Nicat Şükürlü

Nicat Şükürlü
Şəxsi məlumatlar
Doğum tarixi	23 oktyabr 1991
Doğum yeri	Bakı, Azərbaycan
Vəfat tarixi	11 oktyabr 2020 (28 yaşında)
Vəfat yeri	Xocavənd, Azərbaycan
Vətəndaşlığı	Azərbaycan
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	2009—2011 / 2020
Rütbə	Çavuş
Döyüşlər	Vətən müharibəsi  • Hadrut döyüşləri
Təltifləri

Nicat Şükürlü (tam adı: Nicat Ayaz oğlu Şükürlü; 23 oktyabr 1991; Bakı, Azərbaycan — 11 oktyabr 2020; Xocavənd, Azərbaycan) — Azərbaycan Silahlı Qüvvələrinin çavuşu, Vətən müharibəsinin şəhidi.

Həyatı

Nicat Şükürlü 1991-ci il oktyabrın 23-də Bakı şəhərində anadan olub. Karate idman növü ilə məşğul olub və Azərbaycan daxili yarışlarda bir sıra uğurlara imza atıb. 1998-2009-cu illərdə Bayıl qəsəbəsində 49 saylı "İntellekt" məktəb-liseyində təhsil alıb. 2009-cu ildə hərbi xidmətə yollanıb. 2014-cu ildə Bakı Slavyan Universitetinin (BSU) "Beynəlxalq münasibətlər" fakültəsinə daxil olub və 2019-cu ildə həmin universiteti bitirib. Subay idi.

Hərbi xidməti

Nicat Şükürlü 2009-2011-ci illərdə Azərbaycan Silahlı Qüvvələrinin Gədəbəy rayonunda yerləşən "N" saylı hərbi hissəsində müddətli həqiqi hərbi xidmətdə olub.

Azərbaycan Ordusunun çavuşu olan Nicat Şükürlü 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Manqa Komandiri olaraq fərqlənib və Hadrutun azadlığı uğrunda gedən döyüşlərdə savaşıb. Nicat Şükürlü oktyabrın 11-də Hadrut döyüşləri zamanı şəhid olub. Səbail rayonunun Badamdar qəsəbəsində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Nicat Şükürlü ölümündən sonra "Vətən uğrunda" medalı ilə təltif edildi.

Təltifləri

• (15.12.2020) — "Vətən uğrunda" medalı (ölümündən sonra)