Qorxmaz Eyvazov

Vikipediya, azad ensiklopediya
Jump to navigation Jump to search
Qorxmaz Eyvazov
Qorxmaz Eyvazov.jpg Qorxmaz Eyvazov
Doğum tarixi 1 aprel 1967(1967-04-01)
Doğum yeri Güləbird, Laçın rayonu
Vəfat tarixi 10 fevral 1994 (26 yaşında)
Vəfat yeri Cəbrayıl rayonu, Cocuq Mərcanlı, Azərbaycan
Vəfat səbəbi şəhid olmuşdur
Dəfn yeri Sumqayıt şəhəri Şəhidlər xiyabanı.
Uşağı Asəm Eyvazov
Atası Abış Eyvazov
Anası Sona Eyvazova
Fəaliyyəti Azərbaycan DİN Laçın Rayon Polis Şöbəsi
Mükafatları Azərbaycanın Milli Qəhrəmanı

Qorxmaz Eyvazov Abış oğlu (1 aprel 1967(1967-04-01), Laçın rayonu10 fevral 1994(1994-02-10), Cəbrayıl rayonu) — polis starşinası, Azərbaycanın Milli Qəhrəmanı; Qarabağ müharibəsi şəhidi.

Həyatı[redaktə | əsas redaktə]

Qorxmaz Eyvazov 1 aprel 1967-ci ildə Laçın rayonunun Güləbird kəndində anadan olmuşdur. 1974-cü ildə Laçın rayon Güləbird kənd orta məktəbinə birinci sinfə getmiş, 1984-cü ildə onuncu sinfi bitirərək Laçın rayon 127 saylı texniki peşə məktəbinə daxil olmuşdur. Hazırda 127 saylı texniki peşə məktəb Qorxmaz Eyvazovun adını daşıyır.

1985-ci ildə ordu sıralarına çağırılmışdır. Hərbi xidmətini Ukraynada Daxili İşlər Nazirliyinin Daxili Qoşunlarında keçmişdir. Hərbi xidmət zamanı 6 aylıq serjant kursunu bitirmişdir. O, xidmət müddətində dəfələrlə fəxri fərmanlar, tərifnamələrlə yanaşı birinci dərəcəli idmançı vəsiqəsi almış və döş nişanı ilə təltif edilmişdir. Qorxmaz 1987-ci ildə Hərbi xidmətini başa vurub doğma yurda dönür.

Döyüşlərdə iştirakı[redaktə | əsas redaktə]

O, 1988-ci ildə Laçında yaradılmış partizan dəstəsinə qoşulur. 1991-ci ildə O, Laçın rayon polis şöbəsinə qəbul edilir. Qorxmaz Eyvazovun döyüş yolu öz doğma yurdundan Güləbird, Qazdərəsi, Suarası, Mazutlu kəndələrindən başlayır. Qızartı dağı uğrunda gedən döyüşlərdə onun xüsusi fəallığı nəticəsində düşmənin bir tankı ələ keçirilir.

4 avqust 1992-ci ildə erməni quldurları yenidən Qızartı dağını ələ keçirmək üçün hücuma keçirlər və Qorxmaz qolundan güllə yarası alır.O,qolunun fəaliyyətinin itirilməsinə baxmayaraq bir neçə ay çəkən müalicədən sonra yenidən döyüşlərə qatılır. Füzuli rayonu  ərazisində gedən döyüşlərdə Qorxmaz böyük şücaət göstərir. Horadiz əməliyyatı zamanı göstərdiyi igidliyə görə onu rota komandiri təyin edirlər və Daxi İşlər Nazirliyi tərəfindən mükafatlandırılır.

Horadizin işğaldan azad edilməsi zamanı Ulu öndər Heydər Əliyevin cəbhə səfəri zamanı Qorxmaz 1 erməni tankını 2 erməni ilə birlikdə əsir götürərək qənimət kimi gətirmişdir və Qorxmaz Eyvazov Ulu öndər Heydər Əliyev tərəfindən qol saatı ilə mükafatlandırılmışdır.

10 fevral 1994-cü ildə Cəbrayıl rayonu Cocuq-Mərcanlı kəndi uğrunda gedən döyüşdə O, düşmənin xeyli canlı qüvvəsini məhv edir; lakin bu döyüşdə özü də həlak olur.

Azərbaycan Respublikası Prezidentinin 15 yanvar 1995-ci il tarixli, 262 saylı fərmanı ilə  Qorxmaz Abış oğlu Eyvazova ölümündən sonra ən ali mükafat olan Azərbaycanın Milli Qəhrəmanı adı verilmişdir[1].

Ailəsi[redaktə | əsas redaktə]

Ailəli idi. İki övladı yadigar qalıb.

Oğlu Asəm Eyvazov Azərbaycan Respublikası Daxili İşlər Nazirliyinin Sumqayıt Şəhər Polis İdarəsinin əməkdaşıdır. (Polis baş leytenantı)

Milli Qəhrəman[redaktə | əsas redaktə]

Azərbaycan Respublikası prezidentinin 15 yanvar 1995-ci il tarixli 262 saylı fərmanı ilə starşina Qorxmaz Abış oğlu Eyvazov ölümündən sonra "Azərbaycanın Milli Qəhrəmanı" adına layiq görülmüşdür.

Sumqayıt şəhərindəki şəhidlər xiyabanında dəfn edilmişdir.

İrsi[redaktə | əsas redaktə]

Rejissor Yalçın Verdiyev Milli Qəhrəman Qorxmaz Eyvazova həsr edilmiş "Adına yaraşan oğul" adlı sənədli film çəkmişdir[2].

Rejissor Hafiz İmamnəzərli Milli Qəhrəman Qorxmaz Eyvazova həsr edilmiş "Qorxmazların yolu" adlı sənədli film çəkmişdir.

“Qorxmaz ömrü”, “ Güləbirdli şəhidlər”, “Ömrün köhləni yorulanda”, “Adına yaraşan oğul”, “Çoxlarının qalxa bilmədiyi ucalıq”, “Silahdaşımız şəhid oldu?” “Heyif ki səni qaytra bilmədim doğma Laçınım” və s. məqalələr qəzetlərdə, jurnallarda, kitablarda çap edilmişdir. 

Hazırda Laçın rayonunun Güləbird kənd xəstəxanası və Laçın rayon 127 saylı texniki peşə məktəbi şəhid Qorxmaz Eyvazovun adını daşıyır.

2017-ci ildə Cəbrayıl Qəhrəmanovun redaktorluğu ilə Milli Qəhrəman Qorxmaz Eyvazova həsr edilmiş "Qorxmaz olaq" adlı kitab çap olunmuş,oxuculara təqdim edilmişdir.

Mənbə[redaktə | əsas redaktə]

İstinadlar[redaktə | əsas redaktə]

  1. "Azərbaycan Respublikasının hərbi qulluqçularının və polis işçilərinin bir qrupunun təltif edilməsi haqqında" Azərbaycan Respublikası Prezidentinin 15 yanvar 1995-ci il tarixli, 262 nömrəli Fərmanı. e-qanun.az  (azərb.)
  2. “Adına yaraşan oğul”: [rejissoru Yalçın Verdiyevə məxsus olan Milli Qəhrəman Qorxmaz Eyvazova həsr edilmiş eyniadlı sənədli filminin təqdimatı keçirilib] //Mədəniyyət.- 2014.- 2 iyul.- S.7.

Xarici keçidlər[redaktə | əsas redaktə]

Həmçinin bax[redaktə | əsas redaktə]