Yunis Əliyev (əsgər)

Yunis Əliyev
Yunis Zaur oğlu Əliyev
Şəxsi məlumatlar
Doğum tarixi	19 yanvar 2000(2000-01-19)
Doğum yeri	Bakı, Azərbaycan
Vəfat tarixi	5 oktyabr 2020(2020-10-05) (20 yaşında)
Vəfat yeri	Tərtər rayonu, Azərbaycan
Dəfn yeri	Bülbülə
Vətəndaşlığı	Azərbaycan
Milliyyəti	Azərbaycanlı
Atası	Zaur Əliyev
Hərbi fəaliyyəti
Mənsubiyyəti	Azərbaycan Silahlı Qüvvələri
Qoşun növü	Quru Qoşunları
Xidmət illəri	2020
Rütbə	Əsgər
Döyüşlər	Vətən müharibəsi  • Ağdərə döyüşləri  • Suqovuşan döyüşləri
Təltifləri

Yunis Zaur oğlu Əliyev (19 yanvar 2000, Bakı – 5 oktyabr 2020, Tərtər rayonu) — Azərbaycan Silahlı Qüvvələrinin əsgəri, Vətən müharibəsi şəhidi.

Həyatı

Yunis Əliyev 19 yanvar 2000-ci ildə Bakı şəhərində anadan olmuşdur. Əslən Laçın rayonunun Səfiyan kəndindən idi. Təhsilini əvvəl Suraxanı rayonu Bülbülə qəsəbəsi 232 saylı məktəbdə, daha sonra 327 saylı tam orta məktəbdə almışdır. Uşaq yaşlarından hərbə və idmana böyük həvəsi olub.

Hərbi xidməti

Təhsilini bitirdikdən sonra Suraxanı rayonu hərbi komissarlıqdan çağırışla 24 yanvar 2020-ci ildə hərbi xidmətə getmişdir. Hərbi xidmətini Goranboy rayonunun Yuxarı Ağcakənd qəsəbəsində, daha sonra Tap Qaraqoyunlu kəndində davam etdirmişdir. Hərbi xidmətdə pulemyot kalaşnikov avtomatının təlimini keçmişdir. 27 sentyabr 2020-ci ildə, Vətən müharibəsi başladıqda ön cəbhədə düşmənlə üz-üzə vuruşmağa başlayıb. 3 oktyabr 2020-ci ildə Suqovuşan'ın işğaldan azad olunmasında da böyük şücaət göstərib, həmçinin yaralı əsgərlərə yardım etməsi ilə seçilmişdir. Baş atıcı olaraq fəallığı ilə seçilərək düşmənin neçə-neçə texnikasini və canlı qüvvəsini məhv etmişdir. Son dəfə ailəsi ilə şəhid olmamışdan bir neçə gün öncə danışmış, ondan nigaran qalmamalarını, hər şeyin yaxşı olduğunu söyləmişdir. 5 oktyabr 2020-ci ildə Ağdərədə gedən döyüşlərdə, Batambara meşəsində çiyin-çiyinə döyüşdüyü dostlarını müdafiə edərkən və döyüş tapşırığını layiqincə yerinə yetirərkən qəhrəmancasına şəhid olub. Suraxanı rayonu Bülbülə qəsəbəsinin Şəhidlər Xiyabanında dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Yunis Əliyev ölümündən sonra "Vətən uğrunda" medalı ilə təltif edildi.

Təltifləri

• (15.12.2020) — "Vətən uğrunda" medalı (ölümündən sonra)

Xarici keçidlər

• "Düşmənin 20 yaşlı kabusu: Atəşlə meşəni işıqlandırırdı" ( (az.)). Gülnarə Kazımova axar.az. 28.12.2020. İstifadə tarixi: 06.02.2021.
• "Əbədiyyətdəki əziz ünvanlarımız - Şəhidlər ölməz, Vətən bölünməz!" ( (az.)). Şəhanə Müşfiq 525.az. 22.01.2021. İstifadə tarixi: 06.02.2021.