Ruslan Cəfərov (əsgər)

Ruslan Cəfərov
Şəxsi məlumatlar
Doğum tarixi	2 avqust 2000
Doğum yeri	Qusar, Azərbaycan
Vəfat tarixi	21 oktyabr 2020 (20 yaşında)
Vəfat yeri	Azıx, Xocavənd rayonu, Azərbaycan
Dəfn yeri	Qusar, Azərbaycan
Vətəndaşlığı	Azərbaycan
Atası	Mövlan Cəfərov
Anası	Əzizə Cəfərova
Hərbi fəaliyyəti
Mənsubiyyəti	Azərbaycan Silahlı Qüvvələri
Qoşun növü	Xüsusi Təyinatlı Qüvvələr
Xidmət illəri	2018—2020
Rütbə	Əsgər
Vəzifəsi	kəşfiyyatçı
Döyüşlər	Vətən müharibəsi  • Füzuli döyüşləri  • Xocavənd döyüşləri
Təltifləri

Ruslan Mövlan oğlu Cəfərov (2 avqust 2000; Qusar, Azərbaycan — 21 oktyabr 2020; Azıx, Xocavənd rayonu, Azərbaycan) — Azərbaycan Silahlı Qüvvələrinin əsgəri (müddətdən artıq həqiqi hərbi xidmət qulluqçusu), Vətən müharibəsi şəhidi.

Həyatı

Ruslan Cəfərov 2000-ci il avqustun 2-də Qusar şəhərində Mövlan Cəfərovun və Əzizə Cəfərovanın ailəsində anadan olmuşdur. 2006-2017-ci illərdə Elxan Güləliyev adına Qusar şəhər 2 nömrəli tam orta məktəbdə təhsil almışdır.

Hərbi xidməti

Ruslan Cəfərov 2018-ci ildə Səfərbərlik və Hərbi Xidmətə Çağırış üzrə Dövlət Xidmətinin Qusar şəhər üzrə Hərbi Komissarlığı tərəfindən müddətli həqiqi hərbi xidmətə çağırılmışdır. O, hərbi xidmətini başa vurduqdan sonra Naxçıvan Əlahiddə Ümumqoşun Ordusunun xüsusi təyinatlısı olaraq müddətdən artıq xidmət edirdi.

Azərbaycan Ordusunun əsgəri olan Ruslan Cəfərov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində kəşfiyyatçı kimi vuruşmuşdur. Füzulinin və Xocavəndin azadlığı uğrunda gedən döyüşlərdə vuruşmuşdur. Ruslan Cəfərov 21 oktyabr 2020-ci ildə Xocavənd rayonunun Azıx kəndi istiqamətində döyüş tapşırığının yerinə yetirilməsi zamanı şəhid olmuşdur. Qusar şəhərində dəfn olunmuşdur.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Ruslan Cəfərov ölümündən sonra "Vətən uğrunda" medalı ilə təltif edildi.

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Ruslan Cəfərov ölümündən sonra "Şuşanın azad olunmasına görə" medalı ilə təltif edildi.

Azərbaycan ərazilərinin işğaldan azad olunması zamanı döyüş tapşırıqlarını və xidməti vəzifələrini yerinə yetirən zaman fərqləndiyinə görə Azərbaycan Prezidenti İlham Əliyevin 30.12.2020-ci il tarixli Sərəncamına əsasən Ruslan Cəfərov ölümündən sonra "Hərbi xidmətlərə görə" medalı ilə təltif edildi.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Ruslan Cəfərov ölümündən sonra "Xocavəndin azad olunmasına görə" medalı ilə təltif edildi.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən Ruslan Cəfərov ölümündən sonra "Füzulinin azad olunmasına görə" medalı ilə təltif edildi.

Təltifləri

• (15.12.2020) — "Vətən uğrunda" medalı (ölümündən sonra)
• (29.12.2020) — "Şuşanın azad olunmasına görə" medalı (ölümündən sonra)
• (30.12.2020) — "Hərbi xidmətlərə görə" medalı (ölümündən sonra)
• (24.06.2021) — "Xocavəndin azad olunmasına görə" medalı (ölümündən sonra)
• (24.06.2021) — "Füzulinin azad olunmasına görə" medalı (ölümündən sonra)