi.

Həyatı və hərbi xidməti

Elzamin Tağıyev 11 avqust 1992-ci ildə Xocavənd rayonunun Qaradağlı kəndində dünyaya göz açmışdır. Elzamin ilk təhsilini Xocavənd rayon Salakətin kənd tam orta məktəbində almışdır. Məktəbi bitirdikdən sonra, 2010-cu ildə hərbi xidmətə yollanmışdır. 2012-ci ildə O, hərbi xidməti bitirmiş, fəaliyyətini mülki şəxs olaraq davam etdirmişdir.

8 sentyabr 2020-ci ildə Elzamin müddətdən artıq həqiqi hərbi xidmət qulluqçusu olur və yenidən hərbi xidmətini davam etdirir. 27 sentyabr 2020-ci ildən isə Vətən Müharibəsinə qatılmaqla, oradakı bir çox döyüşlərdə, xüsusilə, Füzulinin, Cəbrayılın, Hadrutun və Qubadlının azad edilməsi uğrunda gedən döyüşlərdə iştirak edir və döyüş tapşırığını yerinə yetirir. MAHHXHQ əsgər Elzamin Tağıyev noyabr ayının əvvəllərindən başlayan Şuşa döyüşündə də iştirak edir və 9 noyabr 2020-ci ildə Şuşada döyüş zamanı döyüş tapşırığını yerinə yetirərkən şəhid olmuşdur.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elzamin Tağıyev ölümündən sonra "Vətən uğrunda" medalı ilə təltif edildi.

Qubadlı şəhərinin işğaldan azad olunmasına görə gedən döyüşlərdə xüsusi igidlik və şücaət nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Elzamin Tağıyev "Qubadlının azad olunmasına görə" medalı ilə təltif edildi.

Ailəsi

Atası Tağıyev Eyvaz Həsrət oğlu Qarabağ müharibəsində iştirak etmiş, Xocavənd rayonunun Qaradağlı kəndinin müdafiəsində döyüş tapşırığını yerinə yetirmişdir. Həmin kəndin müdafiəsi uğrunda onun babası, dayısı və qohumları döyüşmüş və şəhid olmuşlar.

Təltifləri

• (15.12.2020) — "Vətən uğrunda" medalı (ölümündən sonra)
• (29.12.2020) — "Qubadlının azad olunmasına görə" medalı (ölümündən sonra)