Elşən Əhmədli

Elşən Əhmədli
Şəxsi məlumatlar
Doğum adı	Elşən Elbrus oğlu Əhmədli
Doğum tarixi	11 iyul 1997(1997-07-11)
Doğum yeri	Oğuz rayonu, Azərbaycan
Vəfat tarixi	8 noyabr 2020(2020-11-08) (23 yaşında)
Vəfat yeri	Şuşa rayonu, Azərbaycan
Dəfn yeri	Oğuz Şəhidlər Xiyabanı
Dəfn tarixi	17 noyabr 2020
Vətəndaşlığı	Azərbaycan
Atası	Elbrus Əhmədov
Anası	Şərafət Çələbiyeva
Təhsili	Azərbaycan Texniki Universiteti (2014–2018)
Hərbi fəaliyyəti
Mənsubiyyəti	Azərbaycan Ordusu
Qoşun növü	Xüsusi Təyinatlı Qüvvələr
Rütbəsi	Əsgər
Vəzifəsi	Snayperçi
Döyüşlər	İkinci Qarabağ müharibəsi  • Füzulinin azad edilməsi  • Şuşanın azad edilməsi
Təltifləri

Elşən Elbrus oğlu Əhmədli (11 iyul 1997, Oğuz rayonu – 8 noyabr 2020, Şuşa rayonu) — Xüsusi Təyinatlı Qüvvələrin əsgəri, İkinci Qarabağ müharibəsi şəhidi.

Həyatı

Elşən Əhmədli 11 iyul 1997-ci ildə Oğuz rayonunda anadan olub. 2003-cü ildə E.Abdullayev adına Oğuz şəhər 2 nömrəli tam orta məktəbə daxil olmuşdur. 2008-ci ildə təhsilini Oğuz şəhər 3 nömrəli məktəb-liseydə davam etdirərək, 2014-cü ildə məktəbi bitirmişdir. 2014–2018-ci illərdə Azərbaycan Texniki Universitetində Nəqliyyat və Logistika fakültəsi üzrə Bakalavr təhsili almışdır. Elşən gülərüz, səmimi, mehriban xüsusiyyətlərinə görə müəllim kollektivi və şagird yoldaşları tərəfindən hər zaman hörmət və rəğbətlə qarşılanırdı. O, onu sevənlərin qəlbində həmişə igid və məğrur bir gənc kimi qalacaqdır. Subay idi.

Hərbi xidməti

Elşən Əhmədli 2019-ci ildə Cəlilabad rayonunun Xüsusi Təyinatlı Qüvvələrinə müddətli həqiqi hərbi xidmətə çağırılıb. 2020-ci ildə xidmətini uğurla başa vurmuşdur.

İkinci Qarabağ müharibəsində iştirakı

Elşən Əhmədlinin döyüşlərdən son fotosu

Rəvan Lətifov, Orxan Rəhimli, Elşən Əhmədli (soldan sağa)

Azərbaycan Silahlı Qüvvələrinin müddətli həqiqi hərbi xidmət hərbi qulluqçusu olan snayper Elşən Əhmədli 2020-ci il sentyabrın 27-də Azərbaycan və Ermənistan arasında başlanan İkinci Qarabağ müharibəsi zamanı Füzulinin azad edilməsində və Şuşa uğrunda gedən döyüşlərdə savaşıb. Elşən Əhmədli noyabrın 7-də Şuşa uğrunda gedən döyüşlərdə qəhrəmancasına vuruşaraq şəhidlik zirvəsinə yüksəlmişdir. Elşən Əhmədli noyabr ayının 17-də Oğuz Şəhidlər Xiyabanında dəfn olunmuşdur.

Azərbaycanın ərazi bütövlüyünün bərpa edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elşən Əhmədli ölümündən sonra "Vətən uğrunda" medalı ilə təltif edildi.

Azərbaycan ərazilərinin işğaldan azad olunması zamanı döyüş tapşırıqlarını uğurla yerinə yetirdiyinə, düşmənin əsas qruplaşmalarının məhv edilməsi ilə qoşunların döyüş qabiliyyətinin qorunub saxlanılmasında fərqləndiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Elşən Əhmədli ölümündən sonra "Cəsur döyüşçü" medalı ilə təltif edildi.

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Elşən Əhmədli ölümündən sonra "Şuşanın azad olunmasına görə" medalı ilə təltif edildi.

İrsi və xatirəsi

• 2020-ci ilin dekabrında Elşən Əhmədli və Fərid Zaməddinovun xatirəsini əbədiləşdirmək üçün yaşadığı məhəllədə qoşa Şəhid Bulağı tikilmişdir.
• Oğuz rayonunda küçələrdən birinə Elşən Əhmədlinin adı verilib.

Təltifləri

• (15.12.2020) — "Vətən uğrunda" medalı (ölümündən sonra)
• (18.12.2020) — "Cəsur döyüşçü" medalı (ölümündən sonra)
• (29.12.2020) — "Şuşanın azad olunmasına görə" medalı (ölümündən sonra)